ISTORIA DE EUROPA
Preistoria · Anticia · Eda medieval · Eda moderna · Eda contempora

Eda medieval

Introdui

La eda medieval ia es un periodo de sirca mil anios de istoria, jeneral asetada como estendente de la cade de la Impero Roman (a fini de la sentenio 5) asta la descovre de America en 1492. Esta periodo ia comensa con un declina demografial en la fini de la Impero Roman, con poplas european diminuinte e multe sites e feudos campanial abandonada. Un clima plu fria, maladias e disturbas political ia fa un rol en esta periodo cual ia vide la sivilia mediteranean clasica eclisida.

Traversante Europa, sosias plu peti ia emerji, localida e ibride combinante influes roman, cristian e germanica o celta. En la sentenios 9 e 10 la poplas ia ateni sua minima, e Europa ia deveni xef campanial e a alga grado un rejion retrogradal. Comersia e aprende ia flori en la mundo muslim, en Xina e en Barat en esta mesma periodo. La armadas muslim ia concista Espania en la sentenios 7 e 8, ma ia es vinseda par la rena franco en 732 cuando los ia atenta entra en Frans.

La cambia de la milenio ia vide un crese e ativia renovida, cuando res e sites ia solidi sua autoria e ia comensa popla denova teras lasada vacua par la declina de Roma. Un clima plu calda pos 900 ia permete ce on usa plu tera per produi comedas. La sistem feudal de cultiva, do la campanianes ia es liada a sua feudos par obligas con la seniores local e la eglesa, ia furni un grado de stablia economial. Esta ia es aidada par la ariva en Europa de la colar de cavalo de Asia, cual ia aumenta la produis cultival par permete ce la arados es gidada par cavalos, en loca de par boves plu lenta.

La sites comersial ia flori en England, Frans e Nederland. La gidores deutx ia envia monces e campanianes a sutrae la bosces e coloni Europa este e la Baltica. La sites-statos de Italia norde ia ave plu ricia e influe. La Espania muslim ia deveni un sentro de aprende e cultur do cristianes, muslimes e iudis ia coesiste en amia relativa. An con multe geras local e disputas entre cavalores, la periodo “alta” de la eda medieval, de 1000 a 1250, ia vide un crise de abitores e un ricia sufisinte per construi catedrales grande e envia armadas european estra la continente a la crusadas.

Pos 1250, stania demografial ia emerji. La crese de la cuantia de abitores ia lenti o ia para cuando la limitas de la cultiva medieval ia es atenida. Disputas major entre renas potiosa, como la Gera de Sento Anios entre England e Frans, ia deveni plu frecuente. La eglesa cristian, a ante secur en sua autoria spirital, ia ave fendes e un froda finansial cresente.

La anio 1348 ia vide un desastre cuando la pesta bubonal (la “Pesta Negra”) ia entra en Italia, portada par barcones de Asia. Lo ia estende tra la continente en tre anios, matante un tri de tota europeanes. Multe ia crede ce lo es la fini de la mundo, prediseda par cristianisme. Con sua dole, la pesta ia trae ruina economial, levante la custa de labora e preveninte la continua de la sistem feudal vea, car la campanianes survivente ia despeta la esijes de lo.

La 150 anios seguente ia cambia Europa de un loca de feudos, su un controla laxe par eglesa e res a un colie de statos nasional nova ma plu unida. La vilas ia deveni sentros de resiste e disenti de la autorias real e eglesal. La influes vea de cavalores e nobiles ia declina, e la gidores ia realinia con la burjesia e la mercatores, un clase plu rica. La emerji de la primador e la estende de alfabetisme ia aumenta la disputas relijiosa e political en multe paises. En 1500, Cristoforo Colombo ia traversa la mar a la Mundo Nova, e Martin Luther ia es a punto de defia la autoria de la Papia Roman e sua direto de dona esenta de pecas par intercambia per mone. Esta developas ia abri la eda moderna de la istoria, e ia fini la eda medieval.

Alga instituidas moderna ave sua radises en la eda medieval. La conseta de statos-nasiones con un governa sentral forte nase de la solidi de potias par alga res de la eda medieval. Esta res ia crea cortes real, ia asinia xerifes, ia crea armadas real, e ia comensa colie impostas – tota la consetas sentral en la governa moderna. Un esemplo xef es la rena franses, gidada par la dinastia capetian de 987 asta la temprana de la sentenio 14. La nobiles provinsal franses e sua casteles e cavalores ia es traeda su controla real en esta tempo, e la unia nasional ia es beneficada. Reversada, Deutxland, cual ia ave res potiosa en la sentenio 10 e en la comensa de la sentenio 11, ia ave en la alta de la eda medieval un serie de disputas political entre la gidores e la eglesa, cual ia debili la coere nasional e ia leva la seniores local a postos de influe grande.

En la eda medieval, la res orijinal ia clama parlamentos per esplica sua politicas e demanda per mone. Parlamentos a esta tempo ia representa la tre clases coletiva – eglesores, nobiles e mercatores – no individuas.

La idea de governa limitada ia apare ance, defiante la idea tradisional en acel tempo ce la governores ave tota la potia (como la imperores roman o la faraones egiptian). La aveni plu sustantial ia es en 1215, cuando la nobiles de England ia espresa sua diretos contra la re John en la Magna Carta. En ajunta, la idea de parlamentos, como esplicada a supra, ia apare, e la natur resiproca de la contratas feudal e senioral ia furni la fundas per la conseta de contrata sosial.

En ajunta, la formi de burocratia governal ia comensa en esta tempo, cuando la consilios real de la res medieval ia evolui a la departes moderna de la governa.

A fini, la regula de benes e servis ia deveni plu importante en la eda medieval, cuando la sindicatos ia proteje la consumores contra produidas inferior.

La pensores de la Renase e la Lumina tende regarda la eda medieval con despeta, ma la eda medieval ia es esensal per fa la labora fundal per la tempos futur.

La barbares uni

En cuando la potia roman ia esflue, tribus de estra la fronteras vea ia entra per pleni la vacua. La visigotos ia institui un rena nova en la penisola iberian, e la vandales ia coloni final Africa norde. En Britan, la tribus germanica ia ariva e ia coloni la costa este en 5 ec. A fini, esta colonistes ia institui renas anglosason cual ia pleni la vacua lasada par la parti de la romanes. La Italia posroman mesma ia cade su la influe de la ostrogotos, de ci Teodorico, la re influente, ia es asetada como imperor nova par la Senato roman, e ia ave bon relatas con la pape cristian, ma ia manteni sua seja de potia en Ravena, en Italia norde. Italia sude e Sisilia ia vive su la influe de la bizantianes per multe sentenios en esta periodo.

La provinse de Galia, cual ia es un de la plu ricas de la provinses roman ueste, ia es concistada par la francos. La sosia galo-roman e sua gidores ia asorbe ultima la francos, dependente de la gerores per securia e fortinte lias de sposi con la clanes franco. La rena franco nova ia inclui multe de Deutxland ueste e la norde de Frans, e sua potia en esta rejion ia es evidentida par la vinse contra la visigotos e otra enemis barbar. La parola deutx per Frans, Frankreich, onora la rena franco de la pasada.

La dinastia merovingian, nomida per la re tribal lejendal Merovech, ia es la prima cual ia governa la rena franco. Sua gidor la plu destrosa e potiosa, Clovis, ia converti a catolicisme en 496 pos promete esta si el ta vinse en batalia. A sua mori, el ia divide sua rena entre sua fios, de ci sua compete ia deveni un sentenio de geras interna sanguosa. Algas, como Chilperic, ia es demente, e zero de los ia vole sede sua teras o potia per reuni la rena. La fortunas de la merovingianes ia esflue e los ia desapare, no plu pertinente.

La asende de un potia governante nova, la dinastia carolingian, ia es la resulta de la potia cresente de la majordomo, o “xef de la casa”. La res merovingian ia dona a sua majordomo un potia estendosa per gida e controla sua statos, e alga de estas ia usa esta potia per comanda e controla teritorios intera. Pepin 2 ia es un de la primas ci ia estende sua potia tan multe ce el ia ave potia sur cuasi tota Galia. Sua fio Charles Martel, ance un majordomo, ia gania la batalia de Tours contra la armadas muslim invadente, escluinte la influe muslim de cuasi tota Europa. La nom Martel ia es un refere a sua arma elejeda.

La fio de Martel, Pepin 3 la Basa, pos solisita suporta de la papia, ia dejeta la “pupetas” merovingian. La papia ia permete Pepino a suverti la merovingianes per securi la suporta franco per la statos papal, e proteje contra la avansa langobarda. Pepin ia es declarada como rex Dei gratia (Re par la grasia de Dio), tal instituinte un presedente potiosa per la asolutisme european, razonante ce lo es la desira de la Dio cristian ce algun ta es declarada como re.

(Ambos Pepin 2 e Pepin 3 ia es conoseda como Pepin la Joven, como Pepin 1 ia es Pepin la Major. An tal, Pepin 3 es ance conoseda como Pepin la Basa e esta es la nom cual nos va usa asi.)

Mapa de Europa pos la mori de Carlo la Grande en 814. Pepin la Basa ia es la fundor de la dinastia carolingian, cual ia culmina en sua fio Carlo la grande. Carlo la grande ia es la re prima coronida como Imperor Roman Santa (la seguor suposada de la Cesares e la protejor de la Eglesa Catolica). Carlo la Grande, de ci sua impero ia estende par concista per ensirca la plu de Deutxland e Frans de oji, ia crea un forma de renase en la mundo inteletal de la rena franco. Carlo la Grande ia organiza moncerias e ia fa ce la monces copia la Biblia, en manoscritos luminada, en salas nomida scriptoria. Per femes, la prepara de stofa ia es un de la poca formas en cual los ia pote estende sua orizones inteletal e fa alga cosa diferente de pari e labora en la campos.

La fios de Carlo la Grande ia segue la tradision germanica pos sua mori e ia divide la rena entre se en la sentenio 9. “Francia” este e ueste ia emerji, cual en la sentenios seguente ia deveni nomida Frans e Deutxland (plu tarda, la ultima ia es conoseda como la Impero Roman Santa).

En esta tempo, la rejiones abitada de Europa ueste ia es plu atacada par la vicinges, grupos de gerores maral de Danmarc e Scandinavia de ci sua dios ia inclui Tor e Odin, e de ci sua atacas contra sites e eglesas rica european ia es sola un de la cualias de sua redes de comersia, cual ia ensirca la Atlantica e Europa de Newfoundland asta Bizantio. La ativia vicing ia continua asta cuando Noria e Suedia ia aseta esitante la cristianisme en la sentenio 11 e 12. England, Er e Normandia franses ia vide un coloni vicing sustantial en esta periodo, con resultas istorial importante.

En Espania, un rena elejal visigoto ia flori, con disputas constante, asta 711, cuando la plu de Espania ia cade rapida su la invadores muslim. Un impero muslim grande, nomida la Califia de Cordoba, ia flori cultural e par sua armadas. En la montanias de la norde, renas cristian peti como Galicia, Asturia, Navarra e Aragon ia persiste. La frontera con la impero franco, nomida en espaniol Marca Hispánica, ia inclui Barselona de 801 (la orijina de la Prinsia de Catalunia).

La rena de Granada, la rena muslim ultima en Espania, ia es concistada par la Res Catolica en 1492. La muslimes ia perde sua ultima rena espaniol, Granada, en 1492, cuando la re de Aragon, Fernando, ia sposi la rea de Castilla, Isabel, en 1469. La uni dinastial, produinte la neto Carlos 5, ia manteni la fronteras interna e la nasionalias, lejes e instituidas diferente de cada de la renas antica asta la sentenio 18. Navarra ia es ajuntada en 1515 e manteni ancora sua lejes e propre politica finansial, como Euscadi.

Italia ia comensa separa en renas plu peti, gidada par formas de governa diferente. An tal, la papia ia es capas de eserse fortia grande supra la plu de la popla european.

Europa este, min poplada e plu distante de la fronteras roman, ia esperia multe invades e migras entre la sentenios 6 e 10. De sua propre pais en Rusia sude, la poplas slavica ia estende a ueste seguente la migras germanica, coloninte la Balcanes, Bohemia, Polsca e Deutxland este, e distribuinte sua fidas entre la seguores de Roma. La polsces, txesces e corvatsces ia adota la cristianisme latina, ma la res balgarsce, serbsce e rusce ia aseta la rituo elinica bizantian.

La bosnianes, un tribu peti de slavicas sude, ia adota sua propre liturjia e en la sentenio 10 ia institui la Eglesa Bosnian, frecuente confusada con bogomilisme car la res bosnian ia mostra un grado alta de tolera los e ia proteje an los, a veses con resultas trajedial per sua propre modo de vive, e serta con resultas istorial per la Balcanes intera.

La magiares, un tribu de gerores-cavalores etnical relatada con la hunes, ia entra en Europa de la stepes rusce en la sentenio 9, ia fa un serie de geras contra la imperores deutx ci ia segue Carlo la grande, e ia concista final Magiar como un rena cristian latina (sua re Stefan ia deveni santa). La poplas de la rejion baltica, como la prusenes e latvisces, ia resta nonatacada par la estende cristian en la eda medieval temprana. En Rusia, un rena en Ciev ia es formida, asorbente e poplas slavica e elementos scandinavian.

<i>La Batalia de Hastings</i>. La tapeto imajosa de Bayeux mostra la concista normande de England (sirca 1070). Britan ia es divideda en renas variosa pos la invade anglosason, asta la periodo de la invades dansce. La Re Alfredo ia uni la plu de England en un rena en la tarda de la sentenio 9. A 10 otobre 1066 William la Bastardo, plu tarda William la Concistor, ia comensa un invade normande de England con la batalia de Hastings. La controla franses de England en esta periodo es mostrada par la vocabulo formal en engles, cual veni de franses.

En 1215 la barones de England ia forsa la re John a suscrive la Magna Carta. Re John ia es spesial despotin. El ia maltrata sua vasales, ia mata sua sobrin xico Arthur, e ia trae la coleria de la Eglesa a la pais en la forma de la Proibi Papal (no servis eglesal ia es fada: no sposis, funeras o misas). Final, sua barones ia uni contra el. Cuando el ia es xasante, los ia ensirca el, donante a el la eleje de suscrive la Magna Carta o mori. La Magna Carta ia conserva par leje alga diretos cual la barones ia merita. La potia real asoluta ia sede a un governa par acorda, e la funda de la Parlamento ia es poneda.

Arte romanica e gotica

Romanica es la nom donada a la stilo arcitetal cual on trova tra Eruopa entre la sentenios 10 e 13. Lo ia empresta elementos de la arciteta roman antica e bizantian este en un fusa de ricia e usosia. Esta es la eglesas de un relijio cristian rica e estendente. Fatores xef en la arciteta romanica es la asende de ordinas relijiosa e moncisme, la nesesa de trata congregas plu grande cuando la popla ia crese, la desira per sponsori e recorda como un beneficor cristian, e la nesesa potiosa de construi eglesas cual refleta la belia e potia de emosia relijial.

On no pote duta cuando on entra a la Catedral de Notre Dame ce sua carne corpal es de terra firma ma sua spirito parteni a la rena de la sielos. Multe eglesas resta de esta periodo, atestante la developa de metodos nova de construi voltas en petra en loca de lenio. La stilo de la basilica sede a espresas plu alta de arciteta relijiosa. La arciteta romanica es desiniada per espresa la potia spirital e autoria de la Eglesa. Multe casteles ia es comensada en esta tempo e estendeda a pos.

La cualias xef de la arciteta romanica es la arcos de testa ronda en fenetras, portes e arcadas, colonas retangulo e silindre, voltas semisilindre, voltas crusada e fenetras duplida. Eglesas romanica tarda ia pote ave voltas costelin. La mures es densa e la contrafortes es plana. Arcos de porte culmina comun con un timpan scultada, spesial de Cristo en gloria. Mures interna porta comun frescos de senas de la Biblia.

La arciteta gotica ia developa de la arciteta romanica en Frans en la temprana de la sentenio 12 e ia estende tra Europa, esente alterada en rejiones diferente. Lo ia dura en alga partes de Europa asta la sentenio 1500. La arciteta gotica, como videda en multe de la eglesas grande e catedrales de Europa, es distinguida par la usa de la volta puntida e la volta costelin. Plu tarda la volta costelin ia deveni multe complicada e ornal, xef en England, Espania e Europa este.

La developa de contrafortes protendente e arcos apoiante ia permete ce la abris en la mures es plu grande e la voltas es plu alta. Colonas ia ave comun un grupo de palos per suporta la costelas e moldures a supra. Portes e fenetras ia ave arcos puntida. La portes ia es frecuente locada en portones rica siselida e ensircada par scultas nonastrata. La fenetras ia deveni plu grande e ia es completida par traseria suportante la vitro. La vitro colorida ia deveni un forma artal plu importante ca fresco en tota Europa estra Italia.

Orna de manoscritos ia es un forma artal major en la tarda de la eda medieval. Ma manoscritos ia es copiada par mano, frecuente par monces laborante en la scriptoria en la moncerias. La libros cual ia es tal produida ia es frecuente luminada (decorada con imajes e bordas ornosa). Frecuente la letera prima de un paje ia es ornada con color e senas peti. La stilo de decora ia developa cualias local, variante de la bordas florosa e astrata asta la vistas detaliosa e senas a interna de la Très Riches Heures de la Duc du Berry par la frates Limbourg.

Poesia e musica ia es portada entre sites par musicistes viajante, nomida menestreles. Esta menestreles ia dona novas de tota Europa cuando los ia viaja e ia presenta naras e cantas. Un de la poesias germanica la plu longa, Beowulf, nara la mata de un bestia jigante ci pesta un vila. Otras de esta epicas ia es la Canta de Roland (fundida sur la ataca contra la soldatos retro de Carlo la Grande par la euscaras cuando Carlo ia gida sua omes a estra Espania).

Potia papal en la eda medieval

La papia ia es un instituida potiosa en la Europa medieval. Relijio ia permea tota la aspetas de la sosia e ia aplica egal a la re como a un cultivor. En Europa medieval, la pape ia es la ajente de potia e la reconsilior, con un autoria spirital enorme en un eda cuando la esiste de sielo e enferno ia es constante esaminada, como ance la via de on a los. La cortia de la vive, maladias, mortalia de enfantes e pestas ia ajunta a la preocupa con mori e la spirito eterna; fida ia es la medica de la mente medieval. La papes ia asinia bispos, ia reseta desis, ia proclama leges canonal tra la mundo cristian. Los ia pote clama per crusadas contra cualce enemi de la mundo cristian, levante armadas gidada par la res e cavalores de Europa.

Esta debe es videda en contesto, considerante la natur de la potia papal. La potia real ia deriva de posese de tera, cual ia es esensal per leva armadas de cavalores. La papia ia ave min ativas direta, e per complica la cosas, esta no ia pote es pasada par erita. Esta ia sinifia ce un pape prosima a mori ia pote rici sua familia sola par dona la propria de la eglesa, tal reduinte la ativas de la corte papal en loca de grandi los. Donce, la pape ia debe depende de otra formas de potia, e sua autoria spirital ia es sempre un alternativa a controla teritorial direta.

La pape ia atenta controla Europa par metodos political. El ia presa multe res afin los pone sua bispos en postos nonrelijial potiosa. En responde a esta, la res european ia deside pone sua propre bispos en postos relijial en un prosede nomida asinia de eglesores (investitura).

La imperor Henrico 4 ia vende multe bispias asta cuando el ia atenta despone Gregorio 7. En responde, Gregorio 7 ia esclui el e ia sutrae la encarga de sua vasales a el. Henrico ia atenta manteni sua rena unida, ma, contra un popla colerida e asustada per sua spiritos, el ia vade a la monceria de Canossa en la Alpes per suplica la pape a remete el, stante estra la murones con pedes nuda en la neva ante cuando Gregorio 7 ia sede e cansela sua esclui.

Tra anios, la pape e la Impero Roman Santa ia disputa sur la asinia de eglesores asta cuando Pape Calisto 2 e la Imperor Roman Santa Henrico 5 ia esecuta la Acorda de Worms, cual ia dona a la pape la autoria de pone bispos en postos relijial e a la imperor la autoria de pone bispos en postos nonrelijial. Esta luta, cual ia fini con la Acorda de Worms, ia es nomida la Controversa de Indui.

La aspetas asteninte de Cristo ia es sempre ja comun en la vives de la cristianes; de San Augustino a San Fransesco la introspeta inteletal e la rejeta de luso ia atrae sempre los ci xerca es plu prosima a Jesus. Esta retira a un comunia comun ia esiste en Asia sude-ueste a la nase de cristianisme. La seta iudiste ci ia asconde la Enrolas de la Mar Mor en cavas ia es sola un de la multe comunias asteninte ci ia dedica se a la vive relijiosa.

La periodo medieval ia vide la developa de ordinas asteninte con moncerias a sua sentros. Ordinas nova ia es formida per segue alga intendes relijiosa. San Benedicto ia es la prima ci ia comanda un modo en cual tota ordinas debe funsiona. La ordina benedictin ia segue rituos multe spesifada. Entre estas ia es tempos esata per cada prea; on sujesta ce esta ia gida a la developa de la orolojo sirca la tempo de la Consilio Cuatro de Laterano. Esta Consilio ia institui regulas de adora per tota la ordinas moncal, regulas fundida en los de la sistersianes.

Citaeux, la padre de la ordina sistersian, ia uni tota la moncerias en un “Ordina”, ma ia permete ance ce los ave sua propre cualias rejional. La monces no ia developa sola la politicas inteletal de la Europa medieval, ma ia aida ance par ofre comedas e servis a la povres.

Sosia en la eda medieval

La sindicatos, ci ia controla ci ia pote o no ia pote labora en un profesa par educa e integra vertical, ia es la forma prima de universias. Entre los ia es la universias de Salamanca, Paris e Bolonia. Scolastica, un filosofia de educa cual ia asentua la instrui de la Biblia e Aristotele, ia es la forma comun de educa. La Renase ia trae umanisme e la artes libral.

La sites ia comensa formi un loca per la botecas e la sindicatos. La sites ia es nesesada como sentros per comersia, e multe de la sites medieval famosa de Europa ia es portos. En esta sites, mone e capitalisme ia comensa flori. En la norde, la gilder ia deveni un mone potiosa e cuasi universal. La europeanes ia reabri ance vias de comersia nonativa con Xina e Asia sude-ueste. La Via de Seda ia es denova usada, e la periodo de esplora e descovre de Europa ia intende trova vias plu rapida e fasil per vade a la este.

Avansas en cultiva ia es aparente. Campos ia deveni aradida par grilias grande de metal, tirada par bestias. La europeanes ia comensa ance lasa campos reposante per permete ce nurintes reveni a la solo de tera, tal comensante la conseta de alterna de cultiva. La sistemes de feudalisme e seniorisme ia crese con la metodos nova de cultiva.

Feudalisme, la ramo political de la sistem senioriste, ia organiza la sosia en un strutur piramide, con seniores governante, e sua vasales a su. Un vasal ia reseta tera e, par intercambia, ia proteje e responde a los supra se.

La seniorisme, la fini economial de la sistem, ia es la forma en cual esta proprias grande ia es manejada. La vasales ia cultiva la tera e ia comersia la gran a la senior per reseta proteje, asede a reservas, un molin per mole la gran, e asede a fornos per forni pan produida de esta gran. Tal la comeda ia es furnida. An tal, farina molinida de gran medieval ia es frecuente bruta e dur per la dentes. La fontes de acua ia es frecuente contaminada, donce la gran ia es usada per prepara ale, cual ia es la bevida xef de la europeanes norde, contra ce la vino ia resta la eleje de la europeanes de sude.

Formas nova de arte

E depinta e leteratur ia reseta un esplode nova de vive cuando la temprana de la eda medieval ia fini.

Depinta

Giotto ia comensa espresa plu realiste la forma umana. An si sua formas pare primitiva en compara con los de la artistes de la Renase, el ia es la prima ci ia atenta retrae la realisme de la arte roman. El ia comensa developa tecnicas de perspetiva en depintas per ateni profondia. La plu de sua arte ia es en la forma de frescos de jeso en la murones de eglesas e eglesetas.

Leteratur

Cuando la prestijia de la Papia ia comensa declina, la consensia nasional ia comensa aumenta; esta nasionalisme ia apare en leteratur scriveda en linguas nasional o demotica, en loca de latina. Esta usa de demotica ia abri tal ce cualias cultural local ia pote es espresada en formas plu natural. Esta ia permete ce leteratur pare plu realiste e umana a la lejores, e lo es par causa de esta ce obras como La naras de Canterbury es considerada como representas de vive en la tempo en cual los ia es scriveda.

An si la alfabetisme de nonrelijiosas ia crese como resulta de la scrives demotica, la sosia ia es ancora fundida sur la cultur bocal.

Dante Aligheri ia nase en 1265 en Firenze, Italia. Sua familia no ia es rica ma ia es considerada como un linia aristocrata. El ia es enseniada par Brunetto Latini, ci ia ensenia a el la arte libral clasica, incluinte latina e elinica antica. An tal, Dante ia abrasa sua lingua demotica e ia comensa scrive La comedia divin en sua dialeto toscan. Oji, el teni un loca en la istoria como la autor prima ci ia fa esta.

Alighieri ia considera sua obra como un comedia par causa de la diferes entre la stilo de scrive italian e la grande trajedia latina. Sua epica en tre partes ia critica sarcasmosa la Eglesa, e ia comenta sur individuas variosa istorial e contempora. La figur la plu importante es Verjilio, la poesiste latina, ci ia ave un rol en gida Dante tra la vive pos mori.

La emosias personal de Dante a multe persones es ance evidente en sua obra. En la strato la plu profonda de la enferno es Bonifasio 8, un pape de ci el ia oposa sua politica de estende. Cada parte de la poesia representa grados de salva: la Enferno, la Purgatorio e la Paradiso. La Enferno inclui multe arcetipos de la enferno como la rio Stix e la navetor Caron ci naveti la spiritos de la mores a traversa de la rio.

La naras de Canterbury par Chaucer ia esposa la interesas mundal de engleses variosa. Esta colie de naras ia es situada en un strutur fundida en un viaja peregrinante a la santeria de San Tomas Becket en Canterbury. La naras es racontas individual de tredes persones de esta peregrina. La naras varia de un relata romantica, tra familia, asta relijio, furninte un talia traversal de la sosia en acel tempo.

Un proportio grande de la popla, e donce un proportio grande de la carateres, ia pare plu focada a la plaser material ca a sua spiritos eterna. La naras de Canterbury es ance usosa per studia la engles demotica de acel tempo. Lo es un esemplo clasica de engles medieval cual la linguistes ci studia England de la edas medieval e moderna temprana continua usa asta oji.

La Gera de Sento Anios (1337–1453)

Jeanne d’Arc ia gida un armada franses contra la engleses en la Gera de Sento Anios e ia susede para la avansa engles. El ia es caturada par la engleses cuando los ia es en batalia, e ia es portada a Rouen per sua prosede legal.

La Gera de Sento Anios ia es un gera multe complicada entre Frans e England (con la interveni de ves a ves de otra paises), sur tre disputas xef:

La gera, orijinal comensada par un disputa sur ci va deveni la Re de Frans pos la mori de Charles 4, ia evolve rapida a un gera complicada e multifasetal. Re Eduardo 3 e sua fio Eduardo, comun conoseda como “La Re Negra”, ia invade Aciten, un rejion enorme en la sude-ueste de Frans, reclamada par England. Con la pasa de tempo, la res de England e Frans ia envolve se en multe operas, incluinte un gera interna en Bres, disputas comersial en lo cual va deveni Beljia, e an un gera en Castelia.

La tre batalias xef de la Gera de Sento Anios (Crécy, Poitiers e Agincourt) ia es vinses vasta per la engleses, cadente la flor de la nobilia franses en cada batalia. An tal, an si la engleses ia gania cada batalia xef e multe petis, un England relativa povre ia pote nunca domina Frans sude, la rejion la plu rica de Frans, cual ia gida final a la perde de la gera par England.

La asende de la sites e la comersia

De la sentenio 6 a la sentenio 10, on ia ave poca sentros de comersia e sola clases peti de mercatores en Europa. La comersia de distantia longa ia es frecuente focada a la benes de luso per la nobilia e la elites de la eglesa, e ia es arbitrada par mercatores viajores como la suris o la iudis. La artisania ia es local fada en feudos. La popla no ia es sufisinte grande per suporta plu developas economial, e la atacas vicing e arabi ia fa ce la vias de comersia es perilosa.

En la alta de la eda medieval, 1000–1500, la comersia de distantia longa ia deveni plu secur e tal plu profitosa. Como resulta, la artisanes ia move a la sentros cresente de comersia, obligante la seniores e serfos a oteni sua benes de esta sentros. La vilas ia formi alias e federas urban, o comunias legal, cual ia labora juntada per luta contra la crimines o trata monarcas e nobiles. La sindicatos ia apare ance, permetente un supravide coletiva de la consernas – la labora ia es fada par persones fidable, e la sindicatos ia dona educa profesal. La spirito de la economia medieval, an tal, ia preveni compete.

La asende de la vilas ia ave un efeto librinte. Los ia forsa la seniores a ofre termas plu libre a la campanianes. Frecuente, la campanianes ia gania sua libria par intercambia per un paia anial a la senior. La posiblia per un cuantia grande de persones de move se de laboras cultival a industrial en la vilas ia aselera la economia. Vera, un spesie de revolui industrial artisan ia aveni en la sentenios 12 e 13, spesial en Nederland do la sentros grande de fabrica de stofa como Ghent e Bruges ia cumula multe ricia e ia stimula crese en Europa Ueste jeneral. La Hansa, un alia en la Mar Norde entre sites comersial norsce e baltica, ia emerji en esta periodo, abrinte la recursos scandinavian per furni pelo, lenio, sira de abea e pexes a Europa.

La alta de la eda medieval ia vide la reveni de la europeanes de la Crusada en Asia sude-ueste, do los ia developa preferes per benes no produida a casa. Esta revenores a casa ia introdui a la europeanes medieval la spises esotica, seda, frutas, drogas e otra produidas de la este a la ves prima. Sites sirca la Mediteraneo ia partisipa en la comersia cual ia developa, con ce Venezia ia deveni la porto la plu rica per entra de benes asian, la base de do Marco Polo e sua acompaniores ia parti en sua viaja a Xina.

Crese de monarcias nasional

En esta mesma periodo, la monarcias ia comensa crese, e como resulta la poplas ia comensa vide la crea de nasiones-statos unida. La res ia envia comandas dirijente e ia comensa institui la cortes real, e los ia vive de la mone de la feudos cual los ia posese e de la paias de la vasales. La consilio real de la re ia es un grupo de vasales ci ia consela la re sur temas de stato, cual ia resulta la crea de la departes fundal de la governa. Cuando la representores de la sites ia comensa asembla, esta ia es un formi temprana de la parlamentos fundal.

Esta parlamentos no ia ave la capasia de comanda a la re, ma ia pote fa cexas e la re ia pote ata seguente los. Esta ia es un spesie fundal de legi.

En ajunta, la formi de esta parlamentos ia gida a la institui de la tre stratos sosial: la strato prima, cual ia inclui la eglesores; la strato du, formida par la nobiles e la propriores de tera; e la strato tre, de la burjeses de la sites constituida. England ia ave du parlamentos: la House of Lords (Salon Alta) e la House of Commons (Salon Basa). La House of Commons ia permete ce la propriores minor de tera deveni membros.

La pesta negra

Estende de la Mori Negra en Europa.

La pesta bubonal o pesta negra, ia ariva a Europa en 1347. Prima comunicada par pulgas e ratas, la bateria Y. Pestis ia ruina la continente, matante un tri de la popla en 1351. On crede ce la bateria ia es endemica entre la rodentes en la stepes asian, e ia salta a la umanas en Europa con nosivia grande. La comensa de la maladia ia es subita, e sua sintomes ia es febre, debilia, delirio, maladia de pulmon, e bubones (inflas de color oscur) a la axila, colo e inguin. Multe frecuente, la infetadas ia mori pos un o du dias, incluinte individuas joven e sana.

Causas de la pesta

La revive de comersia e intercambia ia aumenta la potensia per la sperde de maladias comunicable. Europa no ia sufri un pesta continental pos la pesta de Justiniano en 535, e la popla nonesposada de 1348 no ia erita imunia. An si la ricia ia crese, la nuri e ijenia per la plu europeanes ia es multe debil en compara con normas moderna, diminuinte la resiste imune en jeneral. Multe adultes ia sufri cuando los ia es enfantes en la Famia Grande de 1316–1321, cuando anios de clima fria e umida ia causa ce la granes ia fali tra la continente. Esta esperia en enfantia ia compromete sua resiste a la pesta plu tarda.

On crede ce la pesta ia es traeda a Europa en la ataca mongol sur Kaffa (a la Mar Negra); cuando la maladia ia forsa la mongoles a abandona sua ataca, los ia lansapetri alga vitimes de la pesta a en la site ante parti. Esta ia deveni un pratica comun per la europeanes en asejas de casteles. De ala, mercatores ia sperde la maladia a Constantinopoli, de do lo ia estende tra Europa, prima par barcon a portos mediteranean como Messina e Genova, e a pos par tera en tota dirijes.

Un manca de lenio combustable, par causa de talia la forestas per cultiveria, ia resulta la clui de la banierias cual ia depende de arde lenio per caldi la acua. Spesial en inverno, sola la ricas ia pote compra banis. Esta ia contribui a la state povre de ijenia. La sites ia es multe mal desiniada per ijenia. La sitadanes normal ia lasa dejetadas sur la stradas cual ia atrae ratas, e donce pulgas. La persones ia abita multe prosima a lunlotra, tal ce la pulgas ia nesesa viaja tra distantia longa per infeta otra persones.

On ia culpa multe cosas como la causa de la pesta, spesial la iudis ci ia es la portaculpas xef. An la gidores de la sites ia declara ce membros de la comunia iudi ia veneni la furni de acua, o ia pone un balsam venenosa sur la portones de la site.

Lo es importante ce on sabe ce la europeanes no ia comprende la causa vera de la pesta. Per los la pesta ia es un maldise traeda a los par sua manca de relijiosia, o par la falis de la eglesa, par la poplas iudi de la sites o an la posa de la stelas. Otras ia atribui la pesta an a mal aira. Per combate lo, los ia porta telas de testa o bolsas de “bonodorintes” cual los ia pote teni sirca sua nases cuando nesesada (la opina de la scola medical xef de Europa, en la Universia de Paris, ia es ce la eruta ia es causada par un alinia astrolojial nonfavorable en 1345). Sin la fatos vera, multe atentas par la europeanes per supresa la maladia ia aida lo a sperde.

Respondes a la pesta

Alga persones ia crede ce la pesta es un puni par Dio contra pecores. La autoflajelores ia apare como resulta. Los ia bate se per sangui, ia prea per pardona, e ia demanda ce sua congregas repenti. Vagante tra Europa sentral (cual ia es colpada par la pesta), multe grupos de autoflajelores ia deveni banditos. La sites e la seniores feudal ia proibi los o ia atenta an elimina los. En ajunta, violentia contra iudis ia eruta, e folas ia mata tota ci ia refusa es batizada. Multe iudis ia es forsada a abandona sua casas.

Dotores medical en Europa medieval ia usa un misca de metodos de proba e era e fontes elinica o roman per cura sua pasientes. Sin conose microorganismes, o la rol de ratas e pulgas en sperde la maladia, la dotores medical no ia pote cura la vitimes infetada o limita la sperde. Como resulta, la maladas ia survive o mori seguente la state jeneral de sua sania, e cualce resiste jenetical cual los ia ave acaso.

Resultas de la pesta

La multe moris ia dona plu oportunes per avansa en sosia, e, como resulta, la propriores ia fa plu sedes per oteni cultivores-luores nova. La furni de laborores ia cade, resultante un aumenta de salario de la laborores. Un demanda per gran basa ia resulta un cade jeneral de la custa de gran. La nobiles ia perde un parte de sua ricia, e ia deveni plu dependente de monarcas e gera per revenu e potia.

En ajunta, la pesta ia resulta un boni de la nivel de vive per la campanianes e la popla laborante urban. La campanianes e artisanes ia ave aora plu lusos e un dieta plu bon, e la produi ia cambia de fabrica per un mercato coletiva a un mercato lusosa peti. An tal, la nonegalia monal ia crese, car min persones ia posese proportial plu mone.

A fini, la europeanes ia vide ce prea no cura la pesta, e ce an la gidores de la eglesa ia mori. Esta ia causa ce la popla perde sua fida a la eglesa e ia abri la porte per multe promoves relijial nova e local cual ia es supresada a ante, un fator cual ia aida prepara la veni de la Reformi a un sentenio plu tarda.

Defias a la autoria spirital a la fini de la eda medieval

La eda medieval ia furni multe de la fundas de la Reformi de la sentenio 16. En esta tempo, la eglesa ia furni ordina, stablia e un strutur per la mundo medieval. La funda la plu esensal de la vive medieval ia es la salva relijial – e la ojeto de vive ultima per tota persones ia es oteni lo. Cuando la popla ia perde sua fida a la eglesa e sua capasia per furni la salva, la eglesa ia comensa perde sua controla de la popla.

Pesta

Como esplicada a ante, la pesta ia contribui a la perde de fida de la persones en la eglesa. An tal, alga de la credores plu zelosa ia regarda un tal pesta como enviada par Dio per puni la mundo per sua pecas. La eglesa ia ave un rol en acel idea per coraji un fida plu zelosa e per ataca cualce disentores.

Promoves erese e popla

Multe promoves e persones ia defia la autoria de la eglesa a la fini de la eda medieval.

La spiritos libre ia crede ce la eglesa no sasia la nesesas spirital de la popla, e ia promove la misticisme, o la crede ce Dio e umanas ave la mesma esense.

John Wycliffe, un prete engles e profesor en Oxford, ia fundi lolardisme. La lolardos ia razona ce la salva no nesesa veni tra la pape, e ce la re es superior e plu importante ca la pape e relijio. El ia dise ce lo cual es importante per la relijio es leje la Biblia e prea, no la interprete par la pretes. El ia es la prima ci ia tradui la Biblia a un lingua demotica en loca de usa la Biblia latina. El ia critica la ricia de la eglesa e de la eglesores.

Jan Hus, fundor de la husistes, ia atenta reali reformis como los atentada par Wycliffe en England. Hus ia es un prete en Bohemia cuando el ia aprende la ensenia de Wycliffe. An si la persones sirca el ia pensa ce lo es erese e ia proibi lo, Jan ia pensa ce lo debe es enseniada. Par sua desacordas e interatas, Jan ia conclui ce la Eglesa es malida e ia lasa sua propre pais per scrive Sur la eglesa, un obra cual ia critica la forma de maneja la eglesa.

Sua ensenias ia apela a la folas, e el ia developa un grupo de seguores conoseda como husistes. En 1413, Hus ia es invitada a un consilio cual ia es creada per reformi la eglesa, ma cuando el ia ariva, el ia es arestada per sua ideas. La prosede legal ia es fada mera par causa de costum, car el ia es culpable de la comensa. Hus ia es ardeda a pira a 6 julio 1415.

Froda en la Eglesa

Ance la froda vasta en la Eglesa ia gida a dutas e demandas sur sua autoria. La ricia suprafluente de la eglesores e la frecuentia a cual los ia ave concubinas e enfantes estra sposi ia es un conserna major. La popla ia demanda ance sur la vende de pardonas (la reseta de paias per pardona de pecas); netisme, simonia, o la vende de postos de la eglesa, pluralisme (ave multiple postos eglesal a la mesma tempo), e la lusosia estrema de la catedrales.

La Fende Grande

En 1305, la re de Frans ia invita la pape a move la seja de la Eglesa a via de Roma, un site pestada par partitos local lutante entre se, a Avignon en la Vale de Rhone. Pos la reveni de la papia a Roma con Pape Gregorio 11 en 1377, un eleje ia es fada per la pape nova. La sitadanes de Roma, esijente la eleje de un pape italian, ia forsa la cardinales a eleje Urbano 6. La cardinales franses disentinte ia reasembla en Avignon per eleje sua propre pape, Clemente 7. La papes franses de la Fende Grande, ci la istoristes nomi antipapes, ia ave potia papal en alga rejiones de Europa, e tra 39 anios on ia ave du papes.

En un atenta de reconsilia esta fende, on ia ave un confere en Pisa per eleje un pape nova, ma lo no ia pote despone ambos papes, resultante un divide de la papia a tris. No volente sede, la confere de Pisa ia eleje ancora un otra pape, con la mesma resulta.

A fini, la Consilio de Constanz (1414–1418) ia demanda per la renunsia de la tre papes. Con la suporta de la Imperor Roman Santa, la tre papes ia es desponeda e Martin 5 ia es elejeda como pape, fininte la Fende Grande. La Consilio de Constanz ia ata ance contra Joan Wycliffe e Joan Hus, du reformistes en la Eglesa Catolica.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:53 UTC).