Capitol 3

1 A pos, Job ia abri sua boca e ia maldise sua dia. 2 E Job ia parla e ia dise:

3 Cansela la dia en cual me ia nase
e la note cual dise: “On consepi un xico.”

4 Acel dia, ta ce lo es oscur.
Ta ce Dio a supra no xerca lo,
e brilia no lumina lo.

5 Ta ce oscuria, la ombra morin, recompra lo,
ta ce nubes densa reposa sur lo,
ta ce sombria diurna angusa lo.

6 Acel note, ta ce susia catura lo.
Ta ce lo no junta se a la dias de anio.
Ta ce lo no veni en la conta de menses.

7 Ai, ta ce la note es steril,
ta ce lo ave no canta de joia.

8 Ta ce la maldisedias[¹] maldise lo,
los preparada per velia leviatan.

9 Ta ce la stelas de sua noti oscuri.
Ta ce lo espera dia futil,
e ta ce lo no vide la palpebras de matini.

10 Car lo no ia clui la portes de ventre
per asconde la miseria de mea oios.

11 Perce me no ia mori de la utero,
ia sorti de la ventre e ia respira final?

12 Perce jenos ia bonveni me,
e perce senos, afin me ia teti?

13 Car aora me ta reclina e ta es cuieta,
ta dormi e ta reposa

14 con res e conselores de la tera,
ci construi ruinas per se mesma,

15 o con prinses, posesores de oro,
ci pleni sua casas con arjento.

16 O como un mor naseda enterada me ta es,
como enfantes ci vide nunca lus.

17 Ala la males sesa turba,
e ala la fatigadas reposa.

18 En junta la prisonidas es calma,
los no oia la vose de la taxor.

19 La peti e la grande es ala,
e la sclavo es libre de sua mestre.

20 Perce on dona lus a la misera
e vive a la amarga profonda,

21 ci espeta futil mori,
escava per lo plu ca per tesoro,

22 ci joia a la tumulo,[²]
es felis en trova la tomba?

23 —A un om de ci sua via es ascondeda,
e Dio ia ensirca el.

24 Car ante mea pan mea jemi veni,
e mea ruji versa como acua.

25 Car me ia teme un teme—lo ia aveni a me,
sur cual me ia ansia ia encontra me.

26 Me no ia es cuieta, me no ia sesa move,
me no ia reposa, e turba ia veni.

[¹] los ci maldise dias

[²] leje gil “joia” como gal “tumulo,” vide Alter, p. 21