Capitol 4

1 Pos esta, Jesus ia es portada par la Spirito a la deserto, per es tentada par la demon. 2 El ia juna cuatrodes dias e cuatrodes notes, e a pos el ia fami. 3 La tentor ia prosimi e dise a el: “Si tu es la Fio de Dio, comanda ce esta petras deveni panes”. 4 Jesus ia responde: “Lo es scriveda:
‘No sola de pan vive la om,
ma de tota parola cual veni de la boca de Dio’”.

5 A pos la demon ia porta Jesus a la site santa e ia loca el en la parapeto de la Templo, 6 e ia dise a el: “Si tu es la Fio de Dio, lansa tu mesma a basa, car lo es scriveda:
‘Dio va comanda sua anjeles
e los con sua manos va porta tu,
afin tua pede no tropeza con un petra’”.

7 Jesus ia responde: “Ance lo es scriveda: ‘Tu no debe proba tua Dio’”. 8 La demon ia porta el a un monte multe alta, e ia mostra el tota la renas de la mundo con tota sua gloria, 9 e ia dise a el: “Me va dona a tu tota esta, si tu proni e adora me”. 10 Jesus ia responde a el: “Retira Satan, car lo es scriveda:
‘Tu debe adora la Senior, tua Dio,
e a el sola tu debe servi’”.

11 Pos la demon ia lasa el, e un anjeles ia prosimi per servi el.

12 Cuando Jesus ia oia ce Joan ia es arestada, el ia retira a Galilea. 13 E, lasante Nazaret, el ia vade abita en Cefarnahum, a lado de la mar, en la rejion de Zebulun e Naftali, 14 per completi lo ce ia es diseda par la profeta Isaia:
15 “Tera de Zebulun e tera de Naftali,
la via a la mar, ultra la Jordan,
Galilea de la nasiones,
16 la popla ci ia es en oscuria
ia vide un lus grande,
un lus ia alti sur ci ia abita
en la rejiones oscur de mor”.

17 De esta momento, Jesus ia comensa a predica: “Repenti, car la Rena de la Sielo es prosima”.

18 A cuando el ia pasea en la rivas de la Mar Galilea, Jesus ia vide du frates: Simon, nomida Petro, e sua frate Andres, lansante un rede a la mar car los ia es pexores. 19 El ia dise a los: “Veni con me e me va fa vos pexores de omes”. 20 Direta los ia lasa la redes e ia segue el. 21 El ia continua sua via, e ia vide otra du frates: Santiago, fio de Zebedeo, e sua frate Joan, ci ia es en la barco de Zebedeo, sua padre, reparante sua redes. El ia clama los, 22 e direta los ia lasa la barco e sua padre, e ia segue el.

23 Jesus ia vade tra Galilea, enseniante en la sinagogas, proclamante la bon novas de la rena e curante la maladias de la popla. 24 Sua fama ia estende se tra tota Suria, e los ia trae a el tota ci ia es malada con varia maladias e dole, aceles ci ia es poseseda par la demon, epilesica e paraliseda, e el ia cura los. 25 E folas grande cual ia ariva a Galilea, de la Decapoli, de Ieruxalim, e Judea, e ultra la Jordan ia segue el.

Capitol 4