Capitol 15

1 Alora la fariseos e scrivistes ia veni a Jesus de Jerusalen e ia dise 2 “Perce tua disiplos rompe la tradision de nosa asendentes? Los no lava sua manos ante come”. 3 El ia responde: “E perce vos, per segue vosa tradision, rompe la comanda de Dio? 4 Car Dio ia dise: ‘Onora vosa padre e vosa madre’ e ‘Cualcun ci maldise sua padre o madre debe mori’. 5 Ma vos dise “Cualcun ci dise a sua padre o madre: ‘Me ia ofre en la templo la benes cual me ia ave per aida vos’, 6 es libre de deberes con los”. Vos ia nega la parola de Dio per segue vosa tradision. 7 Ipocritas, Isaia ia predise ben sur vos cuando el ia dise:

8 ‘Esta popla onora me con sua labios,
ma sua cores es distante de me;
9 futil los adora me,
enseniante como credes prinsipes umana’”.

10 El ia clama la fola e ia dise a los: “Oia e comprende. 11 Cual desanti un person no es cual entra par sua boca, ma cual sorti de lo”. 12 Alora sua disiplos ia prosimi el e ia dise a el: “Esce tu sabe ce la fariseos ia ia ofende cuando los ia oia cual tu ia dise?” 13 El ia responde los: “Tota planta cual me Padre sielal no ia planta va es desradisida. 14 Lasa los sola: los es sieca ci gida otra sieca. Si un sieca gida a otra, ambos va cade a en un caveta”. 15 Alora Pedro ia dise a el: “Esplica esta parabola a nos”: 16 El ia dise a los: “An vos no pote comprende?” 17 Esce vos no realis ce tota cual entra par la boca pasa a la stomaco e es espulsada en la latrina? 18 Ma cual sorti de la boca veni de la cor, e los desanti. 19 Car de la cor veni pensas malvolente, omiside, adultera, nonvirjinia, fura, atesta falsa, blasfemia. 20 Esta es cual desanti un person, ma come con manos nonpur no desanti”.

21 Alora Jesus ia sorti de acel loca e ia vade a la rejion de Tiro e Sidon. 22 Un fem cananes de acel rejion ia veni e ia comensa cria: “Senior, Fio de David, ave compatia per me! Mea fia es tormentada par un demon”. 23 Ma el ia responde no cosa. Sua disiplos ia veni e ia demanda el: “Senior envia el a via, car el persegue nos con sua crias”. 24 El ia responde: “Me ia es enviada sola a la oveas perdeda de la casa de Israel”. 25 Ma la fema ia veni e ia proni ante el e ia dise: “Senior, aida me”. 26 El ia dise: “Lo no es coreta prende la come de la fios e lansa lo a la canes”: 27 El ia dise: “Per favore Senior, an la canes come la pesos cual cade de la table de sua seniores”. 28 Alora Jesus ia dise a el: “O fema, grande es tua fida! Ta ce lo es fada como tu vole”. E sua fia ia es sanida en acel momento.

29 De ala, Jesus ia ariva a la riva de la Mar de Galilea, ia asende a un monte e ia senta ala. 30 Folas enorma ia veni a el, traente con los la coxeante, la siecas, la deformada, la muda e multe otras. Los ia pone los a sua pedes, e el ia sani. 31 La folas ia es stonada cuando los ia vide la mudas parlante, la deformadas intera, la coxeantes caminante, e la sieca vidente, e los ia glori la Dio de Israel.

32 Jesus ia ia clama a sua disiplos e ia dise: “Me cor es moveda con compatia per la fola, car los ia es con me per tre dias e los ave no cosa per come. Me no vole envia los a via famida, car los pote colasa en via”. 33 La disiplos ia dise a el: “Do nos ta pote oteni pan sufisinte per sasia tal fola en esta loca deserta?” 34 Jesua ia dise a los: “Cuanto panes vos ave?” “Sete”, los ia responde, “e alga pexes”. 35 El ia comanda a la fola senta en la solo. 36 Alora el ia prende la sete panes e la pexes, ia grasia, rompe la panes e ia dona los a sua disiplos, ci ia dona los a la fola. 37 Tota los ia come asta es sasiada. Los ia recolie la fratos restante—sete canastas plen. 38 Aceles ci ia come ia es cuatrosento omes, sin conta femes e enfantes. 39 E cuando el ia envia la fola a via, el ia asende a la barco e ia vade a la distrito de Magadan.

Capitol 15

Evanjelio de San Mateo
1 · 2 · 3 · 4 · 5 · 6 · 7 · 8 · 9 · 10 · 11 · 12 · 13 · 14 · 15 · 16 · 17 · 18 · 19 · 20 · 21 · 22 · 23 · 24 · 25 · 26 · 27 · 28