Capitol 2

1 Cuando Jesus ia nase en Belen de Judea, en la dias de la Re Herode. En acel tempo, un majos de la este ia ariva a Ieruxalim, 2 disente “Do es la bebeta re de la iudis? Nos ia vide un stela en la este e ia veni per adora el”. 3 Cuando la Re Herode ia escuta esta, el ia es multe ajitada e con el tota Ieruxalim. 4 Asemblante tota la pretes xef e la scrivistes de la popla, el ia demanda los do ta nase la Maxia. 5 Los ia dise: “En Belen de Judea, car tal ia es scriveda tra la profeta:
6 ‘E tu, o Belen, tera de Juda,
no es min entre la gidores de Juda,
car de tu va veni un gidor,
ci va es la pastor de mea popla Israel’”.

7 A pos Herode ia ordina clama la majos en secreta e ia descovre de los la tempo cuando la stela ia apare. 8 El ia envia los a Belen e ia dise: “Vade e xerca la enfante. Cuando vos trova lo, reveni e dise a me, afin me vade e adora el”. 9 A pos escuta la re los ia parti. E la stela cual los ia vide en la este ia gida los asta la loca do ia es la enfante. 10 Los ia es estasiante cuando los ia vide la stela, 11 e entrante en la casa ia vide la enfante con Maria sua madre. Los ia proni se e ia adora el. A pos los ia abri sua caxas e ia ofre a el donadas de oro, olibano e mira. 12 E como los ia es avertida en un sonia no reveni a Herode, los ia parti a sua pais per otra via.

13 A pos sua parti, un anjel de la Senior ia apare a Josef en un sonia e ia dise: “Alti, prende la enfante e sua madre, fuji a Misre e resta ala asta ce me dise tu car Herode va xerca la enfante per mata el”. 14 Josef ia alti e ia prende la enfante e sua madre en la note e ia vade a Misre. 15 El ia resta ala asta la mori de Herode, completinte lo ce la Senior ia dise tra la profeta: “De Misre ia clama mea fio”.

16 Cuando Herode ia persepi ce el ia es enganada par la majos, el ia deveni furiosa. El ia ordina la masacra de tota la xicos de du anios e min en Belen e sua visinia, seguente la data ce la majos ia indica a el. 17 Tal ia es completida lo ce ia es diseda tra la profeta Jeremia:
18 “Un vos ia es escutada en Rama,
sanglotante e lamentante:
es Racel plorante par sua fios,
e no vole es consolada,
car los no es plu”.

19 Cuando Herode ia mori, la anjel de la Senior ia apare en un sona a Josef en Misre 20 e ia dise: “Alti, prende la enfante e sua madre e vade a la tera de Israel, car aceles ce ia vole mata la enfante ia mori”. 21 El ia alti, ia prende la enfante e sua madre, e ia vade a la tera de Israel. 22 Ma cuando el ia oia ce Arcelaus ia es judinte supra Judea en loca de sua padre Herode, el ia es temente a revade ala. E car el ia es avertida en un sonia, el ia parti a la rejion de Galilea. 23 El ia vade e ia abita en un vila nomida Nazaret, afin cual ia es parlada tra la profetas ta pote es completida, “El va es nomida un Nazaretan”.

Capitol 2