La crea de la mundo

Introdui

Ci ia crea nos? La Biblia, la Parola de Dio, dise como umanas ia comensa. A multe tempo ante aora, Dio ia crea la om prima, e ia nomi el Adam. Dio ia crea Adam de la polvo de la tera e ia fa ce el vive. Dio ia crea un jardin nomida Eden afin la om pote vive ala.

Ante cuando Dio ia crea Adam, El ia crea un mundo bela plenida con cosas merveliosa. Pico e pico Dio ia crea montes, flores e arbores e avias con plumas de multe colores.

Vera, Dio ia crea tota.

En la comensa, ante cuando Dio ia crea tota, on ave no cosa. No persones, no lus, no oscuria. On ave sola Dio, Ci ave no comensa no fini.

Istoria

En la comensa, Dio ia crea la sielo e la tera. E la tera ia es vacua.

Alora, Dio ia dise: “Ta ce on ave lus.” E la lus ia es fada.

E Dio ia nomi la lus “dia” e la oscur “note”. E tal un dia ia pasa.

En la dia du, Dio ia separa la mares e lagos de la sielo. La sielo ia resta a supra, e la mares e lagos, a su.

Dio ia dise: “Ta ce tera seca apare.” Dio ia crea ance erba e flores. Tal la dia tre ia aveni.

A pos, Dio ia crea la sol e la luna e la stelas en la dia cuatro.

En la dia sinco, Dio ia crea animales: El ia crea pexes per es en la acuas, e avias per es en la sielo.

En la dia ses, El ia crea animales per es en la tera.

Ance, en esta dia, Dio ia pensa: “Ta ce on crea la om a Nosa imaje.” E Dio ia crea la om.

Dio ia parla a Adam: “Come tota cuanto tu vole de la jardin estra la arbor de la siensa de bon e mal, e de la arbor de vive. Si tu come de esta arbor, tu va mori.”

E Dio ia pensa: “Lo no es bon ce la om es sola. Me va crea algun per acompania el”. El ia fa ce Adam dormi e el ia prende un costela de Adam. De esta costela, Dio ia crea la Fem. Esta ia es la acompanior perfeta per Adam.

En la dia sete, Dio ia resta e El ia bondise esta dia afin lo deveni un dia per reposa. En la jardin de Eden, Adam e Eva ia es felis obedinte Dio.

Aora la serpente (Satan) ia es plu rusosa ca cualce creada vivente. El ia dise a la fem: “Esce Dio ia dise vera: ‘Tu no pote come de la arbores en la jardin?’”

La fem ia responde: “Nos pote come de la arbores de la jardin, ma Dio ia dise a nos ce nos no pote come de la arbor de ben e mal, o nos va mori.”

“Vos no va mori”, la serpente ia dise. “Car Dio sabe ce cuando vos come de lo vosa oios va abri, e vos va es como Dio car vos va distingui bon e mal.”

La fem ia vide ce la fruta de la arbor ia pare bon per come. El ia vole ance sabe sur bon e mal e gania sajia, donce el ia prende la fruta e ia come. El ia dona alga a Adam, ci ia es con el, e el ia come ance.

Direta, los ia comprende ce los es nuda. Alora los ia cose alga folias de figo per covre se.

Alora, ambos ia oia la sona de la Senior en cuando El ia es paseante en la jardin. Los ia asconde entre la arbores. Dio ia clama Adam: “Do tu es?”

Adam ia responde: “Me ia oia ce tu es en la jardin, e me ia es tan temosa car me ia es nuda, ce me ia asconde.” Dio ia responde: “Ci ia dise a tu ce tu es nuda? Esce tu ia come de la arbor sur cual me ia dise ce tu no debe come de lo?” Adam ia responde: “La fem ci Tu ia pone en la jardin con me ia dona alga fruta de la arbor a me e me ia come lo.”

Alora Dio ia dise a la fem: “Perce tu ia fa esta?” La fem ia responde: “La serpente ia engana me, e me ia come.” Donce Dio ia dise a la serpente: “Car tu ia fa esta, tu es maldiseda plu ca tota la otra animales. Tu va rampe en la polvo per tota tua vive. On va ave enemia entre tu e la fem e sua desendentes. Los va colpa tua testa, e tu va colpa sua talo.”

Alora Dio ia dise a la fem: “Tu va pari con dole. Tu va desira controla tua sposo ma el va governa tu.”

Dio ia parla a Adam: “Car tu ia escuta tua fem e tu ia desobedi, la solo es maldiseda. Per tota tua vive tu va luta per survive. La solo va dona spinas e cardos, ma tu va come sua granes. Par la suo de tua fronte tu va oteni tua comables asta cuando tu mori. Car tu ia es fada de polvo e a la polvo tu va reveni.”

Alora Adam ia nomi Eva a sua fem, car el va es la madre de totas. E la Senior ia dona vestes fada con pel de animales per ambos. Dio ia dise: “La umanas ia deveni como me. Los conose bon e mal. Cual va aveni si los prende la fruta de la Arbor de Vive e come lo? Los va vive per sempre.” Alora Dio ia espulsa los de la Jardin de Eden e la anjeles ia comensa vijila afin la umanas no pote entra.