En la dui du de la sentenio de 1900, la ariva de la computador e la modo de pensa asosiada con lo ia gida a un orienta nova per psicolojia, nomida la promove cognisial. Multes espera ce esta va deveni la model – la teoria uninte – cual nos espeta. Lo es tro temprana per dise, ma la importa de psicolojia cognisial no pote es negada.
La radises de esta promove es multe variada: Lo inclui la psicolojia de gestaltes, conduisme, e an umanisme: Lo ia asorbe la ideas de E. C. Tolman, Albert Bandura, e George Kelly; lo inclui pensores de linguistica, neurosiensa, filosofia, e injenia; lo envolve spesialistes en tecnolojia de informatica e la campo de inteleto artifis. On pote comensa par regarda tre teoristes de prosede de informa la plu famosa: Norbert Wiener, Alan Turing, e Ludwig von Bertalanffy.
Norbert Wiener ia nase a 26 novembre 1897 en Columbia, Missouri. Sua padre ia es un profesor de linguas slavica ci ia desira no cosa plu ca ce sua fio ta es un jenio. Fortunosa, Norbert ia pote reali la desira. El ia leje cuando el ave 3 anios, ia comensa liseo con 9 anios, ia gradua con 11, ia reseta sua diploma laural con 14 e sua mestral de Harvard con 17, e la dotoral pos un plu anio en 1913, con un tese sur lojica matematical. Norbert ia es miope, ansiosa, torpe, nonsecur, e nonsosial – ma cadun ia gusta el, an tal.
Pos gradua, el ia vade a Cambridge per studia su la filosofiste grande Bertrand Russell, e alora a la Universia de Göttingen per studia su la matematiciste famosa David Hilbert. Cuando el ia reveni a la SUA, el ia instrui a Columbia, Harvard, e la Universia de Maine, ia spende un anio como scrivor per la Ensiclopedia Americana, un otra anio como un jornaliste per la Boston Herald, e (an si el ia es un pasiste) ia labora como un matematiciste per la armada.
Final, en 1919, el ia deveni un profesor de matematica a MIT, do el ia resta asta 1960. El ia sposi Margaret Engmann en 1926, e los ia ave du fias.
El ia comensa par studia la move de particulas e fisica cuantal, cual ia gida el a developa un interesa a la transmete de informa e tecnicas de controla. En labora sur estas, el ia crea la terma “sibernetica” (cybernetics en engles) de la parola elinica per “pilote”, per refere a cualce sistem cual ia es construida con tecnicas de coreti integrada. Conveninte, el ia labora sur aparatos de controla per la militar en la Gera Mundal Du.
En 1948, el ia publici Sibernetica: o controla e comunica en la animal e la macina. En esta libro, el ia populari termas como “enflue”, “esflue”, e “renuri” (input, output, e feedback en engles).
Plu tarda, en 1964, el ia publici la libro God and Golem, Inc. (“Dio e golem, corporada” – un golem ia es un om de arjila mitolojial) cual es ia sutitulida “un comenta sur alga puntos do sibernetica intrui sur relijio”. El ia es consernada ce, a alga tempo, la macinas va pasa nos, sua creores. En la mesma anio, el ia gania la Medalia Nasional de Siensa. Pos alga plu semanas, a 18 marto, el ia mori en Stockholm, Sveria.
La idea de renuri es multe vea, e es indicetada en la obras de Aristotele. Lo ia comensa deveni denova notada en la sentenio de 1700, en la forma de “la mano nonvidable”, un idea introduida par Adam Smith en La ricia de nasiones, cual algas vide como la radis de teoria de controla e teoria de juas. Renuri es un idea simple: On renuri un sistem con sua esflue como un enflue nova, per altera la prosede. Per esemplo, omeostase (la prinsipe de la termostato) es un forma de renuri negativa: lo deveni fria en la casa, cual stimula la termostato, cual ensende la fornon. La sala deveni plu calda, e a un temperatur fisada, la termostato descomuta la fornon. Alora, lo deveni ancora tro fria, e la sircuito recomensa. La gol de un tal sistem es ecuilibra, ma en realia, lo es un prosede osilante o “xasante”.
Renuri positiva aveni cuando la esflue comanda la sistem a produi an plu de alga cosa. An si la parola “positiva” fa ce lo pare como un bon cosa, si lo no es suportada par renuri negativa, lo tende vade a ruina! Un esemplo de renuri positiva es bolas economial, cuando la valua de alga cosa crese (como tulpas en Nederland de la sentenio de 1600, o la dotcomes resente), cadun compra plu de la produi, e la custas crese, atraente plu investores, asta final la intera colasa. Un otra esemplo es sangui: Si on sangui grave, la cor pompi plu forte, cual causa plu sangui, etc. Per esta razona, on debe para la sangui, tan rapida como posible!
An si Wiener no ia “inventa” renuri, el ia es la person prima ci ia reconose la importa grande de la idea.
Alan Turing ia nase a 23 junio 1912 en Paddington, London, la enfante du de Julius Mathison Turing e Ethel Sara Stoney. Sua jenitores ia encontra lunlotra cuando sua padre e la padre de sua madre ia es servinte en Madras, India, como parte de la Servis Sivil. El e sua frate ia es elevada en la casas de otra persones en cuando sua jenitores ia continua sua vive en India.
Un punto de cambia en sua vive ia aveni cuando sua ami la plu bon a la scola a Sherborne, Christopher Morcom, ia mori en 1930. Esta ia causa ce el pensa sur la natur de esiste e esce lo fini cuando on mori.
El ia vade a King’s College a Cambridge en 1931, do el ia leje libros par von Neumann, Russell e Whitehead, Gödel, etc. El ia es envolveda en la promove pasiste a Cambridge, ance deveninte plu comfortable con sua omosesalia. El ia reseta sua diploma en 1934, e ia resta ala con un donada per rexerca en 1935.
La Macina de Turing – sua descrive prima de lo cual ia deveni la computador moderna – ia es introduida en un paper en 1936, pos cual el ia parti a Princeton en la SUA. Ala, el ia reseta sua diploma dotoral en 1938, e ia reveni a King’s College, vivente sur sua donada per rexerca.
El ia comensa labora con la departes de securia brites sur la analise de la codigo Enigma de la nazis par construi macinas per solve sifras. En 1944, el ia sujesta prima la idea de “construi un serebro”.
Un nota a lado: Turing ia es un coror tra campania, e ia veni prosima a core per Britan en la Olimpiales de 1948.
En 1944, el ia deveni la sudirijor per la laboreria de computa a la Universia de Manchester, do on ia es atentante construi la computador vera prima. En 1950, el ia publici un paper Macinas computante e intelijentia en la jornal Mind. Turing ia vide la serebro umana como un “macina nonordinada” cual aprende tra esperia.
Nonfortunosa, el ia es arestada e litigada en 1952 per omosesalia. El no ia furni un defende, ma ia aseta un ofre de evita prison si el ta aseta injetas de estrojen per basi sua libido suposada iperativa. El ia perde ance sua autoria de securia como un resulta de sua omosesalia.
El ia comensa rexerca sur la formi de motifes en biolojia – lo cual nos nomi aora la matematica de fratales – e sur mecanica cuantal. Ma a 7 junio 1954, el ia suiside par come sianido, e ia fa ce lo pare como un asidente per salva la sentis de sua madre. El ia ave 41 anios.
Oji, el es videda como la padre de la siensa de computadores (pd: informatica). Andrew Hodges, la biografiste e Turing, ia descrive la Macina de Turing:[¹]
Sua labora ia introdui un conseta de importa pratical enorme: la idea de la Macina Universal de Turing. La conseta de “la Macina de Turing” es como lo de “la formula” o “la egali”; on ave un cuantia infinita de macinas de Turing posible, de cual cada coresponde a un “metodo definida” o “algoritmo” diferente. Ma imajina, como Turing, ce cada algoritmo spesifada es scriveda como un colie de instruis en un forma normal. Alora la labora de interprete la instruis e prosede los es mesma un prosede mecanical, e donce pote mesma es corpida en un macina de Turing spesifada, pd: la macina universal de Turing. Un macina universal de Turing pote es cargada per fa lo cual cualce otra macina de Turing spesifada pote fa, par furni lo con la forma normal cual descrive acel macina de Turing. Un macina, per tota taxes.
Lo es difisil aora ce on no pensa a un macina de Turing como un program per un computador, e la taxe mecanical de interprete e obedi la program como lo cual la computador mesma fa. Donce, la Macina Universal de Turing corpi la prinsipe esensal de la computador: un macina cual pote es ajustada per cualce taxe bon descriveda par es furnida con la program conveninte.
En ajunta, la Macina Universal de Turing astrata esplota natural lo cual on ia vide plu tarda como la conseta de la “program reservada” esensal a la computador moderna: lo corpi la intuida esensal de la sentenio 20 ce simboles cual representa instruis es no diferente en tipo ca simboles cual representa cuantias. Ma computadores, en esta sinifia moderna, no ia esiste en 1936. Turing ia crea esta consetas par sua imajina matematical. Pos sola nove anios, tecnolojia eletronical ia es atentada e sufisinte probada ce on ia pote pratical transfere la lojica de sua ideas a injenia real. Entretempo, la idea ia vive sola en sua mente.
Ludwig von Bertalanffy ia nase prosima a Wien a 19 setembre 1901. En 1918, el ia vade a la Universia de Innsbruck, e plu tarda ia transfere se a la Universia de Wien, do el ia studia la istoria de arte, filosofia, e biolojia. El ia reseta sua diploma dotoral en 1926, con un tese sur Gustav Fechner.
En 1928, el ia publici Teorias moderna de developa, do el ia introdui la demanda esce nos pote esplica biolojia en termas pur fisical. El ia sujesta ce nos pote fa lo, si nos pote vide viventes como posesente un dinamica autoorganizante.
En 1937, el ia vade a la Universia de Chicago, do el ia dona sua leson prima sur la Teoria de Sistemes Jeneral, cual el ia vide como un metodolojia per tota siensas. En 1939, el ia deveni un profesor a la Universia de Wien e ia continua sua rexerca sur la fisiolojia comparante de crese. El ia resoma sua obras en Problemes de vive, publicida en 1940.
En 1949, el ia migra a Canada, do el ia comensa rexerca sur canser. Pronto, el ia move a la ramo psicolojia cognisial, do el ia introdui un epistemolojia oliste cual el ia contrasta con conduisme.
En 1960, el ia deveni un profesor de biolojia teorial en la departe de zolojia e psicolojia a la Universia de Alberta. En 1967, el ia scrive Robotes, umanas, e mentes, e en 1968, el ia scrive Teoria de sistemes jeneral.
Ludwig von Bertalanffy ia mori de un ataca de cor a 12 junio 1972.
A un ves pasada, lo ia es posible ce un individua briliante – un Aristotele o un da Vinci – sabe tota ce sua cultur ofre. Nos refere ancora a veses a persones ci ave un sabe spesial vasta como “umanas de la Renase”. Ma esta no es vera posible aora, car on ave tro multe informa en la mundo. Cadun deveni un spesialiste. Esta situa no es tota mal; ma lo sinifia ce la siensas variosa (e la artes e siensas umana ance) tende deveni isolida. Un idea nova en un campo resta en acel campo, an si lo ta crea cisa un revolui en un otra campo. La tempo final en cual nos ia vide un transfere major de un siensa a otras ia es cuando Darwin ia introdui la teoria de evolui, cual ia es segueda par la adota la idea en multe otra campos (pe: la developa de enfantes, la progresa de sivilias, la relatas internasional, etc), an si noncoreta en multe casos (pe: darwinisme sosial).
La Teoria de Sistemes Jeneral ia es un proposa per un modo matematical e lojical per espresa ideas en lo cual nos nomi comfortosa aora sistemes. Bertalanffy ia crede ce esta es la sola modo en cual nos pote uni la siensas, incluinte biolojia, istoria, sosiolojia, e an psicolojia, e abri la porte a un tipo nova de siensiste ci es un jeneraliste en loca de un spesialiste. Esta jeneraliste, par usa esta modeles de sistemes comun, ta es capas de transfere intuis de un campo a un otra.
Bertalanffy ia prende consetas de sibernetica, informatica, la teoria de juas, la teoria de desides, topolojia, analise de fatores, injenia de sistemes, rexerca de operas, injenia umana, etc, e ia perfeti la “scema de flue” (en engles: flow chart) cual nos aseta sin comenta oji. Sua inova la plu importante ia es la idea de un sistem abrida – un sistem en la contesto de un sistem plu grande. Esta ia permete ce on aplica la teoria de sistemes a animales en ambientes, per esemplo, o a persones en sua contestos sosiocultural. Plu spesifada, la idea de la sistem abrida ia dona un legalia siensal e un vive nova a la metafor vea de sosias-como-organisme.
En ajunta a la enflue de la rexercores de “inteleto artifis”, on ia ave un enflue de un grupo de siensistes en campos variosa ci ia regarda se como struturalistes – no aliante se con Wundt, ma interesada sur la strutur de sua sujetos variosa. On pote nomi los “neostruturalistes”, per manteni la distingui. Per esemplo, on ave Claude Levi-Strauss, la antropolojiste franses, ci ia analise la strutures de relatas familial e de la naras de mitolojia de cultures noneuropean. Ma la plu famosa es la linguiste Noam Chomsky.
Avram Noam Chomsky ia nase a 7 desembre 1928 en Philadelphia, la fio de William Chomsky e Elsie Simonofsky. La padre ia es un esperta ivri, e Noam ia deveni tan bon en acel campo ce el ia pote edita la manoscritos de sua padre ja cuando el ia es en liseo. Noam ia es ance pasionosa sur politica, spesial cuando lo ia conserna la potensia per un stato de Israel.
El ia reseta sua diploma laural de la Universia de Pennsylvania en 1949, e ia sposi un otra linguiste, Carol Schatz. Los ia ave tre enfantes. El ia reseta sua diploma dotoral en 1955, ance de la Universia de Pennsylvania.
En la mesma anio, el ia comensa instrui a MIT e ia comensa sua rexerca sur gramatica jenerante. Gramatica jenerante ia es fundida sur la demanda “como nos pote crea frases nova cual no ia es produida a ante?” Como, en otra parolas, nos ia deveni tan creosa, tan jenerante? En considera esta demandas, el ia refamiliari se con lojica matematical, la psicolojia de pensa, e teorias sur macinas pensante. El ia trova, a la otra lado, ce el es multe criticante de linguistica tradisional e psicolojia conduiste.
En 1957, el ia publici sua libro prima, Strutures sintatical. En ajunta a sua gramatica jenerante, el ia introdui ance la idea de un capasia inata de aprende linguas. Chomsky ia sujesta ce nos ave, en nosa mentes a nase, un “gramatica universal”, preparada per asorbe la detalias de cualce lingua presentada a nos a un eda joven.
Sua libro ia parla sur strutures surfasal e strutures profonda e la regulas de muta cual governa la relatas entre los. La strutur surfasal es esensal la lingua como nos sabe lo, linguas spesifada, con regulas de fonetica e gramatica spesifada. La strutur profonda es plu astrata, a la nivel de sinifias e la gramatica universal.
En la desenio de 1960, Chomsky ia deveni un de la criticores la plu forte de la Gera de Vietnam, e ia scrive Potia american e la mandarines nova, un critica de la prosedes de deside par la governa. El es ancora a MIT, e el continua produi articles e libros sur linguistica – e politica.
Un otra neostruturaliste es Jean Piaget. Orijinal un biolojiste, el es aora plu recordada per sua obras sur la developa de cognisio. Multe persones sujesta ce el, plu ca cualce otra, es la creor de psicolojia cognisial. Si mera la mundo cual parla engles ia ta aprende alga franses, esta ta es vera, sin duta. Nonfortunosa, sua obras ia es introduida en engles sola pos 1950, e ia deveni bon conoseda sola en la desenio de 1960, xef par psicolojistes de developa.
Jean Piaget ia nase en Neuchâtel, Suiz, a 9 agosto 1896. Sua padre, Arthur Piaget, ia es un profesor de leteratur medieval con un interesa a istorial local. Sua madre, Rebecca Jackson, ia es intelijente e enerjiosa, ma Jean ia trova el como alga neurosica – un idea cual, el ia dise, ia gida el a sua interesa a psicolojia, ma a via de patolojia. La enfante la plu vea, el ia es multe autonom e ia deveni interesada temprana a natur, spesial a la colie de concas. El ia publici sua “paper” prima cuando el ia ave 10 anios: un reporta de un paje sur sua vide de un pasaro albino.
El ia comensa publici seria en liseo sur sua sujeto favoreda, moluscos. El ia es spesial plaseda par gania emplea de tempo partal con la dirijor de la Museo de Istoria Natural de Neuchâtel, senior Godel. Sua labora ia deveni bon conoseda entre studiantes european de moluscos, ci ia suposa ce el es un adulte. Tota de esta esperia temprana con siensa ia preveni el, el ia dise, de encontra “la demon de filosofia”.
Plu tarda en adolese, el ia fasa un crise peti de fida: Corajida par sua madre a atende instruis relijiosa, el ia trova la ideas de relijio como enfantin. Par studia filosofistes variosa e aplica lojica, el ia dedica se a trova un “esplica biolojial de sabe”. Ultima, filosofia ia fali aida el en sua xerca, donce el ia vade a psicolojia.
Pos liseo, el ia vade a la Universia de Neuchâtel. Constante studiante e scrivente, el ia deveni debil e ia debe spende un anio en la montanias per recovre sua sania. Cuando el ia reveni a Neuchâtel, el ia deside ce el va scrive sua filosofia. Un punto fundal ia deveni sentral per sua laboras intera: “En tota campos de vive (organica, mental, sosial), on ave ‘interas’ distinguida par la cualia de sua partes, e forsante a los un organiza.” Esta prinsipe ia formi la funda de sua filosofia struturaliste, en la mesma modo como per la gestaltistes, teoristes de sistemes, e multe otras.
En 1918, Piaget ia reseta sua diploma dotoral en siensa de la Universia de Neuchâtel. El ia labora per un anio a laborerias en Zurich e a la clinica famosa de psiciatria de Bleuler. En esta periodo, el ia es introduida a la obras de Freud, Jung, e otras. En 1919, el ia ensenia psicolojia e filosofia a la Sorbonne en Paris. Asi, el ia encontra Simon (como en la scala “Simon–Binet” de intelijentia) e ia rexerca la esamina de intelijentia. El no ia gusta la stilo de “coreta o no” de la esaminas, e ia comensa intervisa sua sujetos a un scola per xicos en loca, usante la tecnicas de intervisa psiciatriste cual el ia aprende en la anio pasada. En otra parolas, el ia comensa demanda como enfantes razona.
En 1921, sua article prima sur la psicolojia de intelijentia ia es publicida en Journal de Psychologie. En la mesma anio, el ia aseta un posto a la Institut J. J. Rousseau en Geneve. Asi, el ia comensa rexerca con sua studiantes la razona de enfantes en scola prima. Esta rexerca ia deveni sua sinco libros prima sur psicolojia de enfantes. An si el ia vide esta labora como multe comensal, el ia es surprendeda par la reata positiva par sua lejores jeneral.
En 1923, el ia sposi un de sua colaborores studiante, Valentine Chatenay. En 1925, sua fia prima ia nase; en 1927, la fia du ia nase; e en 1931, sua fio ia nase. Los ia deveni pronto la foca de oserva intensa par Piaget e sua sposa. Esta rexerca ia deveni tre plu libros.
En 1929, Piaget ia comensa un emplea como la dirijor de la Ofisia Internasional de Educa, en colabora con UNESCO. El ia comensa ance un rexerca grande con A. Szeminska, E. Meyer, e spesial Barbel Inhelder, ci ia deveni sua colaboror major. Alga de esta labora no ia estende a la mundo estra Suiz asta la fini de la Gera Mundal Du.
En 1940, el ia deveni la xef de Psicolojia Esperimental, la dirijor de la laboreria psicolojial, e la presidente de la Sosia Suiz de Psicolojia. En 1942, el ia presenta un serie de lesones a la Collège de France, cuando Frans ia es ocupada par la nazis. Esta lesones ia deveni La psicolojia de intelijentia. A la fini de la gera, el ia es elejeda como presidente de la comite suiz de UNESCO.
En 1949 e 1950, el ia publici sua sintese Introdui a epistemolojia jenetical. En 1952, el ia deveni un profesor a la Sorbonne. En 1955, el ia crea la Sentro Internasional per Epistemolojia Jenetical. En 1956, el ia crea la Scola de Siensas a la Universia de Geneve.
El ia continua labora sur un teoria jeneral de strutures e lia sua laboras psicolojial a biolojia tra multe plu anios. Simil, el ia continua sua servi publica en UNESCO. A la fini de sua carera, el ia scrive plu ca 60 libros e sentos de articles. El ia mori en Geneve, a 16 setembre 1980, como un de la psicolojistes la plu importante de la sentenio de 1900.
Jean Piaget ia comensa sua carera como un biolojiste – spesifada, un moluscolojiste. Ma sua interesa a siensa e la istoria de siensa ia pasa pronto sua interesa a caracoles e bivalvos. En esamina plu profonda la prosedes de pensa en siensa, el ia deveni interesada a la natur de pensa mesma, spesial a la developa de pensa. Trovante poca rexerca, el ia ave la oportun per dona a lo un eticeta: “epistemolojia jenetical”, cual sinifia la developa de aprende.
El ia nota, per esemplo, ce an bebes ave alga capasias en relata con la ojetos en sua ambiente. Esta capasias es serta simple, capasias sensorimotor, ma los dirije la modo en cual la bebe esplora sua ambiente e gania alora plu sabes de la mundo, e capasias de esplora plu sofisticada. El ia nomi esta capasias “scemas”.
Per esemplo, un bebe sabe prende sua jueta favoreda e pone lo en sua boca. El ave acel scema bon en sua mente. Cuando el vide un otra ojeto – pe: la orolojo de sua padre – el pote transfere fasil sua scema de “prende e pone” a la ojeto nova. Esta es nomida (en franses) assimilation, la “asorbe” de un ojeto nova a un scema vea.
Cuando nosa bebe vide un otra ojeto denova – posible un bal per la plaia – el va atenta aplica sua scema vea de prende e pone. Natural, esta opera mal con la ojeto nova – lo es multe tro grande per pone en sua boca! Posible, en esta esemplo, un otra scema ta opera plu bon, como “presa e besa”. Esta es (en franses) accommodation, la altera de un scema vea a un ojeto nova.
Asorbe e altera es du lados de aprende. Piaget ia vide ajusta como multe plu vasta ca la tipo de aprende sur cual la conduistes ia parla. El ia vide lo como un prosede fundal biolojial. Tota viventes ajusta se, an los sin un sistem de nervos o un serebro.
Asorbe e altera opera como un pendulo per avansa nosa comprende de nosa mundo e nosa capasia en lo. Seguente Piaget, los es dirijeda a un ecuilibra entre la strutur de la mente e la ambiente, a un acorda entre la du, cual ta indica ce on ave un model bon (o sufisinte bon) de la universo. El ia nomi esta state ideal “ecuilibra”.
Continuante sua investiga de enfantes, el ia nota ce on ave periodos en cual la asorbe domina, periodos en cual la altera domina, e periodos de ecuilibra relativa, e ce esta periodos es simil, par sua natur e tempos de aveni, entre tota la enfantes ci el ia studia. E tal el ia developa la idea de fases de developa cognisial. Estas es un contribui durante a psicolojia.
Tre otra psicolojistes ia ave roles importante en la developa de psicolojia cognisial. Los es Donald Hebb, George Miller, e Ulric Neisser. On pote serta ajunta otras, ma esta tre es esensal.
Donald Olding Hebb ia nase en 1908 en Chester, Nova Scotia. El ia gradua de la Universia de Dalhousie en 1925, e ia atenta comensa un carera como un noveliste. Esta ia resulta ce el ia deveni un dirijor de un scola en Quebec.
El ia comensa como un studiante graduada a la Universia de McGill en Montreal. Asi, el ia deveni rapida desiludeda par conduisme e ia vade a la obras de Wolfgang Köhler e Karl Lashley. Colaborante con Lashley sur persepi en ratas, el ia reseta sua diploma dotoral de Harvard en 1936.
El ia reseta suporta finansial per rexerca con Wilder Penfield a la Instituida Neurolojial de Montreal, do sua rexerca ia nota ce lesiones grande en la serebro ave frecuente efetos minima a la persepi, pensa, o condui de un person.
Pos move a Universia Queens, el ia rexerca la esamina de intelijentia de animales e umanas. El ia nota ce la ambiente ave un rol multe plu importante en intelijentia ca on suposa jeneral.
En 1942, el ia colabora con Lashley denova, a esta ves a la Laboreria Yerkes sur la Biolojia de Primates. Alora, el ia reveni a McGill como un profesor de psicolojia, e ia deveni la xef de la departe en 1948.
En la anio seguente, el ia publici sua libro la plu famosa, La organiza de condui: Un teoria neuropsicolojial. Esta ia es bon resetada e ia fa ce McGill deveni un sentro per neuropsicolojia.
On pote resoma la fundas de sua teoria par defini tre de sua termas. Prima, on ave la sinapse de Hebb: La ensende de un neuron causa creses o cambias metabolal a la sinapse cual aumenta la efetosia de acel sinapse en la futur. Esta es comun nomida la teoria de solidi, e es oji la esplica la plu asetada per aprende neuronal.
Du, on ave la asembla de selulas de Hebb: Grupos de neurones pote es tan interliada ce, cuando ativia comensa, lo va persiste longo pos la fini de la stimula orijinal. Oji, los es nomida redes neuronal.
E tre, on ave la serie de fase. Pensa es lo cual aveni cuando series complicada de esta asemblas de selulas es ativida.
Hebb ia sujesta umil ce sua teoria es no plu ca un varia nova de la teoria de redes (“neuro-connectivism” en engles). Esta es la idea fundal su la plu de modeles de funsiona neurolojial. On debe nota ance ce el ia es presidente de ambos APA (Asosia de Psicolojia American) e CPA (Asosia de Psicolojia Canadian). Donald Hebb ia mori en 1985.
George Miller ia nase en 1920, e ia comensa sua carera en universia como un studiante de parla e engles. En 1941, el ia reseta sua diploma mestral en parla de la Universia de Alabama. En 1946, el ia reseta sua diploma dotoral de Harvard e ia comensa studia psicolinguistica.
En 1951, el ia publici sua libro prima, Lingua e comunica. En lo, el ia razona ce la tradision de conduisme no sufisi per la taxe de esplica lingua.
El ia scrive sua paper la plu famosa en 1956: La numero majial sete, plu o min du: Alga limitas en nosa capasia de prosede informa. En esta, el ia sujesta ce la memoria de dura corta pote conteni sola sirca sete informas: sete parolas, sete numeros, sete imajes, etc. Esta es ancora asetada como coreta.
En 1960, Miller ia fundi la Sentro per Studias Cognisial a Harvard con Jerome Bruner, psicolojiste famosa de developa cognisial. En la mesma anio, el ia publici Programes e la strutur de condui (con Eugene Galanter e Karl Pribram, 1960), cual resoma sua conseta de psicolojia cognisial. Los ia usa la computador como sua model de aprende umana, e ia usa analojas como la prosede de informa, la codigi e la retrae. Miller ia sujesta defini psicolojia como la studia de mente, como on ia defini lo ante cuando la conduistes ia redefini lo como la studia de condui.
George Miller ia servi como la presidente de APA en 1969, e ia reseta la Medalia Nasional de Siensa en 1991. El ia mori en 2012.
Ulric Neisser ia nase en 1928 en Kiel, Deutxland, e ia migra con sua familia a la SUA cuando el ia ave 3 anios.
El ia studia fisica a Harvard ante cambia a psicolojia. Cuando ala, el ia es influeda par la obras de Koffka e par George Miller. En 1950, el ia reseta sua diploma laural, e en 1956, sua diploma dotoral. A esta punto, el ia es un conduiste, cual es fundal lo cual cuasi cadun ia es alora.
Sua posto de instrui prima ia es a Brandeis, do Abraham Maslow ia es la xef de la departe. Asi el ia es corajida per continua sua interesa a cognisio. En 1967, el ia scrive la libro cual ia marca la comensa ofisial de psicolojia cognisial, conveninte nomida Psicolojia cognisial.
Plu tarda, en 1976, el ia scrive Cognisio e realia, en cual el ia comensa espresa sua nonsasia con la model linial de psicolojia cognisial a acel tempo, e la depende esedente de esperimenta en loca de situas de vive real. Tra tempo, el ia deveni un criticor forte de psicolojia cognisial, e ia move en la dirije de la psicolojia ambiente de sua ami, J. J. Gibson.
El ia continua a la Universia de Cornell, do sua interesas de rexerca ia inclui memoria, spesial memoria per avenis en vive e en situas natural, intelijentia (spesial, la diferes en resultas individual e entre grupos), la sinifia sosial de la esaminas de intelijentia, e consetas de la se (spesial, como fundida sur autopersepi). Sua obras la plu resente inclui La curva levante: Ganias de tempo longa en intelijentia proportial e mesuras relatada (1998) e, con L. K. Libby, Recorda esperias de vive (en E. Tulving e F. I. M. Craik, La manual Oxford de memoria, 2000).
Lo no es posible ce on predise esce psicolojia cognisial va mostra se como la psicolojia de la futur. Vera, an alga de sua suportores major ave sua dutas. Psicolojia cognisial es filosofial multe plu sofisticada ca conduisme. Ma lo no ave tan multe sofistica cuando on compara lo con esistentialisme fenomenolojial. A la otra lado, lo ave la vantaje enorme de es liada con la tecnolojia cual developa la plu rapida – la computador. Ma poca persones vide la computador como un bon model per umanas – en alga modos an min bon como la rata blanca, cual ia es vivente, a la min!
[¹] Sitada de Alan Turing – un biografia corta par Andrew Hodges.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).