Lingua

Linguas indoeuropean

De la sentenio 17, alga eruditas ia nota similias entre la vocabulos de linguas antica como latina, elinica e persian.

En la media de la sentenio 18, William Jones ia comensa studia sanscrito e ia vide ce lo ave cualias morfolojial e sintatical simil a los de latina e elinica ma ance simil a los de gotica e celta.

Pos descovre esta similias, William Jones ia dedui ce esta linguas parteni cisa a la mesma familia lingual.

Thomas Young ia crea la terma “indoeuropean” en la anio 1813, e la deutxes Friedrich von Schlegel e Franz Bopp ia developa la compara siensal de tota la linguas de Europa e los de India antica.

Si esta linguas es liada, on pote ave un ipotese ce los ia deriva de un lingua comun parlada par un sola popla ci ia veni de un punto orijinal e ia invade otra rejiones.

La desifri de hitita, de persian antica, de tocarian e de elinica misenean ia mostra similias entre esta linguas. Alora, la eruditas ia atenta reconstrui esta lingua orijinal (protoindoeuropean) sur cual lo pare ce lo ia es parlada en la milenio cuatro aec.

La majoria de la linguas de Europa parteni a esta familia. Alga esetas es euscara, magiar, esti, malti e cartuli.

La sivilia indoeuropean

La popla indoeuropean ia vive en Europa sentral e en Sibir. Par sua vocabulo, on dedui ce los no ia sabe naviga ma los ia conose la cavalo, la caro e la bove.

Los ia es organizada en tribus e la xef de la familia ia es la padre. Los ia es alta e blonde e ia ave oios azul. Sua relijio ia es animiste.

En la istoria de esta popla on ave du periodos:

• Fini de la neolitica e comensa de la eda de bronze (4000–2000 aec): los ia vive en un sola comunia.
• Eda de fero (1100 aec): Los ia divide en grupos variosa e ia migra a rejiones distante. Esta es la causa de la divide de la indoeuropean en linguas diferente.

Lingua elinica

Elinica es un lingua indoeuropean cual es parlada en Elas oji. Lo ia ave cuatro dialetos xef en anticia:

• Ionian, cual es la fundi de la lingua de autores como Homero e Herodoto.
• Atica, un varia de la presedente, en cual la plu de la obras scriveda en elinica es scriveda.
• Dorica.
• Arcadociprica.

De la uni de Elas su Filipo de Macedonia, la dialeto atica ia deveni la lingua leteratural en Elas e ia sperde con la concistas de Alexandro la Grande. Esta lingua ia es nomida koine o “comun”. Lo ia es la lingua franca de la mundo eliniste, e la Atesta Nova ia es scriveda en lo.

De la sentenio 6 ec, la cambias cual ia aveni en la lingua ia aselera. La cualias xef de elinica moderna ia es formida en la sentenio 12.

An tal, la lingua cual la eruditas ia usa per scrive ia es la elinica clasica. En fato, asta alga desenios ante aora, elinica ia ave du varias xef:

• La lingua popular o dimotiki, parlada par tota la elinicas, cual ia deveni ofisial en Elas en 1976.
• La cathareusa, cual nun parla, ma cual ia es la lingua ofisial e la lingua scriveda erudita.

Linguas italica

A fini de la milenio du, la indoeuropeanes ia ariva a Italia en du ondas:

• la latinas, ci ia coloni la Tiber e la rejion de Latio.
• la oscoumbranes, ci ia coloni otra partes de Italia.

Otra linguas parlada en Italia ia es:

• Etrusca, un lingua nonindoeuropean parlada a norde de Latio e en Italia ueste ante la sperde de latina.
• Galo, un lingua celta parlada en la norde-ueste.
• Elinica, parlada en la colonias elinica a sude.

Esta linguas no ia sperde e ia desapare con la estende de la latina.

Lingua latina

Latina ia estende sua area de influe cuando Roma ia concista plu teritorios.

La lingua latina ia evolui longo la istoria, e on pote divide tal sua edas:

• Latina antica (prisca latinitas) es la periodo de la lingua ante 75 aec.
• Latina clasica (lingua latina) es la forma usada en la leteratur latina clasica. Lo ia estende de la sentenio 1 aec asta la sentenio 1 ec. Lo difere de latina antica en formas variosa, pd: la codas -om e -os ia cambia a -um e -us.
• Latina tarda (latinitas serior) es la lingua manejal e leteratural de la anticia tarda, en la Impero Roman tarda e la statos cual ia segue la cade de la Impero Roman ueste. Lo estende de la sentenio 3 asta la sentenio 4 o 6.
• Latina demotica es un terma cual refere a la sosioletos de latina parlada en la Mediteraneo en e pos la periodo clasica de la Impero Roman. Lo ia evolui asta deveni la linguas romanica, de cual la scrivedas ia comensa apare en la sentenio 9. Lo difere de la latina clasica en sua gramatica e vocabulo.
• Latina medieval (latina mediaevalis) es la latina usada entre la sentenios 4 e 14. Lo es relatada con la latina eglesal, ma esta es usada sola per temas relatada a cristianisme.
• Latina de la Renase (lingua latina renascentiae) es la latina usada entre la sentenio 14 e 16 en la Renase european, spesial lo usada par la umanistes. La umanistes ia fa cambias en la latina cual ia es introduida en la eda medieval, como la spele (pd: etiam ia es scriveda eciam en la eda medieval, e la umanistes ia prende denova la forma antica). Ma, an si la latina umaniste ia es un lingua leteratural sofisticada, lo ia deveni plu difisil ce on scrive obras sur siensa, oservante la normas instituida par la umanistes. Tal, par causa de la manca de vocabulo esata, esta cambias ia aselera la cambia de latina de un lingua laborante a un lingua de museo.
• Latina nova (latina nova) es lo cual ia developa de la latina de la Renase e ia es usada entre la sentenios 16 asta la fini de la sentenio 19.
• Latina contempora (latinitas viva) es la forma de latina usada de la fini de la sentenio 19 asta oji.

Cualias de la lingua latina

Latina es un lingua en cual la nomes, ajetivos e pronomes cambia sua codas per espresa la relata semantical con la resta de un frase. La colie de formas cual un nom, ajetivo o pronom pote ave es nomida un declina. Cada de la formas infletada es nomida casos: en latina on ave ses casos e sinco declinas. Tal, on clasi la nomes par la declina cual los segue. Ance, la nomes ave jenero, cual pote es masin, femin o neutra.

La verbo no ave formas composada e ave tre troncos:

• Tronco presente o infectum
• Tronco perfeta o perfectum
• Tronco supina

La verbo es divideda en cuatro conjugas (con un otra peti e miscada) en relata a la tempo o formas cual deriva de la infectum (tronco presente).

La ordina de la parolas en latina es SOV (sujeto–ojeto–verbo), diferente de lingua franca nova, cual ave SVO (sujeto–verbo–ojeto).

Alfabetas

Un sistem de scrive es un metodo organizada e fundida sur un lingua, cual permete conserva e transmete mesajes. On ave tre sistemes fundal de scrive:

• Ideogrames: En esta sistem cada sinia representa un ojeto (glifo) o un idea (ideogram).
• Silabarios: En esta sistem cada sistem representa un silaba. Alga linguas usa esta sistem, como nion, cual ave du silabarios, e ance elinica misenean (linial B).
• Alfabetas: Los usa un grupo limitada de leteras cual representa la consonantes e vocales de la lingua. Un varia es la abjad, un alfabeta cual scrive sola la consonantes, usada en ivri e arabi, per esemplo.

La alfabeta elinica es tal:

α	a	alfa
β	b	beta
γ	g	gama
δ	d	delta
ε	e	epsilon
ζ	z	zeta
η	e	eta
θ	t	teta
ι	i	iota
κ	c	capa
λ	l	lamda
μ	m	mu
ν	n	nu
ξ	x	xi
ο	o	omicron
π	p	pi
ρ	r	ro
σ, ς	s	sigma
τ	t	tau
υ	i	upsilon
φ	f	fi
χ	c	ci
ψ	ps	psi
ω	o	omega