Ian Chesterton velia de un dormi plen de malsonias, e trova ce la malsonia es real. El es ancora en la cava de cranios.
Barbara secute jentil sua spala. “Ian, velia. Tu ia dormi tra la plu de la dia. La Dotor dise ce lo va es denova oscur pos un tempo corta.”
Ian senta se e regarda sirca se. Susan e Barbara senta a sua lado, e la Dotor ajunta ramos a la foco.
“Los ia trae carne per nos.” – Susan dise. “Lo pare ce los crede ce los ia coce lo.” El indica un folia cual porta un pico de pesones de carne negrida e sanguosa.
“On ave ance acua” – Barbara dise – “en un spesie de petra vacua. Nos ia reserva alga per tu.”
“Tota la comfortas de la casa, no?”
El dona a Ian un spesie de bol natural de petra, e el sorbe side la acua. “Me opina ce me no va proba la carne.”
“Me recomenda evita lo.” – Barbara dise. “Lo no plase.”
Ian regarda la Dotor, ci senta contemplante la foco sin espresa. El aspeta fatigada e despiritida.
Los oia un move a la retro de la cava.
Za apare tra la oscur. El gami a la foco e sta supra los, regardante a su. “Vos ave aora carne.”
Nun responde.
“La animal ia es forte e difisil per mata, ma me ia mata lo. Tota la tribu ave aora carne. La carne es bon.”
Ancora la silentia.
“Los ia trae frutas e acua en un petra vacua.” Za regarda lo. “Esta es la petra?”
“El atenta fa un conversa.” – Barbara pensa isterica.
Za pare confondeda, cuasi ofendeda par sua manca de responde. “Algun ia feri vos?”
La Dotor leva sua testa. “Cuando tu va lasa ce nos parti?”
“Vos va resta asi.” – Za dise sin emosia. “Me ave la cosa cual vos ia fabrica, ma me no sabe esce lo va crea foco per me. Lo es la plu bon si vos tribu e mea tribu junta se – per sempre.”
“No.” – Ian cria coler. “Nos vole parti de asi!”
“Perce? La cava es calda e seca. Nos va trae comedas e acua per vos, e lenio per nuri la foco. On ave no loca plu bon a la otra lado de la montania.” Menasante, Za leva sua axa. “No atenta parti de asi – o vos va mori!”
El turna e sorti egosa de la cava.
Ian trova un basto agu, lansi un peso de carne, regarda lo con repulsa, e lansa lo en la foco, do lo crepita coler.
La Dotor dise malumorosa – “Foco! Foco es ancora la solve, en alga modo, me es serta. Los adora lo! Si sola nos ta pote usa lo per asusta los en alga modo.” El colpa malumorosa un cranio a sua pedes. Lo rola en la foco, e senta ala, suriente a el.
“Regarda acel cranio, Avo.” – Susan dise temosa. “Lo pare cuasi vivente.”
En la cavetas vacua a la fronte de la cranio, flamas peti dansa como oios grimante.
Ian regarda la cranio, e alora el salta a sur sua pedes. “No vivente, Susan – mor! Trova alga pesos de lenio per me, si? Nos va crea torxas – nos pote usa la gras de la carne. Dotor, esce tu ta pote trova cuatro cranios per me, no tro mal fratida?”
“Cual va aveni a pos?” Susan demanda.
“A pos, en tota pares e aspetas, nos va es mor. Esata como acel cranio!”
Ian indica la cranio rapida negrinte en la cor de la foco.
La tribu fa un banceta grande a acel note, sentante sirca la foco enorme cual ruji a la boca de la cava xef. Los formi un fola sirca lo, rostante pesones de carne sanguosa a la fini de bastones, puxante los en sua bocas cuando los es no plu ca scaldada. Enfantes come e jua en la sirculo de lus de foco. Sua madres regarda los, sin teme ce la bestias de la foresta va saisi los a via.
Za senta en la loca de onora, ensircada par Hur a un lado e Horg a la otra. El regarda orgulosa la membros de sua tribu. Los es calda, bon nurida, e secur – e el es la gidor.
Subita, on oia un cria asustante de teme, e un om de la tribu veni corente a la sirculo de lus.
Za salta coler a sua pedes. “Me ia comanda ce tu garda la stranjeres. Perce tu es asi?”
La om sanglota cuasi, con teme. “Me ia espeta estra la tunel cuando me ia oia la tribu de stranjeres clama me. Me ia oia un ulula e cria grande, donce me ia prosimi cuieta a la fini de la tunel per vide… Un majia grande ia aveni, Za. Tu debe veni per vide.”
“Mostra a me.” – Za comanda. “La omes va veni con me. La otras va resta asi.” El core en dirije a la cava de cranios, con Horg e la gerores prosima a pos. Corente, Hur segue los.
La gardor tremante ariva prima a la entra ladal, e punta sua dito. El no vole vade plu. Za marxa tra la tunel peti, segueda par Hur, Horg, e sua gerores.
Cuando los entra a la cava, los encontra un vista xocante. La tribu de stranjeres ia desapare. En sua loca, cuatro cranios briliante flota en la aira, con flamas ardente en sua oios e erutante de sua bocas.
Horg cade a sua jenos en teror. “La stranjeres ia mori! Sua fantasmas ia veni per puni nos.”
La otras de la tribu cade a sua jenos, ululante en teme.
An Za sta saisida par teror, fisante sua regarda a la cranios.
En la ombras a la retro de la cava, Ian xuxa – “Oce, nos ta sorti secreta aora. Rapida!”
La un pos la otra, los move cauta pos la tribu terorida e longo la tunel cual gida a libria. Nun vide los – tota oios regarda la cuatro cranios. Pos secondos, los es a estra en la aira fria de note. Prosima, los vide figures asustada ci foli la foco grande estra la cava xef. Atendente ce los evita apare en la lus de foco, los entra corente a la foresta.
Un de la torxas cual porta un cranio ia arde cuasi a via. Subita, lo colasa su la pesa de sua carga, e la cranio negrida rola cuasi asta la pedes de Za.
La otras salta asustada a retro, ma Za cria – “Vide! Esta es no plu ca foco con la osos de la mores!”
El saisi un de la torxas, secutente lo per libri la cranio, e teni alta lo, regardante sirca la cava. “La tribu de stranjeres ia parti. En cuando nos ia regarda sua foco e ia cria en teror ante osos mor, los ia parti!”
“Los ia desapare en la note.” – Hur dise. “La oscur va asconde los.”
Za brandi sua torxa en un sirculo flaminte. “Con foco, note es dia.” – el dise seria. “Ta ce tota de vos trae foco. Nos va xasa los!”
El gida los a estra la cava e eleje un ecipo la plu bon de sua gerores. Con torxas ardente per armas, la xasores comensa core.
Ian gida sua grupo peti tra la foresta con un rapidia grande. A esta ves, nun trova ce core tan rapida es difisil. An la Dotor no esije ce los para per reposa.
Los fuji sieca tra la oscur, e Ian espera estrema ce los es ancora sur la via coreta.
Final, con un senti de lejeri enorme, el gida los a la pradeta do Za ia combate la tigre.
“Cuasi atenida!” – el dise, rapida respirante.
Los oia crias ferose pos se, e, turnante, los vide la brilia de torxas focosa tra la arbores.
“Rapida!” – Ian xilia. “Los es direta pos nos! Core!”
Los emerji de la foresta en un core tropezante, esplodente tra la scermo de arboretas e arivante sur la plano arenosa.
La tereno es aora plu fasil, e, pos un poca plu de minutos, los ateni la Tardis.
Ian cade contra la porte e turna a la Dotor, ci segue ancora la otras. “Rapida, Dotor, lasa ce nos entra. Los va es pronto asi!”
La Dotor bambola a los, torpi con la clave con un lentia angusante, susede final abri la porte, e lansa se a en.
Ian gida Barbara e Susan tra la porte, e turna per fa un regarda final pos se. El vide ce Za e sua gerores emerji de la foresta e traversa la plano. Un de la gerores lansa un lansia, cual clace contra la Tardis.
Ian entra fretante, e la portes clui pos el.
“Rapida, Dotor! Fa ce nos parti de asi!”
La Dotor es ja ocupada a la strumentos…
Liscante, Za para en frustra ante la arbor strana e blu. Za regarda lo con un grima coler. “Cade lo!” – el ruji. El core per ataca la ojeto strana, levante sua axa supra se. La cosa emete un cria strana e ululante – e desapare. Cadun lansa se a la tera en teror. En la mente de Za, la pensa veni ce el ia era – lo es clar ce la stranjeres parteni a Orbe an pos tota.
Pos alga tempo, reposada e refrescida, Ian e Barbara e Susan oserva ansiosa la Dotor tra cuando el posa se supra la strumentos, realinte un serie rapida de ajustas.
La colona sentral lenti sua altis e basis, e la Dotor leva sua regarda. “Me crede ce la coordinas egali… Si, me es serta ce los egali.” Sua vose pare alga surprendeda.
“Bon.” – Susan dise. El surie a la otras. “Nos va atera pronto.”
“Do?” Ian demanda suspetosa.
La Dotor suspira. “Me desira tan ce me ta sabe!”
“Esce tu no retrae nos a nosa propre tempo?”
“Ma como me pote fa acel? La demanda no es justa.”
“Ma me prea.” – Barbara dise. “Tu debe retrae nos. Tu debe!”
La Dotor bateta la consol sentral de strumentos. “La problem es” – el dise confidante – “ce esta macina no funsiona bon, vera! E plu, un parte de sua codigo es ancora un secreta.” El regarda sever Ian. “An tal, si me ta ave datos conveninte – informas esata sur la tempo e loca de la comensa de un viaja, me ta pote determina un destina. Ma cuando nos ia parti, me ia dispone no tal datos.”
Barbara regarda el con xoca. “Tu vole dise a me ce tu no comprende vera como tota de esta funsiona? E plu, tu no sabe an do nos ia ariva?”
“Esata tal.” – la Dotor dise, parente per responde ambos demandas. El turna a via en un mal umor, murmurante – “Riable! Esce los crede ce me es un miraclor?”
“Vos no debe culpa Avo.” – Susan dise protejente. “Nos ia parti tro rapida de la otra loca – la situa es no plu ca acel. Nos ia descovre nunca esata do e cuando nos ia es!”
La colona sentral move aora sempre plu lenta. Final, lo para completa. “Nos ia ariva.” – la Dotor dise.
“Ma escuta me.” – Ian dise. “Esce tu ia atenta vera retrae nos a nosa propre tempo, Dotor?”
“Me ia trae vos a via de acel otra tempo, mea joven.”
“Acel no responde a mea demanda.”
“Me pote responde en no otra modo.” La Dotor turna a via e comuta la scanador.
La vista mostrada pare steril e sin vive.
“Nosa situa ia boni apena.” – Ian dise.
“Me acorda.” – la Dotor dise enerjiosa. “Nos ta pote es en cualce loca!”
“Cual nos va fa aora?”
“Sola un cosa es posible. Nos debe sorti de la barcon e atenta descovre nosa coordinas esata en tempo e spasio – a la min, si vos vole ce me retrae vos a vosa propre loca.” La Dotor frota sua manos. “La conta de radia, Susan?”
Susan bateta la strumento. “Lo pare zero, Avo.”
“Bon. Aora nos pote sorti e trova do nos es.”
Ian regarda Barbara. El acorda con sua testa.
“Gida nos, Dotor.” – Ian dise asetante. La Dotor abri la portes e sorti. Susan segue.
Ian prende la braso de Barbara. “Ma bon – nosa aventura recomensa!”
Los vade a estra, e la porte clui pos los.
Nonoservada, la fas de la contador de radia vibra subita. Como tan multe de la strumentos en la Tardis, lo tende es nonfidable, e la bateta par Susan ia fa ce lo funsiona denova. La indicador traversa lenta la fas asta cuando lo entra a la parte cual porta la averti “Perilosa”.
An si la Dotor e sua acompaniores es ancora no consensa de lo, los vade en dirije a un peril an plu grande. La planeta do los ia atera es nomida Skaro, e lo es ruinada par anios de gera entre du razas: la caledes e la talas.
Tra la anios longa de gera, la caledes ia cambia – ia muta an – e ia construi macinas de gera en cual los pote vive e combate. Los ia cambia no sola sua aspeta me ance sua nom.
La Dotor es a punto de encontra la creadas ci es destinada de deveni sua enemis xef.
Ala, a estra sur Skaro, el va trova la dalekes.
LA FINI
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 16 maio 2024 (21:21 UTC).