Roma ia es fundida sirca 500 aec. Ante 200 aec, lo ia rena la parte la plu grande de Italia, e en 150 aec, lo ia concista Cartago, la potia la plu grande de la Mediteraneo este asta alora. A acel tempo, sola tre sites ia ave un popla de plu ca 100 000: Antacia, Alexandria, e Roma. Ja ante 44 aec, Roma ia rena tota de los.
Cuando Julio Cesar ia es asasinada en 44 aec (simil como Shakespeare ia descrive!), la Republica Roman enerjiosa ia es finida. Sua eritor adotada, ci ia nomi se Augusto Cesar, ia deveni la imperor prima. La Impero Roman ia ateni sua estende la plu grande en 116, su la rena de imperor Trajan.
La mentes la plu bon de Roma ia es asorbeda par politica, gera, e economia. Poca ia ave la luso de filosofia astrata. Plu, la elinicas ia fa ancora lo – e vide como esta ia avansa los: Multe filosofistes elinica ia fini como sclavos de la romanes, instruinte la jovenes de la aristocratas roman!
En esta ambiente, nos trova un interesa renovida e potiosa, entre e la ricas e povres, a relijio. A la relijio vea de Roma on ia dona respeta, ma no multe plu. Ma la plu persones ia vide la dios como no multe plu ca carateres en naras usada per asusta enfantes turbosa (estra cuando la adultes mesma ia deveni asustada!). Los ia xerca comforta en un eda nonserta, e ia trova ce filosofia no sasia. Multe cultos – de la Madre Grande, de Dioniso, de Isis de Egipte, de Mitra de Persia, de Bal de Suria, de Iaue de Filastin – ia deveni popular. Ultima, un seta iudiste cual nos nomi oji cristianisme ia domina.
Perce on ta parla sur relijios e filosofias de relijio en un libro sur la istoria de psicolojia? Relijio, filosofia, siensa, e psicolojia ia veni de la mesma radises umana: Nos ave un desira forte, an un nesesa, per comprende la natur de la universo, nosa rol en acel universo, e la sinifia de nosa vives. Relijio ia inclui respondes a esta demandas cual ia sasia psicolojial e ia es sosial e political potiosa. Filosofia ia comensa separa de relijio en la eda elinica e roman, ma la majoria grande de persones ia resta con relijio per sua respondes. En la Renase e la Lumina, siensa ia comensa separa de e relijio e filosofia, e ancora la majoria grande ia resta fidosa a la dogmas de relijio. E tra un parte grande de istoria, relijios ia ave disposas forte oposada a filosofia e siensa. Psicolojia ia erita alga de esta problemes, an en la eda moderna. La comprende de la radises de relijio e la potia de sua credes merita la atende de cualce studiante de la istoria de filosofia, siensa, e psicolojia.
Filosofia roman ia es rara plu ca un refleta pal de la filosofia elinica, con sinias a veses de brilia en leteratur, ma poca ideas inovosa. A la otra lado, on ia ave un continua de un filosofia pratical, suportada par un tende a ecleticisme (per esemplo, Cicero). E plu, on ia ave un move cresente a un filosofia alga mistica, un estende de stoicisme comun nomida neoplatonisme. La promovor la plu conoseda ia es Plotino.
Plotino (204–269) ia nase en Licopoli en Egipte. El ia studia con Amonio Saco, un filosofiste e docor e instruor de la padre de la eglesa Origen, en Alexandria. Plotino ia parti a Roma en 244, do el ia instrui asta sua mori. El ia influe multe la imperor Julian “la renunsior”, ci ia atenta reveni la impero, sin susede, a un varia filosofial de paganisme, contra la marea de Cristianisme.
Cuando Plotino ia es a un campania militar a Persia, el ia encontra multe varias de ideas Persian e Indian cual el ia fusa con la filosofia de Platon.
El ia dise ce Dio es la esente suprema, la unia asoluta, e es nondescrivable. Tota parolas (an los usada en la frase a ante) implica un limita. On refere la plu bon a la Dio como la Un, eterna e infinita. Tota la creada es un esflue continuante de la Un, con ce cada “spasma” de crea es pico min perfeta ca la presedente.
La esflue prima es nomida Nous (intelijente o mente divin, ance nomida Logos), e es numero du sola pos la Un. Lo contempla la Un, ma es mesma no plu unial. Nous conteni la formas o ideas cual la elinicas temprana ia discute.
La esflue du es Psice (la spirito de mundo), projetada de Nous sur la tempo. Esta Psice es fratida entre tota la spiritos individua de la universo. Final, la mundo de spasio, materia, e la sensas esflue de Psice.
Spiritalia es la move de la sensas a la contempla de sua propre spirito, alora a la spirito de mundo, alora a la intelijentia divin, e ultima a un comunia direta con la un, a cuando on es completa librida. An si esta pare plu como induisme, neoplatonisme es vera acordable con la cristianisme de monces asetica e la padres de la eglesa, e con tota formas de misticisme cual ia flori en la 1800 anios seguente!
Un otra promovor de neoplatonisme ci merita nota es Hipatia de Alexandria (370–415). Un fem de inteleto grande, el ia deveni asosiada con un enemi de la bispo cristian Ciril. Lo pare ce la bispo ia comanda ce sua monces “trata el”. Los ia nudi el, ia trae el de sua casa, bate el, talia el con telias agu, e final arde el. Rafael, artiste de la Renase, ia valua el sufisinte per inclui el con la filosofistes major de Elas en sua obra mestral La scola de Atina.
Un de la relijios la plu popular en la Impero Roman, spesial con la soldatos roman, ia es mitraisme. Sua orijinas es en Persia, e lo inclui la ierarcia antica de dios, como restruturida par Zaratustra (sirca 628 a sirca 551) en la libros santa nomida la Avestas.
En mitraisme, la universo ia es videda como un luta eterna entre lus e oscuria, personida par Ahura-Mazda (la bon) contra Ahriman (la mal). Esta idea ia influe probable la iudis cuando los ia abita Babilon, cuando los ia adota un esente nomida HaXatan – Satan – como la mal, e ia lia el a la serpente de la jardin.
En la panteon persian, Mitra ia es la judor de spiritos e la protejor, e ia es videda como la representor de Ahura-Mazda sur tera.
Mitra, longo la lejenda, ia es incarneda en la forma de umana (como Zaratustra ia predise) en 272 aec. El ia nase de un virjin, ci ia es nomida la madre de dio. La selebra de sua nase ia es a 25 desembre e on ia nomi el la lus de la mundo. Pos ensenia tra 36 anios, el ia asende a sielo en 208 aec.
Esta relijio ia ave multe similes con cristianisme: Mitraistes crede a sielo e enferno, judi e revive. Los ia ave batisme e comunia de pan e vino. Los ia crede ce on debe servi a Dio e otras.
En la Impero Roman, Mitra ia deveni asosiada con la sol, e on ia refere a el como la Sol Invictus, pd: la sol nonconcistada. La dia prima de la semana – soldi – ia es dedicada a prea. Mitraisme ia deveni la relijio ofisial de Roma per sirca 300 anios. La eglesa cristian antica ia adota soldi como sua dia santa, e 25 desembre como la aniversio de la nase de Jesus.
Mitra ia deveni la padron de soldatos. Soldatos en la armadas roman ia crede ce los debe luta per la bon, la lus. Los ia crede a autodisiplina, asteni, e frateria. Nota ance ce la costum de presa la manos ia veni de la saluta mitraiste entre soldatos roman.
Mitraisme ia funsiona como un sosia secreta, con rituos de pasaje en la forma de defias fisical. Como en la setas gnostica, on ave sete niveles, cada protejeda par un planeta.
Car mitraisme ia es restrinjeda a omes, la sposas de la soldatos ia parteni comun a asosias de adorores de la Madre Grande (Cibele). Un de la rituos de la femes ia inclui la batiza en sangue, fada par sacrifia un animal – preferable un bove – supra la inisiada en un caveta a su. Esta ia combina con la mito ce Mitra ia mata la vivente prima, un bove mas, forminte la mundo de la corpo de la bove, e ia es adotada par la omes ance.
Cuando Constantino ia converti a cristianisme, el ia deslegali mitraisme. Ma alga Zoroastristes esiste ancora en India, e la selebras mitraiste ia survive asta cuando la Aiatola ia ateni la potia. E natural, mitraisme survive plu sutil en la tradisiones variosa de Europa e an cristianisme.
Jesus ia nase, on divina, sirca 6 aec. Sua nom es un latini de la nom ivri Iexua, comun representada como Joxua. La lejenda dise ce el ia nase en la vila peti de Betlehem, par un madre virjin nomida Maria, la prometeda de un carpentor, Iosef. Jesus ia maturi en Nazaret, como parte de un familia iudi grande. El ia es probable multe intelijente, e ia aprende, per esemplo, leje sin instrui formal.
Cuando el ia es joven, el ia deveni multe relijiosa, e ia junta se a un grupo de iudis asteninte gidada par un om carismosa nomida Joan la Batiste. Cuando Joan ia es destestida par la autoriosas local par causa de “stimula manadas”, algas ia comensa demanda de Jesus per gida.
El ia ave 12 disiplos de vilas e empleas variosa, e sentos de otra seguores, omes, femes, e enfantes. Los ia vaga tra la rejion, partal per sperde sua credes e partal per evita la autoriosas nonamin.
Temprana, la mesaje de Jesus ia es un forma de iudisme seria, an fundaliste. El ia promove un etica simple e fundal: on ta ama sua visina e si on reseta odia, on ta dona compatia. El ia asentua spesial la difere entre la relijio formal de la pretes e la clase renante de la iudis, e la relijio min esata ma plu sinsera de la popla simple. Suportante la mesaje ia es sua capasia parente de cura la maladas.
Iudis de sua tempo ia senti opresada par sua renores roman, e multe ia crede ce sua Dio va interveni per benefica la popla par envia un maxia – un xef carismosa ci va forsa a estra la romanes e institui un stato nova iudiste.
Multe de la seguores de Jesus, natural, ia crede ce el es la maxia. A alga punto en sua carera, ance el ia comensa crede lo. Nonfortunosa, la autoriosas iudiste, ci ia debe es respondente a la romanes, ia es consernada par sua popularia, e ia fa ce el es arestada en Jerusalem.
El ia es condenada per es matada par crusi. Sua seguores ia es clar deludeda ce la stato iudiste prometeda no ia aveni. Ma rumores de sua revive, e sua apare como un revela a alga de sua seguores, ia reinisia sua fida. Multe ia crede ce el va reveni – pronto! – per gida los.
En cuando la anios ia pasa, natural, lo ia deveni clar ce el no va reveni, a la min en la edas de la seguores. La aspetas min maxial e plu relijiosa de sua instruis ia comensa es asentuada, e sua idea ce la rena de Dio es en nos, o a la min es nosa recompensa en sielo, ia sustitui per la stato iudiste cual los ia espeta.
Per bon o mal, Judea ia es vera multe urban, pd: forte “elinicida”, an si no tan “romanida”. La mesma corentes de pensa en otra partes de la impero ia es sentida asi ance. Donce la nara de Jesus, como rejistrada en la evanjelios de Marco, Mateo, e Luca, ia comensa es liada a ideas cual ia es plu neoplatoniste, gnostica, o an mitraiste!
La evanjelio de Joan, per esemplo, es multe diferente de la otras, e refere a Jesus como la Parola – la Logos – un idea elinica comun. La apocalise, ance atribuida a Joan ma diferente en stilo e contenidas, ave tota la imajia de la naras gnostica e mitraiste de la fini de la mundo, ance popular entre la iudistes a esta eda. Lo inclui la idea de un revive ultima de la corpo – un conseta cual la Jesus de la evanjelios no ia promove, e cual la plu de cristianes de oji no crede.
Ma Paulo (sirca 10 a sirca 64 ec), un iudi romanida, ia es la seguor la plu importante en recrea Jesus, ci Paulo ia encontra nunca e a ci el refere nunca par nom. El ia es ance la plu importante en divorsa la relijio nova de sua radises iudiste. Paulo es la person ci ia introdui la idea ce Jesus ia es la fio de Dio e ce nos pote es “salvada” de nosa pecosia inerente sola par fida a el.
Tra cuasi un sentenio, la cristianes temprana ia es fendeda entre du campos enemin: Un grupo ia segue Petro, un de la disiplo orijinal de Jesus. Los ia es xef iudiste e ia continua multe de la tradisiones iudiste, como Jesus mesma ia fa. La otra grupo ia segue Paulo, ci ia es multe plu asetante de convertidas noniudi, e ia desprende multe de la lege iudiste per los ci no ia nase en la tradision. La batalia entre esta grupos ia es, evidente, ganiada par Paulo. Alga criticistes sujesta ce cristianisme ta es plu esata nomida “paulisme”.
E Petro e Paulo ia es esecutada en Roma sirca 64 ec. Paulo ia es destestida. Petro ia es crusida en posa inversada (a sua demanda, per evita comparas con Jesus).
La “patristes”, o padres de la eglesa, ia es la filosofistes cristian prima. En la parte este de la impero, on ave Origen de Alexandra (185–254); en la ueste, on ave Tertuliano de Cartago (165–220). On recorda Tertuliano per sua dise ce el crede (a la mori e revive de Cristo) esata car lo es asurda. Origen, a la otra lado, ia ave plu elinicia en se, e ia indica ce multe de la Biblia debe es comprendeda como metafor e no leteral. Ma recorda ance ce Origen ia talia sua propre jenitales car el ia vide Mateo 19:12 en un modo multe leteral!
La idea de la Trinia, cual no ia es trovada en la Biblia mesma, ia preocupa la patristes pos cuando Teofilio de Antiocia ia introdui la conseta en 180 ec. Tertuliano ia senti ce la Trinia refere a Dio, Logos (sua parola), e Sofia (sua sajia). Simil, Origen ia dise ce la Trinia refere a la Un (la padre), Logos (la fio, intelijentia), e Psice (la spirito santa), longo la scema neoplatoniste. Car la conseta de la Trinia es difisil (o an nonposible), lo ia es la radis de multe interpretes cual no ia conveni a la esplicas ofisial. Esta interpretes ia es nomida eresias, natural, e sua autores ia es escluida de la eglesa e sua libros ia es ardeda.
Un otra fato es ce Origen no ia crede a la enferno: Como la neoplatonistes, el ia crede ce tota spiritos va reveni ultima a la Un. Lo es interesante ce Origen e la neoplatoniste grande Plotino ia ave la mesma ensenior: un docor e filosofiste nomida Amonio Saco.
La filosofias de la patristes ia es xef la mesma: Tota veria deriva de Dio, tra la esperia mistica cual los ia nomi “grasia” (intui, sensa interna, lus de fida, etc). Esta loca la patristes en la mesma grupo como la neoplatonistes, e contrasta la filosofia cristian con lo de la elinicas antica: La aseta, sola par fida, ce alga cosa es vera ta es un idea multe strana a persones como Socrate, Platon, Democrito, e Aristotele!
Cristianisme ia ave alga fortes, con mesajes psicolojial (en loca de filosofial) de proteje, espera, e pardona. Ma la forte la plu grande ia es sua egalisme: Lo ia es xef un relijio de la povres, e la impero ia ave multe povres. An si la cristianes antica ia sufri multe persegue, lo ia continua crese.
Alora, a la sera ante batalia a 27 otobre 312, a no multe milias a norde de Roma, imperor Constantino ia alusina un crus ardente. El ia gania la batalia, e ia comanda ce cristianisme deveni un relijio legal en la Proclama de Milano. En 391, la imperor Teodosio ia deslegali tota otra relijios. Ma an alora, cristianisme ia ave competores.
Gnosticisme refere a un grupo de alga tradisiones de filosofias relijiosa (o relijios filosofial) cual estende a ante asta la eda de la egiptianes e babilonianes. Tota formas de gnosticisme inclui la idea ce la mundo es composada de materia e mente o spirito, con materias videda como negativa o an mal, e mente o spirito como positiva. Gnosticas crede ce nos pote asende a un forma de spirito ultima e pur (Dio) par aprende sabes secreta – “la via” – como anunsiada par un salvor enviada par Dio.
La detalias de la setas gnostica variosa depende de la metafores mital cual los usa: egiptian, babilonian, elinica, iudi, cristian… Gnosticisme ia es multe influeda par la relijios persian (zoroastrisme e mitraisme) e par la filosofia platonal.
Los ia ave un depende forte de astrolojia, cual los ia erita de la babilonianes. De sinifia spesial ia es la sete “planetas” clasica: la Sol, la Luna, Marte, Mercurio, Jupiter, Venus, e Saturno. Los representa la sete sferas tra cual la spirito debe pasa per ateni la Dio. Encantas majiosa, comun de la semitas, ia es ance importante.
Cuando cristianisme ia entra a la sena, gnosticisme ia ajusta rapida a lo, e ia comensa promove se como un forma plu alta e plu vera de cristianisme. La teolojia pare como esta:
Prima, on ave Dio solitar, un tipo de asoluta. Alora, on ave emerjis de Dio nomida la aiones o fios. La plu joven de estas ia es Sofia, pd: sajia, cual ia es la prima e sola “fio” fema. Sofia ia ave un fali – orgulo – cual infeta la resta de la universo. Nos nesesa desfa esta fali (la peca orijinal), ma nos no pote susede sin aida. Nos nesesa un aion salvante, pd: un salvor, ci pote relasa Sofia de la lias de era e restora el a sua state como un emerji de Dio.
Adora entre la gnosticas ia inclui batiza, confirma, e la eucaristia. En fato, lo es probable ce alga de la evanjelios nonofisial ia es scriveda par gnosticas cristian, e alga dise an ce Joan ia es gnostica.
Gnosticisme ia es forte refutada par la eglesa cristian temprana, en la sentenios du e tre, e ance par neoplatonistes, como Plotino, ci ia vide lo como un mali de la pensa de Platon. En realia, natural, la razona per la odia ia es plu un caso de la similia entre gnosticisme e cristianisme e neoplatonisme.
Manisme ia es fundida par Mani, naseda en 215 ec en Persia. Cuando el ia ave 12 anios, el ia es visitada par un anjel, ci ia comanda el a vive pur per 12 plu anios, pos cual el va es recompensada par deveni un profeta. Ultima, el va considera se como la “selo” (pd: la final) de la profetas, un titulo cual Muhammad ia proclama plu tarda per se.
El ia es forsada a sorti de Persia e ia vaga tra la este, predicante un varia gnostica de mitraisme, con elementos de iudisme, cristianisme, e budisme. El ia vide se como un apostol de Jesus. Cuando el ia reveni a Persia, el ia es prisonida e crusida.
En manisme, Ormuzd (un deriva de la nom Ahura Mazda) es la bon dio, la dio de lus, la creor de spiritos. On ave ance un dio de mal e oscuria – a veses nomida Iaue! – ci ia crea la mundo material, an prisoninte en corpos la spiritos cual Ormuzd ia crea. Un otra tradision dise ce Ormuzd ia introdui fratos de lus – pd: razona – en la manicines de la mal dio.
En cualce caso, on ave lus prisonida en oscuria. Mani ia crede ce salva ariva tra sabe, astenia, vejetalisme, juna, e virjinia. La “elejedas” es los ci ia segue la plu bon la regulas. Sua recompensa ultima ia es relasa de la lus de sua prison, pd: la spirito de la corpo.
Sua seguores ia es sever persegueda par e la persianes e la romanes. Ma la relijio ia sperde a India, Xina, Anatolia e Asia sude-ueste jeneral, an a Espania. Lo dura en Europa asta la sentenio des e ia influe eresias cristian plu tarda como la bogomiles e la catares.
San Aurelio Augustino de Hipon (354–430) ia es un maniste tra des anios ante sua converti a cristianisme en 386 ec. El ia continua a deveni la filosofiste cristian la plu conoseda ante la eda medieval.
El es la plu bon conoseda a nos per la reporta prima vera psicolojial e introspetante de sua xerca per veria, en un libro nomida Confesas. Un indica peti de la detalia intima de sua reporta es mostrada par un de sua sitas la plu bon recordada: El ia prea ce Dio “dona puria (sesal) a me, e astenia, ma no ancora!”
Sua filosofia ia es un ajusta laxe de Platon a la nesesas de cristianisme. Per reconsilia la idea ce Dio es bon con la oserva de la malia cual esiste clar en la mundo, el ia adota la conseta de vole libre, e donce nosa culpablia personal per nosa pecas. E el ia asentua nosa intendes plu ca nosa atas cuando on asinia culpablia moral.
Natural, on ave problemes con sua razonas: Si la Dio es omnisiente e omnipotente, el sabe cual nos va fa, e en fato ia crea nos en esta modo. Donce, esce El no es culpable ancora per malia? Plu, an si umanas es culpable per males grande contra lunlotra, nos ave ance desastres natural e maladias mortal cual pote es videda como mal, ma no es la resulta de nosa vole libre. Esta ideas causa doles de testa per filosofistes asta an esta sentenio. (Vide La frates Karamazov par Dostoevski per esemplos eselente.)
Augustino ia deveni la bispo de Hipon Real (Hippo Regius, a ueste de Cartago) en 395. El ia mori en 430, entre la aseja de Hipon par la vandales, un tribu germanica cual ia concista Africa norde (la orijina major de gran per Italia en acel eda). On pote dise ce Augustino ia vive tra la cade de la Impero Roman.
La Impero Roman ia es grave declinante. La economia ia comensa stania. Tro multe mone ia es usada mera per manteni la fronteras e unia de la impero. La sites ia comensa declina. La servis en la sites ia declina, e famia e maladia ia afeta grave la povres. Multe ia sorti a la campania, do los ia trova se laborante en la latifundi (cultiverias) grande como laborores e artisanes. Campanianes libre ia sede la posese de sua cultiverias peti a la propriores de la latifundi como un intercambia per proteje. Alora, esta latifundi ia es perfeta per es saisida como renas peti par la xefes barbar ci ia veni pronto.
En la sentenio tre, la impero ia es atacada de cada dirije. Lo ia es nobil defendeda par 33 armadas con 5000 soldatos en cada. Interna, lo ia sufri de sua grandia, e en 395, lo ia fende ofisial en du duis – la Impero Roman Ueste e la Impero Roman Este.
En la sentenio sinco, la hunes ia entra a Europa de la stepes de Rusia, e ia ateni tan distante como Chalons, prosima a Paris. Los ia sperde teror en cada rejion do los ia vade. Sua impero ia colasa en 476, ma los ia stimula deses de tribus germanica a move en la dirije de la Impero Roman.
La romanes ia xasa alga de esta tribus a retro, ia paia algas per sesa combate, e ia permete ce algas entra a la impero per proteje la fronteras. La plu de la armadas roman ia deveni composada de soldatos germanica! Un tribu grande, la visigotas (gotas ueste), ia comensa move a Italia de sua colonias en la Balcanes. En 410, los ia destrui Roma. La dui ueste de la impero ia es, per la plu, mor e en la manos de invadores variosa.
La Impero Roman Este ia es ance declinante e ia es pestada par geras, esterna e interna. Imperor Justiniano (527–565) ia atenta reconcista Italia, ma ia fali e ia causa ce la Impero Este cade en un crise finansial. Sua atentas per elimina filosofias pagan e eresias cristian ia causa multe nonsasia con sua rena. A la otra lado, Justiniano ia codigi la leges roman e ia ajusta los per conforma con teolojia cristian. El ia promove obras grande como la construi de la Hagia Sofia (sajia santa) con sua cupola noncredable grande e mosaicas briliante.
La tribus de barbares ia es sola un parte de la problemes de la impero. On ia ave famiones en la restas de la impero a veses de 400 a 800. On ia ave un pesta enorme en la sentenio ses. La popla ia es reduida par 50 persentos. La popla de la site de Roma ia es reduida par 90 persentos. Pos 700, sola Constantinopoli – la capital de la Impero Roman Esta – ia ave plu ca 100 000 persones.
En la tarda de la sentenio sete, arabis ia concista Egipte e Suria. Asta alora, los ia es ancora partes de la Impero Este. Los ia atenta prende an Constantinopoli. En la sentenio oto, Europa ia es atacada par balgares (un tribu mongol), cazares (un tribu turces ci ia adota iudisme), magiares (ci ia fundi Magiar), e otras. La turceses ia concista Anatolia (renomida Turcia) en 1071, e ia prende final Constantinopoli en 1453.
Entre esta anios, Europa ueste ia es controlada par gerores nonalfabetiste, organizada en ierarcias simil a los de gangsteres. La masa grande de persones ia es reduida a situas simil a los de sclavos, aradinte la tera o laborante en servi en la sites multe reduida. Nos ave bon razonas per nomi esta anios “la edas oscur”.
Ma, cuando la sol reposa sur un sivilia, lo es levante en un otra loca…
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).