La asende de la site-stato elinica de 1000 aec es partal un continua de la ejemonia cual la sivilia minoan e misenean ia suprapone sur la rejion. An si la elinicas ia ave un punto de vista diferente de la site-stato, los ia developa formas de governa cual ia depende de la partisipa de sitadanes, de cual Atina en la sentenio 5 aec es considerada como la apico.
Un de la aspetas noncomun de la sosia elinica ia es la esiste de la site-stato de Sparta, situada en la sude de la Peloponeso. Sparta ia es un potia militar rejional forte e un competor de Atina tra la periodo clasica. Lo ia es de interesa a alga atinanes como la filosofiste Platon, ci esamina formas variosa de governa en sua libro La Republica, incluinte la sistem de caste de geror de Sparta. La ata de 300 spartanes ci ia defende la pasaje de Termopila contra la armada invadente persian es ancora considerada como capsulinte la esense de la site-stato spartan.
En la otra sites-stato de Elas, la forma de un stato militar gidada par un elite de oligarcas ia es temeda e amirada. La istoria de la continente elinica es liada a la disputa entre Atina e Sparta; ambos ia formi alias con otra sites-stato elinica. La Alia Delian ia representa la interesas de Atina e sua aliadas, e la Alia Peloponesian los de Sparta. La idea de la site-stato como un potia nondependente ia es tan forte ce la sites-stato elinica ia vinse sua enemia sola cuando los ia debe luta contra la invade stranjer cual ia menasa tota de los. Cuando la menasa stranjer ia es eliminada, la sites-stato ia reveni a sua enemia. A fini, esta luta interna entre la sites-stato elinica ia permete ce la macedonsces gania controla de tota Elas. La romanes ia vide esta estende macedonsce como un menasa, e la disputa cual ia apare a pos ia gida a la domina roman de tota Elas.
La apico de Atina en la sentenio 5 aec es ance la comensa de la estende de Roma, cual ia es un site ensircada par otra tribus e sites-stato. La estende de Roma ia comensa como alias o atacas contra otra renas de Latio con intende de securi sua rol sentral en la rejion. A fini, cuando la fortia de Roma ia crese, ance sua estende ia fa simil, e pronto la sites-stato elinicas de la sude de Italia ia debe alia con Roma.
La divides tribal interna en Italia ia gida a la gera contra la samnitas (un tribu de la sentro de Italia) ci ia menasa la sites-stato elinica de Italia. La geras de Roma contra Cartago ia boni plu la loca de Roma en la rejion. Roma ia vinse la etruscas a la norde de sua site e la tribus ensircante. Lo ia luta contra la tribus de la rejion sentral e ia vinse los.
Aora la sude de Italia ia veni su la ejemonia de Roma como un garda contra la estende de Cartago par sua alias con la renas ejean oposante la potia roman. Roma ia deveni la governor de tota Italia en 272 aec. Esta domina de Italia ia gida Roma a senti sufisinte forte per lansa operas militar contra Cartago. Italia, cual en multe tempo ia defende se contra la armada de Cartago, aora ia es atacante.
A fini, Roma ia ataca Cartago mesma en 148 aec e ia priva lo de sua interesas en la Mar Ejeo e en Espania pos cuando los ia suplica per pas. Roma aora ia estende sua controla a tota la Ejeo e a la areas costal de Espania. Cartago ia es destruida e la romanes no ia permete abita la site denova.
La Impero Roman ia ateni sua apico en la periodo augustan (50 aec a 20 ec). An si Roma como un republica ia ave concistas teritorial estendosa, la rena de Augusto es cuando la impero ia ateni sua estende teritorial la plu grande.
La rena de Augusto ia vide la fini de la Republica e la comensa de la Imperio. An si la bandera “SPQR” (Senatus Populusque Romanus – La Senato e la Popla Roman) ia ondeta, sua valuas republiciste ia inclina aora a la voles de la imperor. La periodo augustan es videda como un eda orosa per Roma – la pas relativa e la stablia en la rena de Augusto ia permete la flori de scrivores e arte roman. Per la 40 anios seguente, Roma ia es la potia la plu grande en la mundo, an si a fini, en la sentenio 3 e 4, la presas ia gida Roma a abandona sua suporta per sua provinses.
La colasa de la Impero Roman, comensante en la sentenio 4 ec, ia causa un contrae de la relatas cual ia uni la sentros urban de Europa, ma lo ia crea ance la funda per la reorganiza de provinses, cual en la sentenio 11 ia crea multe statos rejional peti. De la sentenio 11, esta statos rejional peti ia comensa cambia a la presedentes de la nasiones european moderna. Esta ia es partal gidada par la inventa de la campo de bancos, la comersia internasional e la asende de la statos comersial como Venezia cual ia controla la comersia de la este. La sentenio 5 es, donce, un punto de comensa usosa per formi la frontera istorial entre la antica e la moderna.
Europa no es un unia jeografial separada, ma lo es multe fasil ce on vide lo como tal, cuando en realia la cultures de Europa flue ultra sua fronteras. La campanianes de Italia o Espania, per esemplo, ia ave plu cualias comun con sua visinas en Africa norde ca con sua corespondentes en Deutxland o England. Simil, partes grande de Europa este, xef Rusia, mostra influes cultural importante de la cultures asian, e los es istorial plu liada con la este ca con la ueste.
Un problem importante es donce la natur porosa de la fronteras jeografial de Europa. En la sude, la paises european de la Mediteraneo es a distantia de un naviga corta de la portos en Africa norde. En la sude-este, Europa es separada de Asia par un canal corta en la Bosforo, e la cultures la plu importante en la rejion, como la Impero Bizantian e la Turceses Osmanian, ia es estendeda entre Elas e Turcia. En la este, Europa es separada de Asia par la Montes Ural, e la clima, en loca de la jeografia, es la bari la plu sinifiosa contra viaja entre la este e la ueste. Sola en la ueste de Europa, con la Mar Atlantica, on vide un parador jeografial clar.
La responde a esta problem es aseta ce trata Europa como un unia separada es alga caprisal. Lo es esensal, en tota istoria, ce on defini la campo de studia, e la trata de Europa como un unia es un forma de reali esta intende. Si on recorda esta, la problem de la jeografia european no es vera un problem. La fronteras jeografial caprisal de Europa no debe sutrae de la atentas de investiga la istoria de rejiones individua en la continente.
Lo es normal ce on parla sur la cade de la Impero Roman, ma en multe formas esta descrive es tro simple, e pote es malgidante. Serta, la stato sentrida governada par Augusto Cesar e sua seguores ia desapare de la istoria. An tal, la lejes e la lingua cual Roma ia dona a un area vasta de Europa ia persiste en sua influe pos la colasa de la Impero.
La periodo ultima de la Impero Roman ia es plen de tumultas sosial e political. Multe de la tumultas ia envolve la Impero ueste falinte. De la sentenio 3, la Impero Roman ia es su ataca constante par forsas interna e esterna. Tribus cual Roma ia trae nunca su la Pax Romana ia vide en la Roma debilida un posible de estende o ataca. La custa de manteni la campas e fronteras la plu distante de la impero ia sinifia ce un armada profesal ia debe es constante mantenida estra la pais, un atenta custosa per cualce pais en cualce periodo. Interna, la militari de la Impero Roman ia sinifia ce la armada ia deveni un forsa political potiosa, e en la stadios plu tarda de la Impero lo ia ave un rol major en la eleje de la Imperor.
An si Roma ia concista la este e la ueste, esta site peti en la colinas alban en la rejion de Latio ia trova ce lo es tro estendeda. Con un impero grande la nesesa de estende la sitadania ia nase, e esta ia fa ce la imperores veni de tota la impero en la anios ultima.
Esta tensas a la fibre mesma de la impero ia pone un linia entre la provinses este e ueste. La fato ce la site Roma ia comensa un periodo de declina, e la importa perene de emporta gran de Egipte e otra provinses de la este, ia sinifia ce Bizantio (oji Istanbul e nomida Constantinopoli a ante) es usada per lia la este de la Impero Roman con la ueste. Constantino 1, en un atenta de usa Constantinopoli como representante de la integra completa de la Impero Roman Este e la Impero Ueste Latina, ia comensa nonintendeda la rompe de la impero.
Pos la mori de Constantino, la impero en la ueste ia vide un periodo de tumulta cuando la tre fios de la imperor ia luta contra lunlotra per controla Roma. A fini, Constantio 2 ia deveni la sola imperor pos cuando sua du frates ia es asasinada, e ia leva sua cusin Constantio Galo a Cesar de la Impero Este. La impero ia es aora du potias diferente, un fato cual ia formi la istoria de la eda medieval e la curso de cristianisme per la mil anios seguente.
La influe e potia diminuinte de Roma ia gida a la retira de la cultur roman cual a ves pasada ia domina la provinses. A tota la provinses roman, la sitadanes nonroman, de ci sua asendentes ia adota Roma como la ase de sua mundo, ia comensa dona plu asentua a sua identias local – galos, espanioles, briteses antica e africanes norde ia pleni la vacua lasada par la parti de la armadas roman, redeclarante sua propre cultur e lejes.
La Pax Romana comandada par Augusto ia permete ja ce leges e costumes local domina supra la leges de Roma, si la provinses ta aseta mera ce sua militares e impostas es controlada. En relata con esta, la fini de la Impero Roman ia sinifia ce la provinses es aora libre per organiza sua propre cosas militar e economial. An tal, los no ia dejeta tota cual Roma ia ofre. Latina ia es la lingua franca de politica e comersia, e on ia adota zelosa la cualias plu bon de lege roman, spesial en relata con la codigi de leges cual ia deveni alora asedable per la publica e aplicable a tota sitadanes.
Tribus enemin ci ia es repulsada a ves pasada par la armada roman ia pote invade aora tra la frontera roman, coloninte la teras imperal. Esta tribus no ia es stranjer a la cultur roman, car multe de sua gidores e membros ia es en contata constante con Roma tra la macina economial e political de impero. Pos organiza sosias paralel en la rejiones cual los ia invade, lo ia es natural ce los misca se con la popla roman esistente. Esta prosede ia dura tra entre du e tre sentenios e ia resulta un cambia en la composa de la sosia european a interna de la fronteras roman. La parte este, con lingua elinica, ia vide aora Bizantio como sua sentro, e esta divide de la impero ia deveni permanente en la Europa de la sentenios plu tarda.
La plu importante de la atas de Constantino como imperor ia es converti a cristianisme sur sua leto de mori. An si la Impero ia move a Constantinopoli, la papia ia resta en Roma, como consetada par San Pedro, la pape prima. A alga grado la potia papal ia deveni sinonim de la potia de la imperor ueste. La capital secular de la impero ueste ia es Ravenna. La governa debil e la angusa par causa de invade ia gida a la cade de Roma en 410 par la visigotos. La Impero ueste ia cade en 476 en Ravenna. La impero este restante ia es nomida la Impero Bizantian, per sua capital. Italia no ia deveni denova un stato unida asta la sentenio 19.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 22 setembre 2022 (06:56 UTC).