LA ISTORIA DE PSICOLOJIA

Teorias de metafisica

Metafisica es la ramo de filosofia cual esamina la composa de la universo e demanda “de cual la mundo – incluinte nos – es composada?” e “cual es la sustantia ultima?”

Lo es posible ce on ta suposa ce esta es plu interesante per un fisiciste ca un psicolojiste. Fisica, vera, deriva sua nom de la parola elinica physis, cual sinifia “sustantia ultima”. Ma per psicolojia, un de la problemes durante es la relata entre la mente e la corpo. Esce la mente, per esemplo, es sola un ativia de la serebro, como multe suposa? O esce lo es plu ca acel? Esta es un de la problemes cual psicolojia ia erita de relijio en ajunta de filosofia: On pote simil demanda sur la esiste separada de la spirito e sua relata a mente e corpo. Psyche es, natural, la parola elinica per spirito!

Per un varia de razonas, filosofistes ta gusta jeneral si materia e spirito, o corpo e mente, ta es esata un sustantia ultima – un idea nomida monisme. Lo es un caso de sua ama de simplia. Ma la problem es: cual? On ave du competores major per la titulo:

Materialisme dise ce la universo es completa composada de materia. Materia, per filosofistes, inclui enerjia e cualce cosa en la sinifia fisical. Alga filosofistes de Elas antica, per esemplo, ia crede ce tota la mundo (incluinte nos) es composada de acua. Otras ia crede ce lo es foco. Otras ia crede ce la universo es composada de particulas nonvidable cual no ia es creada e no pote es destruida, nomida atomes. Oji, fisicistes (e cimicistes, e biolojistes, e la plu de psicolojistes) ia acorda con lunlotra sur esplicas plu complicada, ma cual es ancora esensal la realia fisical.

(Un nota: per favore recorda ce “materialisme” no refere asi a la ama de cosas material como ricas!)

Idealisme es la otra competor per la titulo. Idealisme dise ce la universo es composada de la spirital o mental, a cual on refere como idea o ideal. Ance la elinicas antica ia ave ideas variosa en relata a la forma spesifada de idea cual composa la universo. Algas ia dise ce la mundo intera es no plu ca la sonia de Dio (como alga filosofistes induiste ta dise ance). Otras ia vide lo como un tipo de “forsa de vive”. Ancora otras ia vide lo como la perfetia su la mundo nonperfeta cual nos persepi. Idealistes moderna parla de un universo de spiritos personal, o un mundo de cualias.

(Denova, un nota: “idealisme” no refere asi a condui par prinsipes alta!)

An si lo pote pare ce materialisme es la responde clar la plu bon, esta es plu la resulta de cultur, e no de filosofia. La majoria de filosofistes ia es idealistes, car idealisme es alga plu razonada ca materialisme! Si on toca alga cosa, on senti resiste, caldia o fria. On pote bateta lo e oia sonas, ole lo o leca lo (si on desira vera), etc. On esperia multe avenis mental, ma nunca materia intera solitar! Ma ideas – on nesesa sola ave un pensa, e on esperia lo como autoevidente.

(Nos va reveni pronto a alga plu tipos de monisme.)

La alternativa tipal de monisme es nomida dualisme. Lo es no plu ca un modo de dise ce on ave, en fato, du sustantias diferente en esta universo: la material e la ideal. Per psicolojia, esta es la idea ce la mente (o spirito) e la corpo es egal real, e ce ambos no pote es reduida a la otra.

Aora, esta pare como la solve evidente de la dilema. Ma on ave un problem filosofial multe seria: Si on ave du sustantias diferente en la universo, como los pote posible interata? Como la spirito (o mente), cual es suposada sin masa o estende, causa ce la corpo ata? E como la avenis esperiada par la corpo cambia en alga modo de avenis fisical a alga cosa mental?

Pensa sur lo per un momento. On dise fasil ce, cuando nos vide un poma roja, la ondas de lus causa reatas cimical en la retina, cual causa ce la neurones ensende, cual causa ce neurotransmetadores viaja ultra la sinapses, cual envia la siniales neuronal a plu e plu profonda en la serebro, de cual sua ativia es la cosa cual nos nomi “vide la poma roja”. Ma lo no importa como multe detalias on furni: tota esta ativia fisical es convertida a no punto a la esperia de un poma roja!

Simil, si me ave un pensa cual dise “me va lansa la poma a tua testa”, tu ave, sin duta, ativia neuronal cual es traduida a ativia musculal, traduida a la vola de la poma. Ma cuando, do, e como la pensa ia deveni un ativia neuronal? Algas refere a esta problem como la problem de mente-corpo. Otras nomi lo la fantasma en la macina.

Descartes, en ajunta a sua rol como la padre de filosofia moderna, ia usa sua tempo libre ance per promove la idea de la reflexe. En sua eda, macinas idraulical ia es la cosa popular – spesial, fontes con carateres movente. Descartes ia sujesta simple ce viventes es macinas simil (no diferente ca nos, cuando nos sujesta ce la serebro es no plu ca un computador acuosa).

Ma Descartes ia es ance un bon catolica, ci ia crede ce nos ave un spirito nonmortal. Como acel spirito pote influe la corpo, o la corpo influe la spirito, resta un misterio. Descartes ia suposa ce, posible, la glande pineal (a alga sentimetres pos tua oios) es la lia cual permete la “spiritos animal” cual viaja tra la nervos e causa la move de nosa musculos. Un mal suposa.

La tipo de dualisme cual Descartes ia proposa es nomida interatisme: On ave du sustantias, los interata, me no sabe como. E esta, natural, es min ca sasiante. Donce otra filosofistes ia dona sua opinas. Un prete franses nomida Nicholas Malebranche ia sujesta ce lo es Dio ci interveni e causa ce nos esperia pensas cuando cosas aveni a nosa corpos, e causa ce nosa corpos ata cuando nos vole lo. Car esta interatas aveni en tota de nos, a miliones de veses a cada dia, Dio debe es multe ocupada. Ma Dio es Dio, donce lo es clar un posible. Esta tipo de dualisme es nomida oportunisme.

Un otra esplica ia es furnida par la jenio deutx Leibniz. El ia sujesta ce, en loca de ce Dio interveni a biliones de veses a cada dia, el ia pote inisia la universo intera a vade longo du vias coordinada, un material e un spirital. Lo es simil a cuando on inisia du orolojos – un orolojo antica con un pendulo e la otra un orolojo eletrical dijital – per manteni la mesma tempo, an si los ave du aparatos diferente e ave no contata con lunlotra. Dio ia pote fa la mesma con la corpo e la spirito. Esta es nomida paralelisme. An si nos pote trova ce esta esplica es alga strana, lo no es un mal esplica.

Ma filosofistes (e psicolojistes) desira sabe plu serta ca fida. Donce, la xerca per un solve ia continua. Posible la atentas per solve esta problem en la Lumina ia veni de la fabricor de lentes Benedict Spinoza. Sua teoria es nomida aspetisme duple. Lo es un monisme cual pare como un dualisme: La mente e la corpo, el ia dise, es du lados de un “sentim”, cual es la sustantia vera ultima de la universo.

Donce, si un roca colpa tu sur la fronte, la avenis fisical cual aveni en tua testo ave un otra lado a los, cual es la dole cual tu esperia. E la pensa cual tu ia ave per leva tua mano per toca la contusa ave ance un otra lado, cual es la ata fisical de lo. Problem solveda!

Ma posible no. Si on dise ce la universo intera ave du lados, on debe inclui no sola la mente e la corpo. Spinoza ia crede ce Dio es lo cual nos nomi la lado mental de la universo, e natur es lo cual nos nomi la lado fisical. Dio es la mente de natur, e natur es la corpo de Dio! Esta es nomida panteisme. En la eda en cual Spinoza ia vive, esta ia es nomida ateisme, e ia es la razona clar, en la plu de paises, per un foco de festa, con la ateiste como la invitada spesial.

An si on gusta la idea de panteisme, on debe recorda ce lo implica ance panpsicisme – tota ave du lados: Animales e plantas e rocas ave pensas e spiritos; ma on no pote ave un spirito en sielo cual no es firma liada a un corpo. Rocas pensante e no spiritos en sielo es ideas difisil per la plu de persones.

Multe plu tarda, William James, “la padre de psicolojia american” e la filosofiste american la plu bon en sua tempo libre, ia inventa lo cual es nomida monisme neutra. El ia sujesta ce Spinoza ia es cuasi coreta, ma no completa. La fisical es la sola sustantia ultimam, videda de un perspetiva, e la mental o spirital es la mesma sustantia videda de un otra perspetiva. La sustantia ultima es alga cosa diferente, alga cosa neutra. Esta permete ce nos dise ce alga cosas pote es videda sola como fisical, e otras sola como mental, e otras como ambos.

La problem cual resta es la demanda con cual nos ia comensa: Cual alora es la sustantia ultima? Un sujesta resente es informa. Esta no vade tro distante de materialisme, es popular con la promove de inteleto artifis e con psicolojia cognisial. Un otra sujesta es plu simil a idealisme, e es nomida realisme de cualia.

James ia ave ance un otra idea, nomida pluralisme. Vera, dualisme es un pluralisme. Ma el ia sujesta ce on ave multe plu ca du “sustantias ultima”. On ave materia e mente, serta, ma on ave ance matematica e lojica (esce los es fisical o mental?), e spasio e tempo (los es cual?). An materia pote es divideda entre materia mesma, enerjia, gravita, etc. E la mental inclui pensas, persepis, imajina, emosias, vole, eleje, etc. Alga de estas pote interata (materia e enerjia, per esemplo, como en E=mc²). Otras no pote interata con cualce otra cosa. La problem? Aora nos ave sentos o an miles de sustantias ultima cual nos debe reconsilia, en loca de du.

Posible la metafisica la plu popular entre rexercores en psicolojia (en contrasta con terapistes) es nomida epifenomenalisme. Esta sujesta ce, an si materialisme es clar la modo la plu produosa en la siensas, lo es ance no dutable ce nosa vive interna es ance real. Donce, la epifenomenalistes dise, ta ce nos aseta ce on ave alga cosa nomida mente cual nos ancora no comprende intera, ma ta ce nos dise ance ce la mente es no plu ca un produi coaveninte de la serebro, simil como caldia es un produi coaveninte de la opera de un motor: si nos ta ave la capasia de desinia un motor perfeta, tota enerjia ta tradui a move en loca de caldia. Donce, si nos ta sabe completa la serebro, nos no ta nesesa plu la conseta de mente. Lo es serta un forma de materialisme, ma en un forma plu umil.

Alora, la problem resta. “Como esta ismes relata a psicolojia comun?” tu pote demanda. Oce: pensa sur cualce cosa incluida en psicolojia – ama, coleria, persepi, dementia, psicofarmacolojia… Cual es depresa? Esce lo es un problem de persepi o emosia? O esce lo es un problem de la dispone de seratonina? Esce nos debe usa drogas per cambia persones ci ave tal problemes? O esce maladias mental es alga cosa cual esije ce nos aida los a cambia sua perspetivas sur sua vives? Si lo es un combina de la du, como nos pote sabe cuanto de la problem es la un o la otra? Esce lo es la mesma per cadun? La problem de mente-corpo resta, vera a la cor de psicolojia.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).