Capitol 3

1 En acel tempo Joan la Batiste ia apare, predicante en la deserto de Judea 2 e disente “Repenti car la rena de la sielo es prosima!” 3 A el ia refere la profeta Isaia cuando ia dise:
“Un vose cria en la deserto,
‘Prepara la via de la Senior,
fa reta sua via’”.

4 Joan ia ave un veste fada de pel de camel e un sintur de cuoro ensircante sua taie. Sua comeda ia es locustas e miel savaje. 5 En acel tempo Ieruxalim, tota Judea e tota la rejion de la Jordan ia vade a el 6 e ia es batizada par el en la Rio Jordan, confesante sua pecas.

7 Cuando el ia vide la fariseos e la saduseos veni a batiza, el ia dise a los: “Vos projenia de viperas!, ci ia averti vos de fuji de la coleria de Dio cual veni? 8 Produi fruta bon como evidentia de vosa repenti. 9 E no vanta disente: “Nos ave Abraham como nosa padre” car me dise a vos, Dio pote fa emerji fios de Abraham de esta petras. 10 La axa es en la radis de la arbores, la arbor cual no produi fruta bon va es taliada e lansada a la foco. 11 Me batiza vos con acua afin ce vos repenti, ma ci veni pos me es plu potiosa ca me. Me no merita porta sua sandales. El va batiza vos con la Spirito Santa e foco. 12 Sua ventador de gluma es en sua mano. El va clari sua desglumeria: el va colie sua trigo en sua graneria e va arde la gluma con foco nonestinguable”.

13 Alora Jesus ia vade de Galilea a Joan a la Jordan per es batizada par el. 14 Joan ia atenta preveni el disente: “Me nesesa es batizada par tu e tu veni a me?” 15 Ma Jesus ia responde a el: “Lasa me fa esta aora, car nos conveni completi tal lo ce es justa”. E Joan ia lasa el. 16 A pos sua batiza, Jesus ia sorti de la acua. En acel momento la sielos ia abri, e el ia vide la Spirito de Dio basa como un pijon e veni sur el. 17 E un vose de la sielo disente: “Esta es mea Fio amada, con ci me es bon plaseda”.

Capitol 3