A la dia seguente, Joan ia velia e, pos la come de matina, el ia deside vade a la eremiteria.
La dia ia es pico plu fria, ma no multe. El ia ariva a la eremiteria e ia xerca do la entra de la pasaje pote es. El ia move alga ramos cual ia es sur la solo e ia vide ce la petras orijinal es ala.
“Esta es vera strana,” el ia pensa. “La desinia ia dise ce on ave un pasaje asi, ma lo no esiste.” El ia comensa pasea de un lado a la otra, xercante un posible de entra a la pasaje ma trovante no cosa.
Fatigada, el ia prende un calculo e ia lansa lo en dirije a un de la mures. La calculo ia rebondi e ia cade a la solo. Ma ance un parte de la mur ia cade. “O, no,” Joan ia dise, “esta pote es un destrui de la erita cultural…”
El ia atenta reconstrui la mur con la petras cual ia cade ja e, en comensa fa lo, ia persepi ce la mur ia crea un buco en la solo. Joan ia retira la calculos, e, a pos, alga ramos e folias, asta toca un peso de lenio putrida. “Iu,” el ia esclama. Pos puri sua mano a sua jina, el ia colpa la lenio asta rompe lo e – ta-da! – la pasaje ia apare ante el.
“Esta pasaje es tro peti,” el ia dise. “Me no va pote entra ala.” El ia sta a lado de la pasaje e ia puri la lados de la entra. Con un lanterna, el ia lumina la pasaje e ia vide ce, an si la entra es alga peti, la pasaje es plu grande. “Un om alta ta pote sta ala.”
Pos pensa per alga tempo, el ia deside entra e esplora. “Oce, vade!” el ia dise a se. E tal el ia entra e ia comensa pasea longo la pasaje.
Joan ia comensa regrete entra a la pasaje pos sinco minutos. Lo ia es escavada en tera, umida, con radises de arbores sortinte de tota lados. “A la min me fa un cosa divertinte,” el ia dise a se.
El ia continua longo la pasaje tra plu ca dudes-sinco minutos, asta ariva a un punto do lo ia fini. “Bon, seguente la desinia, asi on ta debe ave un porte per sorti, o alga cosa.”
Joan ia regarda a supra, ma el ia trova no cosa. El ia comensa xerca alga lenio putrida, ma ia trova vera no cosa. “Esce la desinia es erante?” el ia demanda a se. “No, no,” el ia dise. “Lo no pote fini en esta modo.”
El ia regarda a ante e ia comensa toca la mur de tera. “Cisa…” el ia dise, comensante retira la tera. Pos sirca sinco minutos, el ia trova un porte (esce on pote dona la nom “porte” a esta?). Lo ia es fada de metal e lenio e, an si el ia atenta abri lo, el no ia susede.
“M…” el ia cria. E el ia pedi la porte, creante un ruido cual ia estende tra la pasaje. Pos regarda, el ia descovre ce la porte ia move pico, donce el ia continua pedi lo asta ce, final, el ia abri lo. “Ura!” el ia cria. E el ia entra a la sala.
La sala ia es alga peti, ma, noncredable, lo ia es multe bon conservada. “U!” ia es la sola cosa cual Joan ia pote dise.
Lo ia pare la cava de la monceria. A un lado, lo ia ave bariles per conserva vino; a la otra lado, lo ia ave… libros? “Perce on ia ave libros e vino en la mesma loca?”
El ia vade a la scafales e ia comensa esamina la libros. Un Biblia, un misal, un libro con covrente de cuoro… “Interesante,” el ia dise, en prende esta ultima. Joan ia abri lo e un faxo de paperes ia cade a la solo. “Cual es esta?”, el ia dise. E, prendente los, el ia comensa regarda atendosa. La plu de los no ia es importante ma, un, un de acel paperes…
“O, mea Dio!” el ia cria. Joan ia pone tota la faxo entre la covrentes de cuoro e, pos regarda la otra libros en la scafales, el ia sorti de la sala e ia core tra la pasaje. El ia debe ariva la plu pronto posible a sua casa.
Cuando el ia sorti de la pasaje, el ia covre denova la entra con ramos e ia core a la casa de sua avo. Cuasi sin pote respira, el ia entra a la sala de come, do sua avo ia es cosininte alga cosa con un odor multe bon.
“Avo!” el ia cria, entrante.
“Joan, no cria tal. Tu ia asusta me,” ia es la responde de la avo.
“Avo, me ia trova…”
“Do tu ia es?” la avo ia interompe. “Esce tu vide como tu aspeta?”
“Avo, esta es multe importante,” Joan ia dise. “Ma ta ce me bevi acua.” Pos bevi, Joan ia mostra la documentos a sua avo. “Avo, seguente esta documentos, nosa familia es la eritor de la Marcia.”
“Cual?” sua avo ia esclama.
“Si, leje los.”
“Un momento, me nesesa mea oculo,” el ia dise. Pos prende lo e regarda la documentos, el ia dise: “Mea neto, esta es en latina, cual me no parla.”
“Latina?” Joan ia regarda denova e ia descovre ce sua avo es coreta. El ia es tan multe ajitada ce el no ia atende la fato ce la documentos es en latina, un lingua cual el conose multe bon.
“Oce, me va tradui los a tu,” Joan ia dise. “A radis, los dise ce la Marcia de la Vileta es donada par la Marci a la familia Tardavenida, car los ia resta fidosa a la familia de la Marci.”
“Ma esta no pote es vera!” la avo ia dise. “Cuando esta documentos ia es scriveda?”
“La anio es… 1837.”
“La confiscas eglesal ia aveni en acel anio.”
“Cual?” Joan ia demanda.
“Lo es conoseda en la istoria de nosa vileta ce la marci ultima ia mori en la anio 1836. El no ia ave eritores e la familia la plu prosima ia es un tio ci ia vive en un otra provinse multe distante. El no ia ama nosa vileta, e acel ramo de la familia es conoseda par es multe avar. Sua desendentes ia es los ci ia construi la lago e ia esclui nos de nosa vileta. En la eda de esta documentos, pos la mori de la Marci, un focon ia destrui la monceria, e nun sabe como lo ia orijina, ma la lejenda dise ce lo ia es la tio, car el ia vole la ricia de la monceria.”
Joan ia regarda atendente sua avo.
“Tu debe sabe,” sua avo ia continua dise, “ce la Marcia es la tereno de la lago, la vileta de oji e la bosce, e esta inclui la monceria. Pos la focon, la ricia ia es portada a la casa de la familia de la tio. Car en acel eda no atesta final ia es trovada, la tio ia resta con tota. Tu debe porta esta documentos a la corte.”
Joan ia prende la documentos e ia vide ce la avo ave un letera sur la table.
“Avo, cual es esta?”
“Lo es un letera cual informa la abitores de la vileta ce la bosce va es taliada.”
“Perce?”
“La Marci vole construi imobilas per vende los a turistes.”
“Cuando tu ia reseta esta letera?” Joan ia demanda.
“A un semana ante tua veni.”
“Donce me crede ce esta documentos cual me ia trova pote aida nos, no?”
“Si, lo es un posible,” la avo ia responde.
E prendente la documentos en la covrente de cuoro, Joan ia sorti de la casa.
Pos sinco minutos, Joan ia entra denova.
“Avo, me ancora no sabe gida un auto. Esce tu pote viaja me a la ofisia munisipal, per favore?”
“Si, clar.”
E, a esta ves, ambos ia sorti de la casa per vade a la vila la plu prosima, do la ofisia munisipal ia es locada.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 4 april 2024 (17:36 UTC).