Introdui corta sur la temas xef de cada libro
Scriveda par Vicente Costalago
Coretida par Simon Davies
Esta obra es ance disponable como un fix pdf.
Esta libro peti sola vole es un introdui sur la libros diferente cual formi la Biblia afin la lejor pote ave un conose fundal sur cual es narada en cada.
La Biblia es divideda xef en du partes: la Atesta Vea e la Atesta Nova.
La Atesta Vea es divideda en Pentateuco (la sinco libros prima), Libros Istorial, Libros Poesial e Libros Predisente. Lo nara la istoria de la popla de Israel ante la ariva de la Maxia.
La Atesta Nova es divideda en la cuatro Evanjelios, la Leteras e la Apocalise. La Evanjelio nara la vive e la ensenias de Jesus, la Maxia. La Leteras es la leteras cual San Paulo e otras ia scrive a la comunias cristian prima. La Apocalise nara como la mundo va fini.
Jenese sinifia “nase o comensa”. Esta libro conteni la rejistras de la crea, la jardin de Eden, la persones ci ia vive ante la deluvia, la deluvia, la tore de Babel, la sperde de la razas e la vive de la patriarcas (Abraham, Isaac, Jacob e Jose). La sistem patriarcial es la governa par la om ci ia es la xef de la clan. Esta libro es nomida “libro de la orijinas” car tota la libros segue de lo.
Esodo sinifia “sorti” e refere a la sorti de la enfantes de Israel de Egipte. Esta libro es la nara de la nase e anios prima de Moxe, la des pestas, la viaja de Egipte asta Monte Sinai, la reseta de la lege e la descrive de la Baldacin. La peregrina de la enfantes de Israel de Egipte asta la tera prometeda ia es comparada con la peregrina de la credor en tota sua vive. La Des Comandas apare en la linias 17 prima de la capitol 20.
Levitico veni de Levi, la nom de un de la des-du fios de Jacob. La tribu cual ia desende de Levi ia es un tribu de pretes cual ia fa la rituos de la sacrifias e ia ensenia la lege de Moxe. La libro parla sur la servis en la Baldacin e descrive la debes de la pretes.
La libro de Numeros veni de la fato ce la fios de Israel ia es contada a du veses. La capitol des es la continua de la nara de la peregrina de la ivris de Egipte asta Canan, cual ia es interompeda en Esodo 19. Esta libro nara la esperias de sua peregrina de Monte Sinai.
Deuteronomio sinifia “lege du”. Multe persones ci ia vive ja cuando la lege ia es donada en Monte Sinai ia mori en la eda en cual esta libro ia es scriveda. On debe repete la lege per la jenera nova. Esta libro es formida par oto parlas par Moxe. La capitol final nara sua mori.
La libro de Joxua porta esta nom per un de la du spias ci plu tarda ia deveni la seguente a Moxe. El ia gida la ivris tra la Rio Jordan, ia ataca e concista la canananes e ia divide la tera. La capitoles seguente mostra parlas par el en cual el ia promove moralia entre la popla e ia comanda onora Dio.
Judores nara la istoria de Israel de la mori de Joxua asta la tempos de Samuel. En esta periodo, en cual la popla ia desobedi a Dio a multe veses, ia es un de la plu oscures de la istoria de Israel. Cuando los ia repenti e ia reveni a Dio, El ia promove gidores per libri los de sua enemis.
La libro de Rut es un istoria de ama cual ia aveni en la tempo de la judores. Lo presenta como vive ia es en acel tempos.
Samuel 1 e 2 ia es un sola libro en la Biblia ivri. Los parla de la días ultima de la teocratia (en cual Dio governa tra la judores) e la tempos prima de la rena. Israel ia rejeta Dio e ia demanda per ave un re como otra nasiones. La re prima, Saul, no ia es relijiosa. Cuando el ia mori, David, ci ia es elejeda par Dio, ia deveni re. Esta libros nara la vive de David e la nara de Samuel, la judor ultima.
Res 1 e 2, unida en un sola en la Biblia ivri, continua la historia de la popla de Israel de la coroni de Salomon, fio de David, asta la deporta. Asi on leje sur la mori de David, la rena de Salomon e la revolta su Jeroboam. De esta eda, la nara junta la istoria de ambos renas asta la deporta de ambos.
La du libros de Cronicas dupli la libros de Samuel e de Res. On crede ce la scrivedas ultima ia es de la norde e la du libros de Cronicas ia es scriveda en la sude car lo foca en la istoria de Juda e la adora en la templo.
La libro de Ezra nara la reveni de alga escluidas e la reconstrui de la templo. La taxe de reconstrui, en un ambiente de paganisme, ia tardi par la fria spirital de la popla.
An si lo es xef un biografia, la libro de Nehemia es la ultima de la libros istorial. Nehemia ia ave un vive lusosa como portacopa de la re Artaxerxe. Pronto pos cuando el ia descovre como la abitores de Ieruxalim ia vive, el ia renunsia esta vive per reveni a la site per reconstrui la murones. Su el, multe reformis relijial e social ia es fada.
La libro de Ester mostra un de la libris cual la iudis ia esperia en sua istoria. Lo ofre un esemplo de la favore divin de Dio.
La libro de Tobit analise la presentia de Dio en la relatas familial, espresada con la acompania de la arcanjel Gabriel a Tobit, un joven con fida ci va xerca sua sposa e a fini sposi el pos multe difisilias cual Dio ia envia e cual Tobit ia vinse con la aida de la arcanjel.
La libro de Judita es la istoria de la vidua ivri Judita, en la eda de gera contra la armada asirian en cuando la re Manase ia es prisonida. Judit descovre ce la jeneral asirian Holoferne ia enama el. El sorti de sua site Betulia, asejada par la armada asirian e engana Holoferne (car ela fa ce el crede ce ela ia enama el). Ela ia entra a sua tenda e enebria el. Cuando el adormi, ela destesti el e fa ce Israel vinse.
Macabeos 1 e 2 nara la atenta de la re Antioco 4 Epifane per elinici la ivris. La iudis la plu relijiosa revolta contra el gidada par Matatia. Sua fios deveni atores xef en uni la popla ivri contra la invadores. La libro du parla sur du festas: cuando la templo es dedicada e cuando Nicanor menasa la construida. Esta libro es sentrida en la figur de Juda Macabeo, un de la fios de Matatia.
La libro de Job es un discute filosofial entre Job e sua amis. Job, un om justa, perde sua propria e sua enfantes, e ance comensa ave dole fisical. Sua amis acusa el disente ce la dole veni par causa de pecas. Job afirma ce el es un om bon e ce la dole debe ave otra causa. La capitoles ultima nara como sua ricia es restorada.
La libro de Salmos es la libro de imnos de la ivris. Cuasi 70 imnos es atribuida a la re David e la resta ave otra autores. La libro ave 150 poesias.
La libro de Proverbos ave como mesaje xef ce sajia veni de Dio. Un proverbo es un prea corta cual comunica un veria moral.
Eclesiaste sinifia predicor. Esta libro apare como un monologo. La parola “vania” indica asi ce tota pasa.
Canta de Cantas es un istoria de ama pur entre un om e un fema. Salomon scrive sur belia e santia en esta relata. La nara simboli la ama de Dio per sua popla.
La libro de Sajia es dirijeda a la ivris ci ia vive en Alexandria per coraji los ante la destrui moral entre cual los debe vive e per aida los a evita paganisme e ateisme.
Sirac es un libro dirijeda a la ivris relijiosa ci vole vive seguente la lege de Moxe.
La libro de Isaia ia es scriveda en un eda en cual la popla ia oblida Dio. La profeta Isaia ia predise la esclui en Babilionia per Israel e Juda. Ma el ance ia predise la reveni de la escluidas e la veni de la Maxia.
La libro de Jeremia nara un eda triste per la popla ivri. La rena de Juda ia es portada a Babilonia, an si Jeremia ia resta en Ieruxalim. El ia scrive sur la judi de Dio sur un popla pecosa ma ance la grandia de ama divin.
En la libro de Lamentas Jeremia, stante entre la ruinas de Ieruxalim e de la templo, lamenta sua destrui, cual el ia predise.
La libro de Baruc es un medita sur la state de vive de la iudis escluida, con meditas sur teolojia e la istoria de Israel e un mesaje a la abitores de Ieruxalim e la Diaspora.
La libro de Ezeciel rejistra sete vides de la profeta, escluida en Babilonia. La temas de sua predise es la destrui de Ieruxalim, la judi a sua popla e la reveni de la escluidas como ance la futur de Israel.
La libro de Daniel ave istorias variosa. La cuatro bestias de un revela mistical representa la cuatro potias mundal de acel eda (babilonianes, persianes, elinicas e romanes). La revela mistical du refere a la governa de la elinicas su Alexandro la Grande. La rena notada en la capitol nove es la rena de Cristo e la capitoles 10 a 12 nara la fini de la mundo.
La libro de Hoxea es dirijeda a Israel. Lo parla sur la ama de Dio e denunsia e la idolatria e la pecas de la popla.
La libro de Joel es divideda en du partes: la invade de locustas e la responde de Dio a la preas de la popla. Lo ave un predise sur la iudis ci va instituí un nasion en Filastin.
En sua libro, Amos dise ce Dio ama pardona e no sola sacrifias formal. El ensenia ce la grandia de Israel no pote es fundida sur potia e ricia ma sur justia.
Obadia ia vive en Ieruxalim pos la esclui de Juda en Babilonia. El ia anunsia la cade de la edomitas, desendentes de Esau e ia predise cual va aveni en la futur, cuando la iudis va governa sua teras.
La libro de Jona nara como el no ia fa sua debe con la popla de Ninive. El ia fuji en un barcon e Dio comanda un venta per destrui lo. La marinores lansa el a mar do el es comeda par un balena. Ala, Jona promete vade a Ninive e Dio fa ce la balena libri Jona sur tera.
Mica ia predise la destrui de Israel e Juda e ia critica la pecas de la popla, spesial los de la ricas contra la povres.
En la libro de Nahum la destrui de Ninive es prediseda. Divideda en du partes, la prima presenta la judor e la du la judi contra la site.
Habacuc ia predise en Juda la malias de Israel e sua concista par la caldeos. El ance ia descrive la pecas de la caldeos e ia predise sua cade.
Sefania parla contra la pecas de la popla, predise la judi sur Juda e la bondises sur Ieruxalim restorada.
La libro de Hagai ave cuatro predises, totas relatada con la reconstrui de la templo.
La libro de Zecaria es divideda en du partes: la prima parla sur la restora de la templo e la ultima parla sur la rena de Cristo.
Malaci ia vive pos la restora de la templo ma el ia vide como la popla ia reveni a sua vive de peca. El reproxa los e predise la veni de la Maxia.
La Atesta Nova parla sur Cristo, la Salvor de umania. En lo on trova la vive de Cristo, la comensa de cristianisme, la via per salva, instruis per la vive cristian e la projeta de Dio per la futur.
La sinco libros prima es libros istorial: la cuatro Evanjelios par Mateo, Marco, Luca e Joan; e la Atas de la Apostoles.
Mateo presenta la vive de Cristo, scriveda spesial per la iudis, e revela Cristo como sua Re-Salvor.
Marco nara la vive de Cristo revelante El como un servor obedinte a Dio. Lo ia es scriveda per la romanes.
Luca revela a Jesus como Om perfeta, asentuante Sua umania. Esta Evanjelio ia es scriveda per la elinicas.
Joan revela Cristo como Fio de Dio, asentuante Sua divinia. El ia scrive sua Evanjelio per completi la mesajes de la otra tre evanjelios.
La Atas de la Apostoles ia es scriveda par Luca en cuando el ia es en Roma con San Paulo. Lo continua la nara de sua Evanjelio e comensa con la avenis pos la crusi de Cristo. Lo ance inclui un nara de la organiza e la comensa de la eglesa cristian. La ojeto xef de la libro es mostra ce Jesus continua Sua labora tra la fidosas e la eglesa gidada par la Spirito Santa.
Paulo ia es en Corinto en la anio 58 cuando el ia scrive esta sua letera a la romanes, dirijeda a la cristianes ci ia vive en Roma. Sua tema xef es la prinsipe de sola la fida. On ia ave un disputa entre la cristianes iudi e noniudi. Algas ia pensa ce la iudi debe ave un loca prima. Paulo ensenia ce “Dio es justa” e, car totas ia peca, la iudi no es superior per Dio.
La letera prima a la corintianes ia es scriveda de Efeso a un anio pos la institui de la eglesa en Corinto. Paulo ia vole gida la eglesa contra era e nonmoralia e responde a alga demandas.
La letera du a la corintianes ia es scriveda pico pos la prima. Paulo ia reseta la novas de Tito ce la letera prima ia fa ce multe ia repenti ma el ia descovre ce la cristianes iudida ia ariva a la comunia e ia predica un Evanjelio falsa. El ia scrive per espresa sua joia per sua repenti como ance per preveni los contra apostoles falsa.
En sua letera a la galatianes, Paulo confirma la prinsipe de sola la fida. El nota ce acel eglesa ia ave un crise par causa de la cristianes iudida car la cristianes ia aseta rituos iudi.
En la letera a la efesianes, Paulo scrive un parla en cual el dise ce Cristo es la sentro de tota e ce la eglesa es unida con El.
En la letera a la filipianes, Paulo parla sur un condui personal plu ca sur teolojia. Lo ia es scriveda probable en la anio 62, de sua prison en Roma.
La cristianes iudida e alga persones ci ia vole ensenia misticisme ia introdui se en la eglesa en Colosa. Paulo ia scrive de sua prison en Roma sua letera a la colosanes e ia dise ce misticisme e rituos vacua ave no valua. Cristo es supra tota e la joia vera es otenida par vive un vive cristian.
En la letera prima a la tesalonianes, scriveda de Corinto en la anio 51, Paulo mostra ce el es contente con la vive de la eglesa ma ance dise ce on nesesa cambias eras, spesial sur la veni du de Cristo.
En la letera du a la tesalonianes, Paulo esplica alga consetas cual la comunia no ia comprende en sua letera prima.
La letera prima a Timoteo ia es scriveda pos cuando Paulo ia es librida en 63 ec.
La letera du a Timoteo, ia es enviada de Roma, cuando Paulo ia espeta sua esecuta. Paulo instrui el sur condui e prinsipes.
En la letera a Tito, Paulo coraji Tito, ci ia es gidor de la eglesa en Criti. Acel eglesa ia ave difisilias, spesial con eresias.
Paulo scrive a Filemon, un om rica e membro de la eglesa en Colosa. Sua sclavo Onesimo ia fuji (pos fura alga proprias) e ia encontra Paulo en Roma. Pos converti, Paulo envia el con Filemon e en la letera demanda ce Filemon pardona Onesimo e aseta el como frate en Cristo.
La letera a la ivris ia es scriveda a iudis cristian, ci ia es pensante reveni a iudisme car los ia es persegueda. La autor mostra la superioria de la fida cristian e coraji los en sua fida. El dise ce Cristo es superior a la profetas, la anjeles, Moxe e Joxua.
La letera de san Jacobo parla sur moralia, etica e la mostra pratical de fida personal.
La letera prima de san Petro es un urje a manteni sua fida an con persegue.
La letera du de san Petro parla contra profetas falsa. Lo conteni referes a la veni du de Cristo.
La letera un de Joan es un sermon sur crede cual xerca coreti eresias e afirma la cualias de vive cristian.
La letera du de Joan foca sur la veria de la Evanjelio de Cristo e preveni contra mestres falsa.
La letera tre de Joan, dirijeda a Gaio, loda el per como el trata a sua frates cristian.
La letera de Juda es un clama a cristianes per resta firma en sua fida. Lo critica nonmoralia en la comunia e fini con un bondise, en cual el dise ce sola Cristo pote aida la fidosas contra tentas de vive.
La Apocalise ave como ojeto mostra Cristo como Senior, vinsor contra malia. Lo ia es scriveda par Joan en cuando el es ia es prisonida en Patmos, en la anio 95.
Esta paje es presentada con la lisensa CC Attribution-Share Alike 4.0 International.
Lo ia es automata jenerada de la paje corespondente en la Vici de Elefen a 9 desembre 2025 (09:49 UTC).