CULTUR E TRADISION CLASICA
Elas antica ·
Roma antica ·
Lingua ·
Leteratur clasica ·
Mitos clasica ·
Cultur clasica ·
Testos clasica
La elinicas crede ce la dios sabe tota e es multe potiosa. Par esta, los dedica festas publica a los e fa ofres a los. On ave un dio per cada aveni de vive. Ma la dios es controlada par un forsa nomida Destina, cual la elinicas representa nunca.
Cual es la valua de la umanas?
La dios nonmortal ia crea tota: la Tera, la sielo, la mar, la arbores, la animales. Los ia crea ance la umana seguente sua propre imaje. Ma, si los es tan potiosa, cual es la valua de la umanas? La dios nesesa es adorada e los ia crea la umanas afin los construi templos e nuri los con ofres. Sin la umanas, la dios ta es como res sin sujetos.
La fontes
Tota Anticia es plenida con naras mitolojial. La poesistes canta la vive de la dios e representa los en la teatros, la artistes depinta los en la vasos e sculta los en petra. La romanes, pos concista Elas, ia es fasinada par sua cultur, e autores latina como Ovidio nara la istoria de esta dios ci ia deveni los de Roma antica. Templos, scultas e frescos ofre ance representas de la dios e de sua aventuras.
La elinicas crede a multe divines. Algas es multe importante: los es nomida “olimpial”. La plu modestas, la nimfas, abita rocas, bosces e rios. On ave ance esentes monstrin, sur ci lo es plu bon ce on no encontra acaso los.
La dios xef
Los abita Monte Olimpo, e donce los es nomida olimpial. Los come ambrosia (un comeda divin cual dona nonmortalia a los) e bevi netar. Sua re es Zeus ci comanda tota… ma lo es comun ce los luta entre se e sua aventuras no es sempre simple! La dios ave la potia de muta se como lo plase a los. Los vide tota cual aveni sur la Tera e los pote desende entre la umanas per sedui los, puni los o servi los. Hades es la sola ci no abita Monte Olimpo: el abita la enferno, do ance la mores abita.
Sirca la Olimpiales, on ave multe dios con potias stonante. La ventas obedi Posedon, capas de crea tempestas ferose. La eroes, partal umana e partal divin, ave potias spesial e sua destina es noncomun. La nimfas, de ci algas es plu bela ca otras, pote vive tra sentos de anios.
La filo de vive
Su la dirije de Zeus, la tre Parcas deside la destina de cada person. Un de los fabrica la filo de vive, un otra texe lo e un otra talia lo. Los simboli nase, esiste e mori.
En la comensa on ia ave Caos, un vacua plen de oscuria, de cual Gea (la Tera) e Eros (la Ama) ia emerji. Gea ia ave un fio, Urano (la Sielo). El ia uni con Urano e ia crea des-du titanes, jigantes. La plu conosedas de los ia es Crono, Rea, Ceo, Febe, Oseano e Tetis.
Urano ia pensa ce un de sua fios va prende sua loca, e donce el ia obliga los a resta su la Tera. La Tera, en cuando el ia deveni plu pesosa, ia demanda ce sua fios venja se. Per fa lo, el ia dona un falxeta de aser a Crono. En cuando la Sielo ia covre la Tera, Crono ia talia la testiculos de sua padre e ia lansa los a la mar. De ala Afrodita ia nase.
Crono ia deveni la sola mestre de la mundo car el ia afonda sua frates en la Tartaro (la parte la plu profonda de la enferno). El ia come la fios ci el ia jenita con Rea.
Cuando sua fio ultima, Zeus, ia es a punto de nase, Rea ia fuji secreta a Criti, do la enfante ia nase. Alora el ia dona un petra a Crono, ci ia come lo, pensante ce lo es Zeus.
Cuando Zeus ia adulti, el ia dona un licuida a Crono cual ia fa ce el vomiti sua frates. El ia libri la Siclopes e la Hecatonceres (fios de Gea e Urano) e tota ia uni en un gera (Titanomacia) contra Crono e la titanes.
La dios, nomida olimpial, ci ia luta con Zeus, ia vinse, e Crono e la titanes ia es lansada a Tartaro ma Gea, nonfelis con la destina reservada per la titanes, ia clama la Jigantes, sua fios e de la sangue de Urano. En la gera du la dios olimpial ia vinse denova.
Gea ia uni con Tartaro, e de la uni Tifon ia nase, ci ia luta contra Zeus a multe veses. A fini, Zeus ia esplode Tifon en la volcan Etna, en Sisilia. De alora, Zeus e sua frates ia divide la potia.
Pos cuando Zeus ia deveni la dio dominante de Olimpo, la dios ia demanda ce Prometeo crea la umanas de acua e fango.
Prometeo ia comanda ce sua frate Epimeteo divide e dona cualias a los, ma sua frate ia dona la plu bones a la animales. Per compensa, Prometeo ia modeli la umanas como dios e ia fura la foco de la caro de Sol e ia dona lo a la umanas.
El ia institui la sacrifia prima: el ia mata un bove, e ia envolve la carne en la pel, e a otra lado ia lasa la osos envolveda en la gras de la animal. El ia demanda ce Zeus eleje, e Zeus ia prende lo cual ia pare la plu bon, lo envolveda en la gras. Cuando la dio ia descovre esta, el ia prepara du venjas:
Zeus asembla la dios. “La umanas ia mali: on debe puni los.” La dio no vole usa sua lampos, temente destrui la sielo. Posedon reuni la mares, rios, nubes e comanda los a sperde tra la tera.
Animales e umanas, tota desapare su la acuas, estra du umanas justa: Deucalion e Pira, ci construi un barcon seguente la consela de Prometeo.
Pos nove dias de naviga, Deucalion e Pira sorti sur la sola monte cual ia emerji, Monte Parnaso.
Los suplica la dios a compatia los, e Zeus, sabente ce los es bon, fa ce la acuas retira. “Como nos va crea umania denova?” ambos demanda. “Covre vosa testas e lansa a retro la osos de vosa ava,” el responde. “Cual esta sinifia?” los demanda. “Nosa madre es la tera e sua osos es la petras!” Alora, los lansa la petras. Los lansada par Deucalion deveni omes; los lansada par Pira, femes. Tal un raza umana nova ia nase.
Teseo ia es la fio de Ejeo, re de Atina. El ia crese distante de sua site, con sua madre, la prinsesa Etra. Ejeo ia asconde un duple de sandales e un spada pos un petra. “Cuando el pote move esta petra sin aida, tu va revela a el ci es sua padre,” el ia comanda a sua sposa.
Con des-ses anios, Teseo ia ateni esta e, pos prende la sandales e la spada, el ia parti per reuni con sua padre. En Atina, Ejeo ia reconose Teseo como sua fio, par causa de la spada.
Atina ia debe dona sete xicos e sete xicas a Criti a tempos periodal, afin los es devorada par la Minotauro, un monstro partal om e partal bove. Teseo ia vade con los. Como el ia pote sorti de la labirinto? Ariadna, fia de la re de Criti, ia ofre a el un filo con cual el va trova la via per reveni. Teseo ia descovre la Minotauro dorminte, ia mata el e ia sorti seguente la filo.
Teseo ia fura Ariadna e ia reveni en barcon a Elas, ma ia debe abandona la prinsesa par comanda de Posedon. Triste, el ia oblida alti la velo blanca per indica sua susede. Sua padre, pos vide la velo negra, ia crede ce sua fio ia mori. Desperante, el ia lansa se a la mar cual de alora porta sua nom.
Acrisio, re de Argos, consulta a un dia la oraculo, ci dise a el: “Si tu ave un fio, el va mata tu.” Acrisio, temosa, comanda construi un prison su tera per clui Danae, sua fia unica. Ma Zeus ia deveni enamada par Danae. El muta se a pluve e entra en la prison tra un buco. Pos menses un fio nase, Perseo. Acrisio clui la madre e la fio en un caxon de lenio e lansa lo a la mar. Ma la dios ia deside ce los va vive. Los es recolieda par la re Polidete.
Polidete ia es enamada par Danae ma el rejeta sua proposas e Perseo, ja adulte, proteje el. Polidete atenta sutrae Perseo, enviante el a luta contra la gorgon Medusa. La gorgones es tre sores, Euriale, Medusa e Steno. Medusa ave un aspeta terorinte, con serpentes vivente en loca de capeles. Cualcun ci vide los es cambiada a petra.
La dios dona a Perseo sandales con alas. Hades dona un elmo cual fa ce el deveni nonvidable, e Atina, un scermo. Perseo vola per xerca Medusa e ia trova el dorminte. Regardante sola la refleta en la scermo de Atina (per no es cambiada a petra), el talia la testa e prende lo. De la feri Pegaso nase, un cavalo con alas, la fio de Posedon e Medusa.
Perseo vola tra la Tera usante la testa de Medusa. El cambia a petra la jigante Atlante. El petri ance Polidete.
Predise
Perseo vole conose sua avo, Acrisio, ci fuji car el teme la predise. A un dia, sin sabe lo, ambos encontra se en la juas publica. En la concurso de disco, Perseo lansa un disco e mata asidente un oservor: Acrisio. La predise ia completi. Pos mori, Perseo es convertida en un constela par la dios.
La dios vide tota: pasada, presente e futur. La oraculos, ci sabe leje la sinias enviada par la dios, transmete a la umanas sua destina. Alga umanas, como Edipo, atenta futil fuji de la vole divin.
Laio e Iocasta, re e rea de Teba, no ave fios. Los consulta un oraculo ci anunsia a los: “Si vos ave un fio, el va mata sua padre e va sposi sua madre.” Un fio nase e la rea abandona el per evita completi la predise. A ante, el perfora sua talos. Un pastor descovre la enfante abandonada, cura el e porta el a la re de Corinto, ci no ia ave un eritor. Esta nomi el Edipo.
Edipo crese con Polibo e sua sposa, credente ce los es sua jenitores vera. Ma a un dia, un enebriada cria a el: “Tu es un adotada!” Edipo no sabe como el debe reata, e viaja a Delfi per consulta la oraculo. La sola responde es: “Tu va mata tua padre e va sposi tua madre.”
Edipo fuji de Corinto per evita la destina. En cuando el distanti de Delfi, el trova un vea en un via streta. Ambos vole pasa e la vea colpa Edipo, ci mata el. Sin sabe lo, el ia mata sua padre.
Entrante a Tebas, Edipo es detenida par un sfinje cual ruina la rejion. Esta, esente partal leon e partal fema, proposa un enigma a tota ci pasa prosima a el. Si los no sabe la responde, el devora los. Asta acel momento, nun ia trova la responde! “Cual es la animal ci pasea a cuatro pedes en la matina, a du en la posmedia e a tre en la sera?” Edipo responde: “La umana: cuando el es enfante, el pasea a cuatro pedetas, cuando el es adulte, el pasea a du, e cuando el es vea, el aida se con un basto.” La sfinje lansa se de un roca alta.
Edipo libri Tebas e la re Laio es asasinada. La site ofre la mano de la rea a el ci ta salva la site de la sfinje. Tal, sin sabe lo, Edipo deveni la sposo de sua madre. Iocasta e Edipo vive felis e ave an du fios e du fias. Ma a un dia, un pesta ariva a la site e la oraculo consela puni la asasina de Laio per oteni la favore de la dios.
La divinor dise a Edipo ce el es la asasinor e ce el es la fio adotada de Polibo, ci ia mori resente.
De alora, Iocasta comprende ce el ia sposi sua fio, e la predise completi se. El suiside. Edipo sieci sua oios e esclui se de la site, acompaniada par sua fia Antigona.
Per la elinicas, esta mito mostra a la umanas ce los no pote evita sua destina.
Iason es la fio de un re. El ave sola un ojeto: espulsa sua tio de la trono car el ia oteni lo par forsa. Sua aventuras porta el a tota la costas de la Mar Mediteraneo e de la Mar Negra.
Iason es la fio de Eson, re de Iolco, un site peti de la penisola Peloponeso. Iason crese distante de la site car sua tio Pelia ia prende controla de lo. Con des-ses anios, el vole dona la site a sua padre e vade a Iolco. En la via el perde un de sua sandales. Cuando Pelia vide el arivante, el ia teme el, car un predise nara ce un om con un sola sandal va representa sua fini.
Iason reclama la trono e Pelia responde: “Me va dona lo a tu si tu trae la Lana Oro.” El sabe ce lo es cuasi nonposible. Acel Lana Oro es situada a la otra lado de la Mar Negra. Iason prepara viaja en un barcon nomida Argo (Atena ia gida sua construi) e reseta aida de eroes conoseda, como Heracle, Orfeo, Teseo, etc.
En sua viaja, los libri un previdor sieca de la arpias, ci come sua comeda. La previdor dise a los la metodo per traversa entre Scila e Caribdis. “Libri un pijon: si lo pasa, vos va pasa.” Los fa tal e la pijon perde un pluma de colo. Sola la popa es tocada. A pos, la du rocas sesa move.
La Argonautas ariva a Colcide do la Lana Oro es. Iason demanda per lo de la re Aete. “Unje mea du boves divin a la arado, semi la dentes de dragon e luta contra la jigantes ci va emerji. Alora, me va dona lo.” Medea, la fia de Aete, ofre un balsam a Iason cual fa ce el deveni nonvinsable.
Pos vinse los, la re dise a Iason: “Vade mesma per prende lo.” Medea aida Iason e adormi la dragon cual proteje la Lana Oro. Tal Iason pote oteni lo. Pos un viaja longa, los reveni a Iolco do Pelia segue, esente la re pos mata la padre de Iason. El vole nunca dona la trono a Iason, ma Medea ia mata la re e Iason deveni la re nova de Iolcos.
Heracle (Hercule per la romanes) ave asendentes eselente. Alcmena, sua madre, desende de la eroe Perseo, e sua padre, Zeus, es la re de la dios. Zeus ateni sedui Alcmena e dise a la dios: “La desendente seguente de Perseo va ave potia grande entre la umanas.” Hera, la sposa de Zeus, sabe ce el engana el denova e fa ce un desendente de Perseo nase ante Heracle: sua cusin Euristeo, ci benefica de la preside de Zeus. Tal, Heracle va pasa tota sua vive su la domina de Euristeo.
Cuando Heracle es un bebe, Hera envia du serpentes per mata el. El strangula los sin cria.
Heracle sposi. A un dia, el dementi e mata sua sposa e fios. Asustada par sua ata, el demanda a la oraculo de Delfi per sabe como el ta purga sua crimin. El descovre ce el debe servi Euristeo, ci encarga el con des-du taxes.
Per comensa, Heracle debe porta a Euristeo la pel de un leon cual no cosa pote feri. Como mata lo? Heracle lansa sua flexas sin susede. El prisoni lo en un cava e strangula lo con sua brasos. A pos, el usa sua propre garas per despeli lo. Par causa de esta pel, el deveni nonvinsable.
La taxe du es destrui la idra de Lerna. Lo es un serpente de nove testas, de cual sua respira mata cualcun ci prosimi a sua pantan en la Peloponeso. Heracle talia alga testas ma los crese denova. Sua sobrin Iolao arde la feris de la idra asta cuando Heracle talia la ultima.
A pos, el catura la porco mas de Erimanto, catura la servo fema de Cerinia e mata la pasaros de la lago Stinfalo cual, con sua becos de fero, come carne umana. La taxe ses es puri la graneria de la re Augias. Per fa lo, la eroe devia du rios, cual puri tota la granerias.
Cuando Posedon dona a la re de Criti un bove mas per es ofreda en sacrifia, este no segue sua promete, e Posedon dementi la animal, cual terori la abitores de la isola. Hercule doma lo e traversa la mar con lo.
En la taxe oto, Hercule mata la cavalos fema de Diomede, cual come carne umana. En la taxe nove, el fura la sintur de Hipolita, rea de la amazonas. El prende ance la boves de Gerion, un jigante de tre testas; el fura la pomas de la Hesperides; e, en sua taxe ultima, el prende Cerbero, la can cual proteje la enferno.
El fini sua taxes e sposi Deianera. En un viaja, los debe traversa un rio e Deianera fa lo sur la sentauro Neso, ci atenta saisi el. Hercule mata la sentauro ci, ante mori, dise a Deianera: “Prende alga de mea sangue e si tu pone lo en la vestes de tua sposo, el va ama sempre tu.” Tra multe anios, Hercule es enamada par un otra fem, e Deianera, jelosa, fa lo cual la sentauro ia dise a el. Ma lo es un trapa: Hercule atenta tira la vestes, ma tira ance sua pel con los. Deianera suiside e Heracle arde se. El es resetada a Monte Olimpo par la dios, ci dona a el nonmortalia.
Dedalo es un arcitetor, inventor e scultor atinan. El labora en Criti per la re Minos. Ala sua fio Icaro nase.
Dedalo construi un bove fema de lenio vacua en cual Pasifae pote asconde per fa la ama con un bove mas. De esta uni la Minotauro nase. Pos esta, la inventor debe desinia un labirinto per clui la monstro.
La re Minos deside puni Dedado per aida Pasifae, e clui el con Icaro en la labirinto. Ma Dedalo construi alas con plumas de avia, unida con sira. Ante comensa vola, Dedalo averti sua fio contra vola tro basa, car la acua de la mar ta satura sua alas, e contra vola tro alta, car la caldia de la sol ta fonde la sira. Ma Icaro oblida esta e prosimi tro multe a sol, la sira fonde, la alas es destruida e el cade a mar.
Dedalo es salvada e, pos entera sua fio sur un isola cual va reseta la nom Icaria, el vade a Sisilia do el vive asta sua mori. Ala el construi la templo de Apolon e dona sua alas como un ofre a la dio.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 31 otobre 2021 (11:25 UTC).