Capitol 27

E Job ia recomensa la tema e ia dise:

Par Dio, Ci ia refusa a me justia
e par Xadai, Ci amargi mea nefex,

tra cuando mea respira es en me,
e la ruah de Dio en mea narinas,

mea labios no va parla malia,
e mea lingua no va dise engana.

Distante de me es dise ce vos es coreta,
asta ce me respira final me no va sutrae mea virtua.

A mea virtuosia me teni, me no va desteni,
mea cor no ia causa reproxa tra tota mea dias.

Ta ce mea enemi es como un mal
e mea oposor como un vil.

(Probable la comensa de un parla de Zofar)

Car cual espera la manxada ave per profita,
cuando Dio sutrae sua nefex?

Esce Dio va oia sua cria
cuando desastre veni sur el?

Esce el va deleta se en Xadai,
el va clama Dio a tota tempos?

Me va instrui vos sur la potia de Dio,
me no va asconde lo cual es con Xadai.

Vide, tota vos ia vide lo,
e perce vos emete vapor?

Esta es la comparti de la mal con Dio,
la parte cual la opresores prende de Xadai.

Si sua fios es multe, lo es per la spada,
e sua projenia va vade sin pan.

sua survivores va es enterada par la pesta,
e sua viduas no va plora.

Si el pila arjento como polvo
e como arjila el cumula aponedas,

el va cumula, ma la virtuosa va apone,
e la nonculpable va divide la arjento.

El ia construi sua casa como un rede de arania[¹],
como un cabana cual un gardor erije.

Rica el reclina, ma nunca denova.
El abri sua oios e lo es no plu.

Teror va prende el como acua,
a note la tempesta saisi el.

La venta este porta el a via e el es partida,
lo aranca el de sua loca.

Lo lansa se sur el sin compatia,
de sua potia el luta per fuji.

Lo bate sua manos contra el,
e sisa a el de sua loca.

[¹] como en LXX