La filosofia cual ia domina ultima la rexerca en psicolojia en la dui prima de la sentenio de 1900 ia es nomida positivisme lojical. Esta filosofia ia comensa con la encontras de filosofistes e fisicistes en Wien e Berlin en la desenio de 1920. La nomes cual es plu asosiada con positivisme lojical es Moritz Schlick (la fundor) e Rudolph Carnap.
La idea fundal de positivisme lojical es ce tota sabe es fundida sur oserva empirical, aidada par la usa atendente de lojica e matematica. La metodo ideal en siensa es la proba de ipoteses. En fato, cualce declara teorial ave sinifia sola si lo pote es empirical probada. Esta idea es nomida la prinsipe de serti.
Lo sinifia en la scema plu grande ce tota declaras metafisical (e, natural, teolojial) es sin sinifia. La sola usa de filosofia, seguente la positivistes lojical, es la investiga de la sinifia de declaras siensal. Tra tempo, positivisme lojical ia domina la pensa de la plu de siensistes en fisica e cimica, e multe en biolojia e psicolojia. La conduistes ia adota la plu zelosa lo, e multe de los ia porta lo con se cuando los ia move a la psicolojia cognisial.
Ma en la dui du de la sentenio de 1900, un filosofia nova, nomida posmodernisme, ia veni con alga criticas potiosa de positivisme lojical e tota filosofia moderna. La nomes la plu bon conoseda cual on asosia con posmodernisme es Michel Foucault e Jacques Derrida.
Posmodernisme ia comensa en arciteta, cuando alga arcitetores joven en la tarda de la sentenio de 1900 ia rebela contra lo cual sua enseniores ia dise a los sur la modos “coreta” e “noncoreta” per desinia construidas. Sua enseniores a acel tempo ia es, per la plu, modernistes, ci ia gusta linias direta e formas jeometrial, como nos vide en multe rascasielos. Donce, la rebelores ia nomi se posmodernistes. Ante, la asentua ia es a manteni esta o acel filosofia arcitetal, esta o acel stilo. La posmodernistes ia dise ce on pote rompe la regulas! Misca la stilos! Jua con spasio! Nega gravita, si tu vole!
(Nota: La construidas posmoderniste es la plu fasil trovable en Europa, spesial en Nederland e Txesco. La construis moderniste es la plu fasil trovable en la sites de la SUA.)
En filosofia, modernisme refere a la filosofia cual ia comensa con la Lumina. Alora, filosofistes ia xerca un Veria singular, monolitin. Ma, comensante con la seticisme de Hume e la filosofia critical de Kant, filosofistes ia deveni plu consensa de la limitas de filosofia. An comun ascondeda par la popularia de ideas como la asolutisme de Hegel e la positivisme de Comte, esta linia de pensa setica o critical ia continua tra la sentenio de 1800 asta la perspetivisme de Nietzsche e la praticalisme de William James.
La idea fundal de posmodernisme es ce la realia ojetal o veria ultima, a cual nos pote ave asede direta, no esiste. Veria es un caso de perspetiva o punto-de-vista. Cada individua construi sua propre comprende de realia, e nun es capas de evade sua perspetiva.
En la curso de istoria, alga construis de realia ia es vantajida, pd: suportada par un elite potiosa – omes rica de Europa e la SUA, en un esemplo comun. Otra construis ia es supresada. Esemplos de construis supresada inclui la puntos de vista de femes, la povres, e cultures nonueste.
Tota ia es videda tra “oculos” – sosial, cultural, an individua. An siensa! Thomas Kuhn, un filosofiste de siensa, ia indica ce siensa es un conserna desordinada, plen de influes personal, cultural, an political. “Veria” es cualce cosa diseda par la siensistes ci ave la autoria a presente – a min asta cuando esta situa deveni inondada par contradises. Alora un “revolui siensal” – un desloca de modeles aveni, e la xerca comensa denova.
La util major de posmodernisme es nomida “desconstrui”. Desconstrui es la mostra ce alga sistem de pensa es ultima noncompleta o nonrazonante an par sua propre ideas e razona interna. Lo es como un varia estendeda de “redui a asurdia” – critica de la interna a estra.
Par desconstrui alga de nosa filosofias, istorias, leteratures, e siensa tradisional, posmodernisme causa ce nos deveni consensa de la prejudis cual nos no pote vide fasil car los es tro prosima a nos, tro parteninte a nos. Esta ia es la taxe, per esemplo, de femisme.
Femisme ia comensa como un clama per atende plu seria femes. Per miles de anios, la vives de femes ia es videda como no plu ca un nota basa su los de omes, e nos debe aora atende femes como temas de interesa seria e como pensores nondependente. Sola resente, per esemplo, algas ia descovre ce Maria Anna Mozart, la sore de Mozart, ia es ance un musiciste e composor multe talentosa. Ma, cuando el ia ateni la eda cuando sposi ia es espetada, el no ia pote continua sua consertas e composa. La rol de femes alora ia es sposi e produi enfantes. Mozart ia adora sua sore, e el ia loda sua jenio a multe veses, ma… la rol de femes ia es asetada par cuasi tota membros de sua sosia como “natur” e “la vole de dio”.
Femistes dise ce, si on es un filosofiste (o artiste, o istoriste, o siensiste) mas, on es nonconsensa prejudida en esta modo. Si on desira boni sua sabe de nosa mundo, on nesesa ave ance la perspetiva fema. Estas es puntos multe bon!
Un otra promove posmoderniste es multiculturalisme. On razona ce pensores de la mundo ueste es nonconsensa prejudida par sua suposas cultural, strutures sosial, e istorias. Tra multe anios, per esemplo, on ia ave un tende de vide europeanes e sua desendentes como “normal”, e otra poplas e sivilias como inferior o deviante en alga modo.
Oji, la plu de siensistes sosial es consensa de la perspetivas de otra cultures, e ia esamina sua propre prejudis. Siensa sosial ia bonveni jeneral la contribuis de un cuantia sempre estendente de siensistes de orijina nonueste.
Un otra prejudi es lo cual veni de clase sosial. Asta resente, la plu de siensistes e profesores ia es membros de la clases alta, con poca compati per, e multe min comprende de, la clase de povres laborante. An oji, nos debe demanda de nos mesma, per ci nos labora como siensistes? Plu frecuente, lo es per instituidas, academial o corporada. Nos fa, consensa o no, lo cual nosa seniores demanda de nos!
Nonfortunosa, algas sujesta ce la vista en la clases basa de sosia es plu bon ca la vista en la altas. Simil, alga femistes sujesta ce la perspetiva fema es esensal plu bon ca la perspetiva mas. Esta opinas iniora la posible ce omes pote vinse sua prejudis, e la posible ce alga femes pote es egal prejudida. Nos trova la mesma tende entre suportores de otra filosofias critical. Lo no es vera nesesada ce, si un teoria es clar european, lo era, o ce, si lo es nonueste, lo es perfeta. E an algun ci rexerca per corporas multinasional pote, a veses, es coreta. (Oce, probable no.)
A la otra lado, no tota perspetivas es egal valuosa. Astrolojia e frenolojia es cisa perspetivas sur personalia, ma los es, en fato, clar noncoreta. La esplicas de condui umana par xamanes, an si multe interesante e importante per studia, es no plu probable coreta ca la esplicas de la pensores temprana european.
Desconstruisme e filosofias posmoderniste jeneral tende es filosofias negativa. Los critica, ma no ofre comun alternativas. Sua razona comun ave suporta minima empirical, o an pensa razonante. Nota ce los critica nosa capasia de es empirical o razonante!
Prima, tradisionalistes ia es impresada e ia deveni interesada a reconose sua limitas. Omes, en ajunta a femes, ia deveni femistes, europeanes e esuanes e otras ia abrasa multiculturisme. La plu ia bonveni la varia de perspetivas.
Ma ultima, algas ia nota: Si tota veria es relativa (en la mesma modo como si tota moralia es relativa), alora femisme, multiculturalisme, etc, es esensal no plu vera o valuable ca masisme (comun nomida “sesisme”) o eurosentrisme, etc. Si nos no pote judi cual es o no es vera, como nos pote progresa? Como nos pote boni nos mesma e nosa sosias cuando “progresa” es sola en la oios de la regardor?
Si nos crede ce tota perspetivas es egal valida, alora la sola cosa cual leva un perspetiva supra cualce otra, como Nietzsche ia nota, es potia. Si filosofia e siensa es reduida a lutas de potia entre “autorias”, alora nos ia vade a retro a do nos ia comensa, a 17 febrero 1600, cuando la eglesa ia arde Giordano Bruno a pira.
Donce, cuando nos ia deveni plu consensa (e resta consensa!) de nosa limitas e prejudis, an consensa de la limitas de empiricalisme e razonalisme mesma, nos debe ancora reveni a empiricalisme e razonalisme, como la sola modos en cual nos pote a la min prosimi a veria, posible como la sola modo en cual nos pote survive como un spesie. Nos debe aprende la lesones de posmodernisme, e revade pos acel a nosa laboras!
Alora: do nos es oji, en la anios prima de un milenio nova?
La teorias de Freud es lenta desaparente. Sua intuis ia es asorbeda en un psicolojia clinical jeneral cual es dominada par praticas umaniste fundida plu sur Carl Rogers ca sur Sigmund Freud. La scola de relatas de ojetos atenta resta con Freud, ma lo no es multe plu ca un reconose tarda de ideas umaniste reconstruida en la lingua de psicoanalise. La psicolojia de Jung es ance desaparente. Jung continua en la studia de mitos e simbolisme e en la popularia strana de la categorias de Myers e Briggs. Adler, a la otra lado, ia es “redescovreda” e sua intuis ia es integrada en psicolojia umaniste e esistentialiste. La mesma pote es notada per “neo-adlerianes” como Karen Horney e Erich Fromm.
Sensa e persepi, la sujetos de la plu de la fundores de psicolojia como un siensa, reseta min atende tra la anios. La psicolojia de gestaltes ia es asorbeda en la corente dominante, e ia perde sua rol como un teoria separada. Sua du enfantes, psicolojia clinica umaniste e la campo de psicolojia sosial es, natural, vivente e sana.
Psicolojia sosial ia deveni un misca de consernas umaniste e rexerca esperimental multe inventosa. Nonfortunosa, lo ia rejeta sua radises fenomenolojiste, e on ave poca teori coerente o programes de rexerca per la futur. La plu de psicolojia sosial es composada de proba ipoteses intuida e no interliada.
Otra campos, como psicolojia de personalia e de developa, ia segue la mesma model como psicolojia sosial. Personalia tende es restrinjeda a rexerca cuantial, per la plu sur diferes entre individuas o grupos. La model xef es la crea de esaminas par analise de fatores, an si analise de fatores es un metodolojia debil cual pote relata plu a semantica ca a construis con referes psicolojial real.
Psicolojia de developa ia deveni plu e plu la studia de aplicas, spesial en relata con educa e la eleva de enfantes. Un avansa es a la considera de la vive intera, de nase a mori. Esta cambia ave ance lias a areas aplicada, como la problem sosial de un popla cresente vea.
Fenomenolojia como un metodo ia deveni un parte de un promove plu jeneral nomida metodos cualial. Esta metodos ia deveni popular en alga campos, spesial educa e curoria, e en alga perspetivas, como femisme e multiculturalisme. Triste, la metodos no es sempre bon usada. Los es par natur multe plu afetable par prejudi, e multe de la rexerca no es multe plu ca esplora.
Esistentialisme ia fusa con umanisme, a veses contribuinte sua profondia filosofial, a otra veses ajuntante sola sua jergo confusante. Alga umanistes ia vaga a en la campo de psicolojia transpersonal, cual investiga cosas como states noncomun de consensia e esperias spirital. An si on ave rexerca cual es valuosa asi, la plu de esta es un forma de misticisme de la “eda nova”, desemblada como un siensa psicolojial.
Conduisme, simil a psicolojia de gestaltes, ia es asorbeda en la psicolojia de la corente dominante. Studiantes continua memori la modeles de condisiona de Pavlov e Skinner, ma on comprende plu e plu ce estas no es multe usosa per studia la condui de umanas. Vera, sola Tolman e Bandura ia ave un efeto durante. La conduiste seria move a la studia de prosedes fisiolojial.
Psicolojia cognisial ia deveni deludente. Lo ia comensa con la laboras de Neisser, e la influe de la studia de inteleto artifis, ma lo pare ce Neisser e la rexercores de “IA” ia abandona la program. Neisser ia pensa ce psicolojia cognisial ia iniora realia e ia deveni un tipo de jua inteletal. Rexercores de IA ia trova ce on no nesesa modeli la prosedes de cognisio umana per esede la funsiona de umanas. Cuando la computador “Deep Blue” ia vinse Garry Kasparov, la mestre grande de xace, la loca secur de umanas a la apico de la creadas ia pare es finida.
Un resulta ladal de psicolojia cognisial es un interesa nova a tal problemes tradisional de filosofia como la natur de consensia. Car lo es comun videda como la demanda psicolojial “ultima”, lo ia jenera alga stimula a conferes. Ma la “problem ultima” no debe es un problem: lo es sola un problem si on insiste, contra tota razona, resta como un materialiste!
La parte la plu ativa de psicolojia oji es psicolojia fisiolojial. Prima, la progresa stonante en mapa an la serebro vivente e funsionante, par la tecnolojia de CT, PET, e MRI, va resulta pronto un imaje cuasi completa de la sircuitos de la serebro. Du, la descovre de drogas nova efetosa cual opera a la sinapse ia revolui psicolojia clinical. E tre, la completi de la mapa de la jenom umana es la eraldo de la comensa de un comprende multe plu completa de la lias entre jenetica e condui. A la otra lado, psicolojistes fisiolojial es plu e plu identifiante se con sua colaborores biolojial e medical, e distantinte se de la lado “plu mol” de psicolojia. Ambos va regrete esta.
Relatada a la developas en psicolojia fisiolojia es la efeto de sosiobiolojia sur teoria psicolojial. Frecuente nomida psicolojia evolual (los no difere), esta opina ia produi un cuantia sinifiante de ipoteses interesante sur la orijinas de condui umana e la esiste de instintos cual limita, o defini an, nosa natures. Nonfortunosa, sosiobiolojia ia ofre poca ipoteses demostrable (o la demostras no ia es “validida” par esperimentalistes).
A esta momento, psicolojia es fratida, con un divide multe grande entre la psicolojia umaniste e aplicada e un psicolojia biolojia multe reduiste. Lo cual nos nesesa es un teoria uninte, un cual evita la estremas fasil. Esta teoria debe es informada par la critica posmoderniste, ma debe ultima fundi se sur un empiricalisme vasta e un razonalisme sever. Lo ia es prosimida en la pasada: William James ia fa lo en la desenio de 1890; Gardner Murphy ia fa lo en la desenio de 1950. Lo pare ce psicolojistes no ia es preparada per reconose la implica intera de sua laboras e la laboras de otras. Posible nos va es preparada cuando un teoria jeneral apare a la ves seguente.
En la entretempo, la studia de la istoria de psicolojia e sua radises en filosofia, medica, e otra campos de studia pote ave un loca importante en nosa educas: Par regarda cosas de la perspetiva grande de istoria, e de la “aspeta de eternia” cual nos reseta par studia filosofia, posible nos va ave progresa en psicolojia plu temprana e no plu tarda.
Asta revide en la futur!
— George Boeree
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).