RELIJIO

Dao de jing

La libro de la Via, par Laotse

Traduida par George Boeree; fundida sur la tradui par Lin Yutang.

Editada par MikeM e Simon Davies

1 La prinsipes de la Via

La Via cual on pote discute
no es la Via asoluta;
La nomes cual on pote dona
no es la nomes asoluta.
La nonomida es la orijina de la sielo e la tera;
La nomida es la madre de tota cosas.
Donce:
A alga veses, on desapone pasion
per vide la secreta de vive;
A alga veses, on regarda la vive con pasion,
per vide sua formas mostrada.
Esta du – la secreta e sua formas mostrada –
es – en sua natur – la mesma;
Los es nomida diferente
cuando los deveni mostrada.
Ambos pote es nomida la misterio de la universo:
Estendente de la misterio a la misterio plu profunda
es la porton a la secreta de la vive intera.

2 La leva de oposadas relativa

Cuando tota la popla de la tera conose belia como belia,
aveni la reconose de feia.
Cuando tota la popla de tera conose bonia como bonia,
aveni la reconose de malia.
Donce:
La esiste e la nonesiste interdepende en crese;
La difisil e la fasil interdepende en completa;
La longa e la corta interdepende en contrasta;
La alta e la basa interdepende en loca;
La tonos e la vose interdepende en armonia;
La anterior e la posterior interdepende en acompania.
Donce la saja:
Maneja sua consernas sin ata;
Predica la prinsipes sin parolas;
Tota cosas aveni, ma el no verje a via de los;
El dona la vive a los, ma no posese los;
El ata, ma no prende;
El susede, ma no reclama onora.
Lo es car el no reclama onora
ce la onora no pote es prendeda de el.

3 Atas sin atas

No onora la saja,
e alora la popla no ta conspira e luta;
No valua ojetos rara,
e alora la popla no ta fura;
Asconda de vide la cosas desirada,
e alora la cores de la popla no ta es turbada.
Donce en la governa de la saja:
El vacui la cores de la popla
ma pleni sua stomacos;
Descoraji sua aspiras
ma forti sua corpos;
Afin la popla pote es inosente de sabe e desiras.
E la astuta no ta osa interfere.
Par ata sin atas
tota pote vive en pas.

4 La carater de la Via

La Via es un vaso vacua,
e sua usas es sin limita!
Sin fondo!
Como la fonte de tota cosas,
sua bordas agu es rondida,
sua maranias es desmaraniada,
sua lus temperada
sua tumulta sumerjida,
e ancora como acua profonda lo resta oscur.
Me no sabe de ci es sua fio,
un imaje de lo cual esiste ante la dio.

5 Natur

Natur no es compatia:
Lo trata sua creadas como sacrifias de palia.
La saja no es compatia
El trata la popla como sacrifias de palia.
La universo es tan como un soflador!
Vacua, ma lo furni sin fali;
Plu lo es operada, plu lo dona.
Par multe parolas, la inteleto es consumada.
En loca, donce, resta con la esense.

6 La Spirito de la vale

La spirito de la vale mori nunca.
El es nomida la fema mistica.
La porta de la fema mistica
es la radis de la sielo e la tera.
Continuante, continuante,
lo pare resta.
Estrae de lo
e lo ta servi con fasilia.

7 Vive con otras

La universo es eterna.
La razona perce la universo es eterna
es ce lo no vive per se mesma.
Donce lo pote dura longa.
Donce la saja prende la loca final per se mesma
e trova se mesma a la loca prima;
El vide sua corpo como un acaso,
e sua corpo es donce conservada.
Esce lo no es car el no vive per se mesma
ce el mesma es realida?

8 Acua

La plu bones de umanas es como acua;
Acua benefica tota cosas
e no compete con los.
Lo abita en la locas basa cual tota despeta –
e en cual lo prosimi a la Via.
En sua abita, la saja ama la tera basa;
En sua cor, el ama lo cual es profonda;
En sua relatas con otras, el ama compatia;
En sua parolas, el ama sinseria;
En governa, el ama pas;
En comersia, el ama capasia;
En sua atas, el ama la eleje de la bon momento.
Lo es car el no compete
ce el es sin culpa.

9 La risca de tro multe susede

Estende complete un arco,
e tu ta espera ce tu ia para a tempo.
Tempera la borda de un spada a la plu agu,
e la borda no ta dura longa.
Cuando oro e jada pleni tua salon,
tu no ta pote manteni lo secur.
Si tu es orgulosa con ricas e onora
tu semi la semes de tua ruina.
Reposa cuando tu fini tua laboras,
tal es la via de la sielo.

10 Abrasa la Un

Par abrasa la Un con tua spirito,
esce on pote nunca abandona la Via?
Par controla tua forsa vital per ateni jentilia,
esce on pote deveni como un enfante nova naseda?
Par limpi e puri tua vide mistica,
esce on pote aspira la perfeta?
Par ama la popla e governa la rena,
esce on rena sin interfere?
Par abri e clui la porton de la sielo,
esce on pote reali la rol de la fema?
Par comprende tota la sabe,
esce on pote renunsia la mente?

11 La usosia de nonesiste

Tredes raios uni sirca la sentro;
De sua nonesiste (de sua individualia)
resulta la usosia de la rota.
Formi arjila a un vaso;
De la nonesiste (de sua vacuia)
resulta la usosia de la vaso.
Talia portes e fenetras en la mures de la casa;
De sua nonesiste resulta la usosia de la casa.
Donce, nos profita de la esiste de cosas.
E par la nonesiste de cosas, nos es servida.

12 La sensas

La sinco colores sieci la oios de umanas;
La sinco notas musical sordi la oreas de umanas;
La sinco sabores desagi la gusta de umanas;
La corsa de cavalos, la xasa e mata, dementi la mentes de umanas;
Benes rara e valuada resta sua propriores de dormi a note.
Donce la saja
furni per la stomaco e no la oio.
Donce, el rejeta la un a aseta la otra.

13 Loda e culpa

“Favore e desonora angusa nos;
Lo cual nos valua e cual nos teme es en nos mesma.”
Cual es la sinifia de esta:
“Favore e desonora angusa nos?”
Los ci reseta un favore de supra
es angusada cuando los reseta lo,
e es angusada cuando los perde lo.
Cual es la sinifia de esta:
“Cual nos valua e cual nos teme es en nos mesma?”
Nos ave temes car nos ave un ego.
Cuando nos no regarda acel ego como la ego,
cual cosa nos teme?
Donce, el ci valua la mundo como se mesma
pote alora es encargada con la governa de la mundo;
E el ci ama la mundo como se mesma –
la mundo pote es encargada en sua cura.

14 La Forma sin forma

Cual pote es regardada ma no videda –
Acel es nomida la nonvidable (yi).
Cual pote es escutada ma no oiada –
Acel es nomida la nonoiable (hsi).
Cual pote es saisida ma no tocada –
Acel es nomida la nontocable (wei).
Esta tre evita nosa demandas
e alora misca e deveni Un.
No a sua alta lo ave lus,
No a sua basa lo ave oscuria.
Nonsesante, continuante,
lo no pote es definida,
e lo reversa denova a la rena de nonesiste.
Esta es perce lo es nomida la forma sin forma,
la imaje de nonesiste.
Esta es perce lo es nomida la evitante:
Encontra lo e tu no pote vide sua fas;
Segue lo e tu no pote vide sua dorso.

15 La sajas de edas antica

La sajas de edas antica ia ave sajia sutil e un comprende profonda,
tan profonda ce los no ia pote es comprendeda.
E car los no ia pote es comprendeda,
los debe es descriveda en esta modo:
Cauta, como algun ci traversa un rieta en inverno;
Vasilante, como algun ci teme peril de cada dirije;
Seria, como algun ci ata como un invitada;
Umil, como la jelo fondente;
Sinsera, como un peso de lenio nonpreparada;
Con un mente abrida, como un vale;
E libre miscante, como acua susia.
Ci pote reposa en un mundo susia?
Par reposa cuieta, lo deveni clar.
Ci pote manteni sua calmia per un tempo longa?
Par ativia, lo reveni a vive.
El ci abrasa esta Via
garda contra deveni superaplen.
Car el garda contra deveni superaplen,
El es ultra la gasta e la renovi.

16 Conose la lege eterna

Ateni la ultima en pasivia,
teni firma a la funda de cuietia.
La multia de cosas formi e leva a ativia,
ma me regarda los cada denova a sua reposa.
Como plantas cual crese lusosa
ma revade a la radis de cual los ia veni.
La revade a la radis es la reposa;
Lo es nomida “revade a sua destina”.
La revade a sua destina es la trova de la lege eterna.
La conose de la lege eterna es la lumina.
E no conose la lege eterna
es la cortea de desastre.
El ci conose la lege eterna es tolerante;
Par es tolerosa, el es nonpartisan;
Par es nonpartisan, el es como un re;
Par es como un re, el acorda con natur;
Par acorda con natur, el acorda con la Via;
Par acorda con la Via, el es eterna,
e tota de sua vive es conservada de feri.

17 Renores

De la renores la plu bon
la popla conose sola ce los esiste;
La renores du los ama e loda;
La renores tre los teme;
E la renores la plu mal los despeta.
Cuando los no comanda la fida de la popla,
alga ta perde sua fida en los,
e alora los diverje a juras!
Ma de la plu bones, cuando sua taxe es realida,
la popla dise “Nos mesma ia fa lo!”

18 La declina de la Via

Cuando la Via grande ia declina,
la prinsipes de “umania” e “justia” apare.
Cuando sabe e astutia apare,
ipocritia grande segue.
Cuando la ses relatas no pote vive plu en pas,
on ave lodas de “jenitores jentil” e “fios consiensosa”.
Cuando un nasion deveni caososa e malgovernada,
on ave lodas de la “ministros fidosa”.

19 Reconose la ego simple

Esclui sajia, dejeta conose,
e la popla ta profita par sentos;
Esclui “umania”, ejeta “justia”,
e la popla ta recovre la ama de sua familia;
Esclui astutia, ejeta “usosia”,
e la furores e la banditos ta desapare.
Como esta tre toca sola la esterna e es nonsufisinte,
la popla nesesa lo de cual los pote depende:
Revela tu mesma simple,
abrasa tua natur orijinal,
para tua egosia,
restrinje tua desiras.

20

Esclui aprende, e frustras fini.
Entre “a!” e “uf!”
cuanto difere on ave?
Entre “bon” e “mal”
cuanto difere on ave?
Lo cual omes teme
merita serta la teme;
Ma, ai, la matini de lumina es tan distante!
La popla de la mundo selebra,
como los partisipa en la festas de sacrifia,
como los asende la terasas en primavera;
Me es sola umil, como un nonempleada,
como un enfante nova naseda ci no pote surie ancora,
nonfisada, como algun sin un casa.
La popla de la mundo ave sufisinte e plu,
ma me es como algun iniorada,
mea cor ta debe es la cor de un fol,
fangosa e nubosa!
La vulgares es sabente, luminosa;
Me es sola stupida, confusada.
La vulgares es astuta, serta;
Me es sola depresada.
Pasiente, como la mar,
vagante, parente sin dirije.
Tota la popla de la mundo ave un intende;
Me pare sola ostinosa e bruta.
Me difere sola de la otra popla,
e valua prende mea susta de la madre.

21

La sinias de virtua
seque sola de la Via.
La cosa nomida la Via
es evitante e evadente.
Evitante e evadente,
ma formas es escondeda en lo.
Evitante e evadente,
ma ojetas es escondeda en lo.
Oscur e difisil persepida,
ma la fortia de vive es escondeda en lo.
La fortia de vive es vera real,
ma la evidentes es escondeda en lo.
De la dias antica a aora,
La formas nomida ia nunca sesa,
e par los nos pote vide la padre de tota cosas.
Como me conosa la forma de la padre de tota cosas?
Par esta formas evidente!

22

Par sede, on es completa conservada.
Par flexe, on deveni reta.
Par es vacuida, on pote es plenida.
Par es laserada, on pote es renovida.
Par nesesa, on posese.
Par ave abunda, on es confusada.
Donce, la saja abrasa la Un,
e deveni un model de la mundo.
El no revela se mesma,
e es donce luminosa.
El no justi se mesma,
e es donce famosa tra la mundo.
El no vanta de se mesma,
e donce la popla onora el.
El no es orgulosa,
e donce el es la xef entre umanas.
Esce no es vera, como la anticas dise,
“Per sede, on es completa conservada?”
El es tal conservada e tota la mundo onora el.

23

Natur dise poca parolas:
Afin un tempesta no dura la matina completa.
Un pluvon no continua tota la dia.
De do los veni?
De natur.
An natur no dura longa en se parla.
Esce umanas parla plu?
Donce:
El ci segue la Via es asosiada con la Via.
El ci segue virtua (Teh) es asosiada con virtua.
El ci abanda la Via es asosiada con abanda.
El ci es asosiada con la Via –
La Via es encantada per bonveni el.
El ci es asosiada con virtua –
Virtua es ance encantada per bonveni el.
El ci es asosiada con abanda –
Abanda es ance encantada per bonveni el.
El ci no ave un fide sufisinte
no ta pote comanda la fide de otras.

24

El ci sta sur la puntas de se ditos no sta firma;
El ci estende se pasea no pasea bon;
El ci revela se mesma no es luminosa;
El ci justi se mesma no es famosa tra la mundo;
El ci vanta de se mesma no reseta onora;
El ci es orgulosa no es xef entre umanas.
Estas en la oios de la Via
es nomida “la restas e tumores de virtua”,
cual es cosas repulsante.
Donce, la om de la Via rejeta los.

25

Ante cuando la sielo e la tera ia esiste
ave alga cosa neblosa:
Silente, isolada,
stante solitar, nunca cambiante,
jirante sempre sin fali,
lo merita es la madre de tota cosas.
Me no conose se nom
e clama lo como la Via.
Si me debe dona un nom, me ta nomi lo “grande”.
Si lo es grande, lo debe estende en spasio;
Par estende en spasio, lo estende distante;
Par estende distante, lo revade a la punto de orijin.
Donce:
La via es grande,
La sielo es grande,
La tera es grande,
La re es ance grande.
Estas es la cuatro grande de la universe,
e la re es un de los.
Umanas segue la model de la tera;
La tera segue la model de la sielo;
La sielo segue la model de la Via;
La Via segue la model de natur.

26

La solida es la radis de la lejera;
La inerta es la mestre de la fretante.
Donce la saja viaja tra la dia
ma parti nunca de se caro de furnis.
En la media de onora e gloria,
el vive osiosa, sin turba.
Como un renor de un nasion grande
pote trata se corpo en la impero par freta?
En nonseria lejera, la sentro es perdeda;
En ata fretante, autodisiplina es perdeda.

27

Un bon coror lasa no trasas.
Un bon parla lasa no faltas per atacas.
Un bon calculor usa no calculos.
Un porta bon securida usa no baretas,
ma ancora no pote es abrida.
Un noda bon liada usa no corda,
ma ancora no pote es desliada.
Donce la saja aida bon la umanas;
Per esta razona, ave no person refusada.
El salve bon la cosas;
Per esta razona, no cosa es refusada.
– Esta es nomida la fura de la lus.
Donce, un bon person es la ensenior de la mal person.
E la mal person es la leson per la bon person.
El ci no valua se ensenior
e no ama la leson
es un ci ia perde se via,
an si el ta es bon instruida.
– Tal es la secreta sutil.

28

El ci persepi la mas
ma reteni la fema
deveni la canion de la mundo.
Par es la canion de la mundo,
el ave la virtua orijinal (teh) cual no es taliada.
E el reveni denova a la inosentia de la bebe.
El ci perspepi la luminos
ma reteni la oscur
deveni un model per la mundo.
Par es un model per la mundo,
el ave la potia eterna cual era nunca,
e el reveni denova a la nonesiste primeval.
El ci conose onora e gloria
ma reteni la oscuria
deveni la vale de la mundo.
Par es la vale de la mundo,
el ave potia eternal cual sufisi sempre,
e el reveni denova a la unia de lenio nonsiselida.
Rompe esta lenio nonsiselida
e lo es formida a un vaso;
En la manos de la saja
los deveni la ofisiores e judores.
Donce, la renor grande talia nunca.

29

Ave los ci ta concista la mundo
e fa de el cual los desira.
Me vide ce los no va susede.
Car la mundo es la dios vaso propre;
Lo no pote es fada par umanas.
El ci fa lo, mali lo.
El ci teni lo, perde lo.
Car alga cosas vade a ante,
e alga cosas segue a pos;
Alga cosas sofla calda,
e alga cosas sofla fria;
Alga cosas es forte,
e alga cosas es debil;
Alga cosas pote rompe,
e alga cosas pote cade.
Donce la saja asteni de suprapasa, asteni de estravagante,
asteni orgulo.

30

El ci, par la Via, intende aida la renor de umanas
va oposa tota concista par la fortia de armas.
Car tan cosas tende rebondi.
Do la armadas vade, spinas e rubos crese.
La eleva de un armada grande
es segueda par un anio de manca.
Donce, la bon jeneral fa se intendes e para.
El no osa depende de la fortia de armas;
El fa se intendes e no es orgulosa;
El fa se intendes e no vanta de lo;
El fa se intendes como un nesesa regretable;
El fa se intendes ma no ama violentia.
Car cosas deveni vea pos ateni se apico.
Acel violentia ta es contra la Via.
E el ci es contra la Via va mori joven.

31

De tota cosas, soldatas es strumentos de malia,
odida par umanas.
Donce, la person de la Via evita los.
La bon senior favore la sinistra en la vive nonmilitar,
ma en avenis militar, el favore la direta.
Soldatas es strumentos de malia.
Los no es la armas de un bon senior.
Cuando la usa de soldatas no pote es evitada,
la politica la plu bon es la restrinje calma.
An en vinse, ave no belia,
e el ci nomi lo bela
es un ci deleta en mata.
El ci deleta en mata
no va susede en se aspira per rena la mundo.
(La cosas de bon fortuna favore la sinistra.
La cosas de mal fortuna favore la destra.
La jeneral locateninte sta a la sinistra,
La jeneral plen sta a la destra.
Esta es per dise, lo es selebrada como la ritua funeral.)
La mata de multias debe es lamentada con triste.
Un vinse debe es selebrada con la ritua funeral.

32

La Via es asoluta e ave no nom.
An si la lenio nonsiselida es peti,
lo no pote es usada como un vaso par cualcun.
Si res e barones pote reteni esta natur nonmalida,
tota la mundo ta sede volente la rena a los.
La sielo e la tera junta,
e la pluve dulse cade,
ultra la comanda de umanas,
ma egal sur tota.
Alora, sivilia ia ariva e nomes is es donada.
Car ave nomes,
ta es bon si on sabe do on debe para.
El ci sabe do on debe para
pote es esenta de peril.
La via en la mundo
pote es comparada a la rios cual core a la mar.

33

El ci sabe otras es instruida;
El ci sabe se mesma es profunda.
El ci concista otras ave la potia de musculos;
El ci concista se mesma es forte.
El ci es contente es rica.
El ci es autodetermina ave la potia de vole.
El ci no perde se sentro dura.
El ci mori ma de ci se potia resta, el ave un vive longa.

34

La Via grande flue a cada parte,
como un deluvia, lo pote vade a la sinistra o la destra.
La multe cosas deriva se vive de lo,
e lo no refusa los.
Cuando se labora es completa,
lo no posese cualce cosa.
Lo vesti e nuri la multe cosas,
ma lo no reclama los como se poseses.
Frecuente lo es regardada como sin mente o pasion,
e lo pote es regardada como peti.
Car lo es la casa de tota cosas, ma no reclama los,
lo pote es regardada como grande.
Car a la fini lo no reclama grandia,
se grandia es atenida.

35

Teni la simbol grande
e tota de la mundo segue,
segue sin encontra la feri,
e vive en sania, pas, comunia.
Ofre bon cosas per come
e la vagor resta.
Ma la Via es blanda de sabor.
Regardada, lo no pote es videda;
Escutada, lo no pote es oiada;
Aplicada, se furni fali nunca.

36

El ci on vole diminui en potia
debe prima es aumentada.
El ci on vole debili
on debe prima forti.
El ci on vole basi
on debe prima leva a potia.
El de ci on vole prende
on debe prima dona a el.
– Esta es la lus sutil.
Jentilia vinse fortia:
Pexes debe resta en la stange profunda,
e armas acu de la stato debe resta
do nun pote vide los.

37

La Via fa nunca,
ma tra lo, tota es fada.
Si prinses e duxes pote reteni la Via,
la mundo ta es reformida par se mesma.
Cuando reformida e levante a ata,
lasa ce los es restrinjeda par la simplia pur de lo sin nom.
La simplia pur de lo sin nom
es nudida de desira per luta.
Par nudi de desira, nonativia es atenida,
e la mundo ta ariva a pas par se mesma.

38

La person con virtua superior no vide se virtua.
Donce, el ave virtua.
La person con virtua inferior no vole perde se virtua.
Donce, el no ave virtua.
La person con virtua superior ata nunca,
e el ata nunca con un intende ascondeda.
La person con virtua inferior ata,
e el ata con un intende ascondeda.
La person de compatia superior ata,
ma el ata sin un intende ascondeda.
La person de justia superior ata,
e el ata con un intende ascondeda.
Ma cuando un om de li ata e no vide un responde,
el rola a supra se mangas e forsa lo a otras.
Donce:
Pos la Via es perdeda, alora la crede de umania aveni.
Pos umania es perdeda, alora la crede de justia aveni.
Pos justia es perdeda, alora la crede de li aveni.
Li es la diminui de fide e onestia de la cor,
e la comensa de caos.
La profetas es la flori de la Via
e la orijin de folia.
Donce, la person noble abita en la funda pesosa,
e no en la diminui de la fini.
El abita en la fruta,
e no en la flori de espresa.
Donce, el rejeta la un e aseta la otra.

39

Ave los en edas antica ci ia posese la un;
Par posese de la un, la sielo ia es clarida;
Par posese de la un, la tera ia es stablida;
Par posese de la un, la dios ia ave potia spiritual;
Par posese de la un, la vales ia es plenida;
Par posese de la un, tota cosas ia vive e crese;
Par posese de la un, la prinses e duxes
ia deveni la noblida de la popla.
– esta es como cada ia deveni tal.
Sin claria, la sielo ta secute;
Sin stablia, la tera ta trema;
Sin potia spirital, la dios ta desintegra;
Sin es plenida, la vales ta fesuri;
Sin la potia de vive, tota cosas ta mori;
Sin la potia de noblia, la prinses e duxes ta tropeza.
Donce, la nobles depende de la popla umil per suporta,
e la altida depende de la basa per se funda.
Esta es la razona per cual la prinses e duxes nomi se mesma
“la orfanida”, “la solitar”, “la nonmeritante”.
Esce lo no vera, cuando los depende de la popla umil per suporta?
Vera, sutrae la partes de un caron,
e no caron resta.
En loca de tintina como la jada,
ronca como la rocas.

40

Reversa es la ata de la Via.
Jentilia es la rol de la Via.
Tota cosas de esta mundo veni de esiste,
e esiste veni de nonesiste.

41

Cuando la umanas plu alta oia de la Via,
los atenta forte vive en acorda con lo.
Cuando la umanas media oia de la Via.
los apare consensa de lo, ma ance nonconsensa de lo.
Cuando la umanas plu basa oia de la Via,
los comensa ria forte.
– Si nun ta ria a lo, lo no ta es la Via.
Donce, ave la dise antica:
“El ci comprende la Via pare nonagu en comprende;
El ci avansa en la Via pare lisca a retro;
El ci move sur la Via nivel pare vade a su e a supra.”
Virtua superior pare como un vale vacua;
Blanca pur pare osidida;
Virtua grande pare debil;
Valua pur par contaminada.
Spasia grande no ave cantos;
Talento grande prende tempo per matura;
Musica grande es cuieta oiada;
Forma grande no ave un contorno;
E la Via es escondeda e sin nom.
Esta es la Via cual ave la capas de presta se potia
e trae completi.

42

De la Via, un nase;
De un, du nase;
De du, tre nase;
De tre, la universo es creada.
La universo creada porta la yin sur se dorso
e la yang a se peto;
Tra la unia de la prinsipes permeante
lo ateni armonia.
Umanas odia la plu la “orfani”, la “solitar”, la “nonvaluada”.
Ma la prinses e duxes nomi se mesma par tal nomes.
Car a alga veses, cosas benefica par la sutrae,
e sufri par la ajunta.
Otras ia ensenia esta diseda,
cual me ensenia ance:
“La person violente va mori violente”.
Esta me regarda como me ensenior spirital.

43

La materia la plu mol en la mundo
vade tra la plu dur.
Lo sin forma penetra lo sin fesur;
Par esta, me sabe la benefica de no ata.
La ensenia sin parolas
e la benefica de no ata
es noncomparable en la universo.

44

Fama o tu mesma, cual tu ama plu?
Tu mesma o benes material, cual ave plu valua?
Perde de tu mesma o posese de benes, cual es la plu mal?
Donce: El ci ama la plu spende la plu;
El ci cumula multe perde multe.
La person contendeda encontra no desonora;
El ci sabe cuando el debe para no core a peril –
El pote dura longa.

45

La perfetia la plu alta es como nonperfetia,
e se usa es nunca descapasida.
La abunda la plu grande pare nonsufisinte,
e se usa va fali nunca.
Lo cual es la plu direta pare enganosa,
la capasia la plu grande pare torpe;
La bonparla la plu grande pare como balbuta.
Move vinse fria,
ma manteni calma vinse calda.
El ci es calma e cuieta deveni la gida per la universo.

46

Cuando la mundo vive en acorda con la Via,
cavalos de corsa es reduida a trae caros de dejetada.
Cuando la mundo no vvie en acorda con la Via,
cavalores abunda en la campania.
Ave no maldise plu ca la asenta de contente.
Ave no peca plu grande ca la desira per posese.
Donce, el ci es contente con contente
va es sempre contente.

47

Sin vade estra se portes,
on pote conose cual aveni en la mundo;
Sin regarda estra se fenestras,
on pote vide la Via de la sielo.
La plu distante on xasa sabia,
la min on sabe.
Donce, la saja sabe sin core,
comprende sin vide,
ateni sin ata.

48

La studiante de sabia intende aprende un dia pos un otra;
La studiante de la Via intende perde un dia pos un otra.
Par perde continuante
on ateni nonativia.
El ci concista la mundo fa lo comun par no ata.
Cuando on debe ata,
la mundo es ja ultra concista.

49

La saja no ave emosias e opinas firma,
ma vide la emosias e opinas de la popla como se propre.
La bon, me declara bon;
La mal, me declara ance bon;
Esta es la bonia de virtua.
La onesta, me crede;
La mentores, me ance crede;
Esta es la fide de virtua.
La saja abita pasosa e armoniosa en la mundo.
La popla de la mundo es traeda en un comunia de cor,
e la saja vide los como se enfantes propre.

50

De vive, moria entra.
La organos de vive es de-tre;
La organos de moria es ance des-tre.
Lo cual envia un umana a moria en esta vive es ance esta des-tre.
Como?
Par la ativia intensa de vive multiplinte.
Ia es diseda ce on ci es un bon conservor de se vive
no encontra tigres o bufalos savaje a tera,
e no es atacable par armas en la campa de batalia.
La cornos de la bufalo savaje no ave potia contra el.
Per ce?
Car el es ultra moria.

51

La Via pari los,
virtua (te) aleva los.
La mundo material dona la forma a los.
La avenis de la momento completi los.
Donce, tota cosas de la universo adora la Via e alti virtua.
La Via es adorada e virtua es altida
sin la comanda la cualcun, ma par se acorda propre.
Donce, la Via pari los,
virtua aleva los,
fa ce los crese, ce los developa,
dona un porto a los, un loca per abita en pas,
nuri los e refuja los.
Lo pari los ma no posese los,
aida ma no propri los,
es superior ma no controla los.
– Esta es la virtua mistica.

52

Ia ave un comensa de la universo
cual pote es videda como la madre de la universo.
De la madre, nos pote conose se fios.
Pos conose la fios, resta con la madre.
Tal la tu vide completa ta es protejeda de feri.
Tapi se abris,
clui se portes,
e la tu vide completa ta es sin labora.
Abri se abris,
freta con se consernas,
e la tu vide completa ta es ultra salva.
El ci pote vide la peti ave vide clar;
El ci manteni jentilia es forte.
Usa la lus,
e reveni a vide clar –
e no causa angusa per tu mesma.
– Esta es como on reposa en la asoluta.

53

Si me ta posese sabia sever,
pasea sur la Via xef,
me ta evita la ruetas peti.
La Via xef es fasil per pasea,
ma umanas ama la ruetas peti.
La cortes ofisial es limpa e sin manxa,
en cuando la campos no es cultivada,
e la granerias de la popla es poca plenida.
Ma vestida en robas brodeda,
e portante spadas bela,
sasiada con comeda bon e bevidas,
Los es fendeda par ricias e poseses.
– Esta condui la mundo a banditia.
Esce esta no la mali de la Via?

54

El ci es fundida firma no es fasil turbada.
El ci ave un teni firma no relasa fasil.
De un jenera a un otra, se sacrifas per se asendentes
va continua sin fali.
Cultivada en la individua, virtua va deveni sinsera;
Cultivada en la familia, virtua va deveni abundante;
Cultivada en la vila, virtua va multipli;
Cultivada en la stato, virtua va rici;
Cultivada en la mundo, virtua va deveni universal.
Donce:
Seguente la virtua de la individua,
judi la individua;
Seguente la virtua de la familia,
judi la familia;
Seguente la virtua de la vila,
judi la vila;
Seguente la virtua de la stato,
judi la stato;
Seguente la virtua de la mundo,
judi la mundo.
Como me sabe ce esta es vera?
Par esta.

55

El ci es rica en virtua
es como un enfante.
No insetos venenosa pica el,
no animales savaje ataca el,
e no avias xasante salta a el.
Se osos e se ligamentos es mol, ma se teni es forte.
Sin sabe la uni de mas e fema, se organos es completa,
cual indica ce se enerjia no es malida.
Cria tra la dia, se vos deveni nunca roncin,
cual indica ce se armonia natural es perfeta.
Si on sabe armonia, on acorda con la eterna,
e la sabia de eternia es nomida persepinte.
Ma la atenta per boni la vive es nomida un indica mal;
La desprende de emosias par instinto es nomida sertia.
Car cosas veia pos ateni maturia,
Esta sertia ta es contra la Via.
E el ci es contra la Via mori cuando ancora joven.

56

El ci sabe no parla;
El ci parla no sabe.
Tapi se abris,
clui se portes,
desagu se agu,
deslia se maranias,
moli se lus,
sumerje se turba.
– Esta es la uni mistica.
Alora, ama e odi no pote toca el.
Profita e perde no pote estende a el.
Onora e desonora no afeta el.
Donce, el es sempre la onorada de la mundo.

57

Governa la rena par la norma.
Combata un batalia par la taticas de surprende.
Gania la mundo par fa no cosa.
Como me sabe ce esta es vera?
Plu proibis,
e la popla deveni plu povre.
Armas plu agu,
e la caos en la stato deveni plu grande,
Plu capasia tecnica,
e plu cosas astuta es produida.
Plu leges,
e la cuantia de furores e banditos deveni plu grande.
Donce, la saja dise:
Me fa no cosa, e la popla es reformida par se mesma.
Me ama calmia, e la popla deveni virtuosa par se mesma.
Me no condui comersa, e la popla deveni rica par se mesma.
Me no ave desira, e la popla deveni simple
e onesta par se mesma.

58

Cuando la governa es pigra e nonagu,
se popla es nonmalida;
Cuando la governa es capas e intelijente,
se popla es noncontente.
Desastre es la strada de fortuna,
e fortuna es la asconde de desastre.
Ci pote sabe se resultas ultima?
Como lo es, lo va es nunca la normal.
Ma la normal ta reversa direta a la mentosa.
E la bon ta reversa a la malvolente.
En esta modo, umania ia diverte longa!
Donce, la saja ave prinsipes firma,
ma no taliante;
El ave solidia, ma no feri otras;
El es direta, ma no dominante,
luminosa ma no siecinte.

59

En la manaje de consernas umana, no ave un regula plu bon
ca es moderada.
Par es moderada, on pote retarda;
Par retarda, on pote es preparada e fortida;
Par es preparada e fortida, on pote es sempre vinsente;
Pare es sempre vinsente, on pote ave capasia infinita;
E el ci ave capasia infinita pote rena un nasion,
e la madre de un nasion renante pote dura longa.
En esta modo, on es radisida firma e ave fortia profunda;
Esta es la via a nonmortalia e la vide durante.

60

Rena un nasion grande como on ta frita un pes peti.
El ci rena la mundo en acorda con la Via
va trova ce la spiritos perde se potia.
Ma no es ce la spiritos perde se potia,
ma ce los sesa feri la popla.
Es no sola ce los sesa feri la popla,
ma la saja mesma no feri ance la popla.
Cuando ambos no feri la un la otra,
alora virtua orijinal es restorada.

61

Un nasion grande debe es como la paises basa de un delta,
como la entra de la mundo,
la fema de la mundo.
La fema vinse la mas par calmia,
a ateni la loca basa par calmia.
Donce, si un nasion grande pone se mesma su un nasion peti,
el ta asorbe la nasion peti.
E si un nasion peti pone se mesma su un nasion grande,
el ta asorbe la nasion grande.
Donce, alga persones pone se mesma per asorbe otras,
e alga persones es natural basa e asorbe otras.
Lo cual un nasion grande desira es no plu ca refuja otras,
e lo cual un nasion peti desira es no plu ca
entra e es refujada.
Donce, afin ambos pote reseta cual se desira,
un nasion grande debe pone se mesma a basa.

62

La Via es la secreta misteriosa de la universo,
la tesor de la bon person,
e la refuja de la mal person.
Dises bela pote es vendeda a la mercato,
la condui noble pote es presentada como un donada.
An ce ave mal persones,
per ce rejeta los?
Donce, a la coroni de un imperor,
o a la asinia de la tre ministros,
en loca de envia tribuis de jada e ecipos de cavalos,
envia en la tribui de la Via.
Per ce la anticas valua esta Via?
Esce los no dise “per xerca la culpable e pardona los”?
Per esta razona, la Via es la tesor de la mundo.

63

Ateni nonativia.
Atende a nonconsernas.
Proba la cosas sin sabor.
Si lo es grande o peti, multe o poca,
responde a odi con virtua.
Trata con la difisil en cuando lo es ancora fasil;
Trata con la grande en cuando lo es ancora peti.
La problemes difisil de la mundo
debe es solveda en cuando los es ancora fasil;
La problemes grande de la mundo
debe es solveda en cuando los es ancora peti.
Donce, la saja, par trata nunca con problemes grande,
ateni grandia.
El ci promete rapida
va trova comun como manteni se fide es difisil.
El ci regarda tota cosas como nonimportante
va encontra multe la difisiles.
Donce, an la saja regarda cosas como difisil,
e per esta razona encontra nunca la difisiles

64

Lo cual reposa cuieta es fasil tenida;
Lo cual no es ja evidente es fasil prevenida;
Lo cual es frajil como jelo fonde fasil;
Lo cual es pico sperde fasil.
Trata con un cosa ante cuando el es asi;
Para desordina ante cuando el es vasta.
Un arbor con un largia vasta comensa como un jerme peti;
Un teraza de nove niveles comensa con un masa de tera.
Un viaja de mil milias comensa a se pedes.
El ci ata, mali;
El ci saisi, perde.
Car la saja no ata, el no mali;
Car el no saisi, el no pede.
La consernas de umanas es comun malida entre un unia
de completa.
Par cura a la fini como a la comensa,
la fali es evitada.
Donce, la saja desira ave no desira,
e no valua ojetos cual es difisl per oteni.
El aprende lo cual es desaprendeda,
e restora lo cual la multe ia perde;
Afin el pote asiste en la curso de natur
e no suposa ce el ta interfere.

65

La antica ia sabe como segue la Via.
Los no intende lumina la popla,
ma manteni los nonsabente.
La razona ce la vive pasosa es difisil per la popla
es car los ave tro multe sabe.
Los ci vole rena un nasion par sabe
es la maldise de la nasion.
Los ci no vole rena un nasion par sabe
es la bondise de la nasion.
Los ci sabe esta du prinsipes
sabe ance la model antica,
e sabe sempre ce la model antica
es nomida la virtua mistica.
Cuando la virtua mistica deveni clar e vasta,
e cosa reveni a se fonte,
alora e sola alora la armonia grande emerji.

66

Como la rios grande e la mares deveni la seniores
de la caniones?
Par esele en resta a basa.
Esta es como los deveni la seniores de la caniones.
Donce, per deveni xef entra la popla,
on debe parla como se inferiores.
Per deveni la prima entra la popla,
on debe pasea pos los.
En esta modo la saja resta a supra,
e la popla no senti se pesia;
e el pasea a ante,
e la popla no desira ce el es ferida.
Donce, la popla de la mundo es felis per alti el sempre.
Car el no luta,
nun en la mundo pote luta contra el.

67

Tota la mundo dise ce la me instrui sembla fol.
Car lo es grande, donce lo sembla fol.
Si lo no sembla fol,
Lo ta deveni peti en la pasada distante!
Me ave tre tesores;
Garda los e manteni los secur:
La prima es ama.
du es, fa nunca tro multe.
tre es, es nunca la prima en la mundo.
Par ama, on no teme;
Par no fa tro multe, on reteni multe potia;
Par no suposa ce on es la prima en la mundo,
on pote developa se talento e permete ce lo maturi.
Si on abanda ama e coraje,
si on abanda restrinje e potia reservada,
si on abanda la segue a pos e on freta a ante,
on es ruinada!
Car ama es vinsente cuando lo ataca,
e es nonatacable cuando lo defende.
La sielo enarma con ama
los ci lo vole vide destruida.

68

La soldato corajosa no es violente;
La bon combator no perde la controla de se tempera;
La concistor grande no luta per casos peti;
La bon dirijor pone se mesma su otras.
– Esta es la virtua de nonluta,
cual es nomida la capasia de dirije,
cual es la estende a la altia de sposi con la sielo,
con lo cual es de edas antica.

69

Ave un diseda de stratejistes militar;
Me no osa es la prima ci invade, ma prefere es invadeda.
Me no osa presa a ante par un unia, ma prefere retira un pede.
Cual es per dise: Marxa sin formas,
rola la manxas a alta,
no ataca frontal,
arma sin armas.
Ave un desastre no plu grande ca suestima la enemi.
Par suestima la enemi, on pote perde la tesores.
Donce, cuando du armadas egal encontra la un la otra,
La person de tristia vinse.

70

La me instruis es multe fasil aprendeda
e multe fasil pratica,
ma nun pote comprende los e
nun pote pratica los.
En la me parolas, ave un prinsipe.
En la consernas de umanas, ave un sistem.
Car los no sabe los,
los no sabe me ance.
Car ave poca ci sabe me,
donce me es distinguida.
Donce, la saja porta un tela ru a supra
e porta jada en se peto.

71

El ci sabe ce el no sabe es la plu alta;
El ci finje ce el sabe ce el no sabe ave un mente malada.
E el ci reconose esta mente malada como mente malada
no ave un mente malada.
La saja no ave un mente malada.
Car el reconose mente malada como mente malada,
donce el no ave un mente malada.

72

Cuando la popla no teme la usa de fortia,
alora fortia grande desende a los.
No despeta se abitas,
no odi se projenia.
Car tu no odi los,
tu mesma no ta es odida.
Donce, la saja sabe se mesme, ma no mostra se mesma,
ama se mesma, ma no alti se mesma.
Donce, el rejeta fortia e
aseta jentilia.

73

On mata el ci es corajosa en osia,
om permete el vive ci es corajosa en no osia.
En esta du,
ave alga vantaje e alga nonvantaje.
An si la sielo odi alga persones,
ci ta conose ci ta es matada e per ce?
Donce, an la sajia regarda lo como un demanda difisil.
La Via de la sielo es bon a vinse con luta,
a recompense sin parolas,
a apare sin es clamada,
ateni resultas sin desinias clar.
La rede de la sielo es vasta e larga.
Lo ave abris grande, ma no permete ce cualce cosa evade.

74

La popla no teme moria;
Per ce menasa los con moria?
Suposa ce la popla
ta teme moria,
e ce on pote saisa e mata la turbosa.
Ci osa fa tal?
Aveni comun ce la esecutor es matada.
Si on prende la loca de la esecutor
es como maneja la axeta per la mestre de carpenta.
El ci atenta maneja la axeta per la mestre de carpenta
evita rara la feri de se manos.

75

Cuando la popla es fama,
es car se renores come tro multe gran de imposta.
Donce, la turba de un popla fama
es causada par la interfere de se renores.
Esta es la razona per cual los es turbosa.
La popla no teme moria,
car los zelosa per gania la susta.
Esta es la razona per cual los no teme moria.
Los ci no interfere con se gania de la susta
es saja en alti la vive.

76

Cuando un person nase, el es mol e debil;
A se mori, el es dur e rijida.
Cuando cosas e plantas vive, los es mol e flexable;
Cuando los es mor, los es frajil e seca.
Dnce, duria e rijidia es la acompaniores de mor,
e molia e jentilia es la acompaniores de vive.
Donce, cuando un armada es ostinosa, el va perde la batalia.
Cuando un arbor es du, el va es cortida.
La grande e fortia parteni a su.
La jentil e debil parteni a supra.

77

La Via de la sielo,
esce lo no como la flexa de un arco?
La alta vade a su e la basa vade a supra,
la longia es cortida, la largia es estendeda.
La Via de la sielo prende de los ci ave tro multe
e dona a los ci no ave sufisinte.
La via de umanas no es como esta:
El prende de los ci no ave sufisinte
e dona como tribui a los ci ave tro multe.
Ci ave sufisinte e plu per dona a la mundo completa?
Sola la person de la Via.
Donce, la saja ata, ma no posese,
Ateni ma no reclama la onor,
car el no desira pare superior.

78

Ave no cosa plu debil ce acua,
ma no cosa es plu bon per vinse la dur;
On no pote sustitui.
Debilia vinse fortia,
jentilia vinse rijidia;
Nun no sabe,
nun pote reali.
Donce, la saja dise:
“El ci reseta la malacusa de la mundo a se mesma
es la conservor de la stato.
El ci carga la petas de la mundo a se mesma
es la renor de la mundo.”
Parolas direta pare vagante.

79

Cuando on repara un odi grande, serta alga odi resta.
Como esta pote es regardada como sasiante?
Donce, la saja teni la conta de la sinistra,
e no pone la culpablia a la otra partito.
La om virtuosa prefere repara la culpablia.
Ma “la Via de la sielo no es partisan;
lo prefere sola la bon person.”

80

Ta ce ave un nasion peti con un cuantia peti de popla,
do la furni de benes es des veses o sento veses
plu ce los pote usa.
Permete ce la popla valua se vives e no migra a distante.
An si ave barcos e caros,
ave nun per monti los.
An si ave armur e armas,
ave no acaso per mostra los.
Permete ce la popla lia cordas ancora per conta,
permete ce los gusta se comes,
beli se vestes,
es sasiada con se casas,
deleta en se costumes.
La colonias prosima supravide la un la otra
e pote oia la abaia de la canes
e la cucurucu de la gales de se visinas,
e la popla, a la fini de se vive, vade nunca
esta se pais propre.

81

Parolas vera no sona bela;
Parolas cual sona bela no es vera.
Un bon person no disputa;
El ci disputa no es un bon person.
La saja no sabe multe cosas;
El ci sabe multe cosas no es saja.
La saja no cumula per se mesma.
El vive per otras,
e deveni rica se mesma;
El dona a otras,
e ave un abunda plu grande.
La Via de la sielo
bondise, ma no feri.
La Via de la saja
Ateni, ma no luta.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 9 setembre 2023 (18:43 UTC).