LA ISTORIA DE PSICOLOJIA

Falasias

Falasias es razonas cual pote sona lojical, ma no es tal. Cuando on regarda alga de la esemplos a su, on pote vide alga con concluis con cual on acorda, ma alga con cual on no acorda. Ma la veria, en la sensa empirical, no es la punto: Lo cual esta esemplos conserna es la razona lojical. Tota de esta esemplos es nonlojical e es fundida sur falasias.

Un esemplo es nomida la jenerali esedente. Algun pote razona: “Acel es la soreria la plu rica; Susana es un membro de acel soreria; donce Susana es un de la femes la plu rica en la universia.” Lo es serta posible ce Susana es vera un de la plu ricas, ma el pote ance es un de la plu povres. Lo no importa esce la conclui es vera o no en la sensa leteral. La razona es nonlojical. Lo sinifia tota no cosa per dise ce, si un grupo ave alga cualia, alora un membro de la grupo debe ave acel cualia ance.

Probable, tota persones es culpable de usa un falasia sin intende. La plu persones es vitimes de falasias an si los sabe plu bon. E on ave alga persones (propagandistes, anunsiores, e multe politicistes) ci usa los sempre. Lo ta es saja ce on deveni familial con la falasias afin on proteje se de la persones nonmoral. Ma, per favore, nota bon: esta lista no es intendeda per coraji algun a usa los!

Afirma de la seguente

“A implica B; B es vera; donce A es vera.” Esta es confusante, a veses, car lo pare tan multe como bon lojica: “A implica B: A es vera; donce B es vera”, conoseda como modus ponens o “afirma de la presedente”, es un de la silojismes (esemplos de razona) la plu fundal valida. Ma la afirma de la seguente es un razona falsa cual pare mera simil a la afirma de la presedente:

Esta es la conversa de la nega de la presedente (vide a su).

Converti la dependente

Un varia peti de afirma la seguente es converti la dependente: “Si A, B; donce, si B, A.” Esta razona falsa es simil a la afirma de la seguente, ma es espresada como un frase dependente.

Nega de la presedente

“A implica B; A es falsa; donce B es falsa.” Esta es la conversa de la falasia de afirma de la seguente. Lo pare ance como bon lojica: “A implica B; B es falsa; donce A es falsa,” cual es nomida modus tollens o la nega de la seguente. Nega de la presedente, a la otra lado, es nonlojical.

On ave ance un varia cual dise: “Si A, B; donce, si no A, no B.”

Falasia de composa

Falasia de composa es la idea ce un cualia compartida par un cuantia de cosas individual es ance compartida par un colie de acel cosas, o ce un cualia de la partes de un cosa debe ance es un cualia de la cosa completa.

La falasia jenetical

Un varia de la falasia de composa es la falasia jenetical: On veni a un conclui sur la bonia o malia de alga cosa sur la funda de la orijina de la cosa. (Esta no es la mesma como la falasia ad hominem – vide a su – ma es comun listada ala.)

La falasia de divide

La oposa de la falasia de composa es la falasia de divide, pd: on suposa ce un cualia de alga cosa debe es aplicada a sua partes, o ce un cualia de un colie de cosas es compartida par cada de los.

La falasia de la media nondistribuida

Un plu falasia confusa partes e interas, la falasia de la media nondistribuida: On sujesta ce cosas es simil en cualce modo, ma on no indica como. A es un tipo de C; B es un tipo de C; donce A es B.

Jenerali esedente

(acc: dicto simpliciter)

La aplica de un regula jeneral a un caso spesial. Un regula jeneral es aplicada a un situa spesial, ma la cualias de la situa indica ce la regula no es aplicable.

Jenerali esedente inclui un malcomprende comun de la natur de statistica:

Jenerali fretante

Jenerali fretante es la conversa de jenerali esedente: On usa un caso spesial como la funda de un regula jeneral. Un regula jeneral es creada par esamina sola alga poca casos spesifada cual no representa tota casos posible.

La statistica de cuantias peti

Jenerali fretante inclui un otra malcomprende comun de statistica, nomida la statistica de cuantias peti:

Eleje de oservas

Un otra varia es nomida eleje de oservas: on indica situas favorente e iniora la situas nonfavorente. Per esemplo, a cualce loca de aposta, tota la atende vade a los ci gania, e los ci perde es cuieta corajida a sorti tra la porte retro. En esta modo, la gania pare multe plu posible ca lo es. Recorda: La casino gania sempre!

Atesta racontada

Eleje de oservas es la plu bon mostrada par atesta racontada:

Bon esemplos pote es trovada entre “mitos urban”.

Dicotomia falsa

(negra o blanca, media escluida)

La suposa ce un distingui es de la spesie “o esta o acel”. On sujesta ce on ave sola du alternativas, cuando otra alternativas esiste o pote esiste. En loca de negra o blanca, nos pote ave tinjes de gris… o an un arco de sielo de colores!

Un otra forma de dicotomia falsa es considera sola la estremas:

Conclui en premisa

(petitio principii)

On suposa como un premisa la conclui cual on desira ateni. En loca de ofre un demostra real, on pote simple reespresa la conclui cual on desira, e espera ce la escutor no nota esta.

Razona sirculo

(la sicle vil, circulus in demonstrando)

La forma la plu evidente de conclui en premisa es la razona sirculo: On declara en sua demostra lo cual on debe demostra.

Apela a fida

On ave ance la apela a fida: fida, par sua defini, depende de un crede cual no depende de lojica o atesta. Fida depende de pensa nonlojical.

Eticetas cargada

La modo la plu comun per pone la conclui en la premisa es par usa eticetas cargada (parolas cargada, parla emosial), pd: redise la conclui, ma usante parolas “calda”:

Razona ad hoc

Frecuente difisil per identifia (e donce multe perilosa) es la razona ad hoc: On dona pos un aveni un esplica cual no aplica a otra situas.

Es vijilante cuando persones dise “tota ave un razona” o “Dio ave un intende per cadun” o “la veria es ascondeda”.

La demanda complicada

(demanda cargada, demanda trucosa, falasia de interoga, falasia de presuposa)

La demanda complicada es la forma demandante de conclui en premisa. On fa un demanda cual gida otras a crede ce un demanda presedente es ja respondeda en un modo spesifada.

La falasia de multe demandas

(plurium interrogationum)

Un varia de la demanda complicada es la falasia de multe demandas. Esta falasia aveni cuando algun esije un responde simple a un demanda complicada:

Un otra varia de esta falasia es la solisita de un esplica de alga cosa cual es nonvera o ancora no demostrada:

Causa falsa

(non causa pro causa, non sequitur)

Alga cosa es indicada como la causa de un aveni, ma lo no ia es vera demostrada como la causa. Per esemplo:

Pos hoc ergo propter hoc

La forma la plu comun de causa falsa es nomida pos hoc ergo propter hoc: Un conclui cual no segue de premisas o atestas demostrada. On suposa lias causal cual no es ja demostrada. La frase latina sinifia “pos esta, donce par causa de esta”.

Cum hoc ergo propter hoc

Un varia peti de esta es cum hoc ergo propter hoc: On dise ce, car du cosas aveni con lunlotra, los debe es causal relatada. Lo es un falasia car lo iniora la otra causas posible de la avenis.

Confusa de corelata e causa

Un varia statistical comun de esta es la confusa de corelata e causa: corelata no pote indica la dirije de causa. Si X es forte corelatada con Y, X pote es la causa de Y, o Y pote es la causa de X, o (la plu probable) alga otra cosa es la causa de ambos. E posible la relata es tota acaso.

Esta es frecuente segueda par un razona ad hoc:

La arenge roja

(tese nonrelatada, ignoratio elenchi, conclui nonrelatada, iniora la problem, nebli la tema, diverje, punto mancada, etc)

On demostra un punto otra ca la esaminada; on diverje de la tema par cambia lo. En England elizabetan, prisonidas ci ia evade prison ia frota se con un arenge “roja” (vera, un brun-roja), pd: putrida, per distrae la canes de la odor.

La asustavia

(om de palia)

Un esemplo de la arenge roja es la asustavia: On crea un sena falsa e alora ataca lo; on malrepresenta la posa de un otra per ataca plu fasil lo.

Reali falsa

Un otra esemplo es la reali falsa: On trata un conseta astrata o un construi ipotesal como si lo representa un aveni concreta o un cosa fisical. Un esemplo es la modo en cual la resultas de esaminas de intelijentia es comun presentada como mesuras real de intelijentia.

La demanda sin sinifia

Un otra esemplo es la demanda sin sinifia:

Apela a lojica

Un varia multe astuta de la arenge roja es un apela a lojica (argumentum ad logicam): Esta es la “falasia falasial” de sujesta ce un proposa es falsa car on ia presenta lo como la conclui de un razona falsa. On debe nota ce un razona falasiosa pote ariva a un conclui vera!

Atesta supresada

Multe comun es atesta supresada: Un declara, comun usada per engana, cual no inclui alga de la fatos nesesada per un esplica esata.

Analojia falsa

Un de la varias la plu mal de arenge roja es la analojia falsa: Un analojia o metafor mostra un paralel per esplica plu, ma lo demostra no cosa:

Apela spesial

On ave multe falasias cual inclui la malusa de parolas: Un esemplo comun es nomida apela spesial, cual es la usa de parolas spesial per la un e la otra:

La falasia de vasila

Esta no es tan distante de la falasia de vasila, o la usa de parolas ambigua. Un parola clavin es usada con du o plu sinifias diferente en la mesma razona – la desloca de sinifias.

La falasia de “no om vera scotes”

Un falasia con un nom divertinte es la falasia de “no om vera scotes”: Suposa ce me ta sujesta ce no om scotes usa zucar sur sua gaxa. Tu responde par indica ce tua ami Angus gusta zucar sur sua gaxa. Alora me dise: “A, si, ma no om vera scotes usa zucar sur sua gaxa!” Par sujesta ce Angus no es un om scotes con documentos ofisial, me ia limita la sinifia de la espresa “om scotes”.

Esta falasias inclui comun la usa de asentua, la cambia de vose en un frase per cambia la sinifia. En engles, per esemplo, la parola “men” pote sinifia o omes o persones:

(Nota ance ce la parola equal (“egal”) es multe ambigua. La intende ia es ce tota persones es egal en la lege, e no en ricia, belia, intelijentia, etc.)

Un otra forma de malusa de parolas es amfibolia – la usa de frases ambigua:

Ataca personal

(argumentum ad hominem)

On ataca la person en loca de la razona. En la ataca personal, nos demanda ce la escutor no considera la razona, ma considera en loca la person de cual lo veni:

Ma marxistes, usores de cocaina, sosialistes, persones depresada, an stupidas, pote es coreta!

Alora on ave la forma maltratante de la ataca personal:

Pico plu astuta es la forma situal de ataca personal:

Veneni la poso

Multe danante es veneni la poso: La ataca personal pote es usada como un escusa per rejeta un conclui spesifada, como cuando on alega ce algun esplica un conclui per razonas egoiste. On ia “veneni la poso” car, de aora, persones va tende duta sua razona.

Nota ce si algun es un mentor conoseda, acel fato va redui cuanto on fida el como un atestor. Ma lo no va demostra ce sua atesta es falsa en esta caso. Mentores pote dise la vera!

Tu quoque

Cada adolesente conose bon la razona nomida tu quoque, latina per “tu ance!” o “vide ci parla!”

Apela a la fola

(argumentum ad populum)

Esta envolve suplicas teatral a nosa instintos la plu basa, como egoisme, avaria, jelosia, vania, en loca de usa fatos e razona:

Un esemplo de apela a la fola es la falasia de moda (consensus gentium, argumentum ad numerum): On conclui ce un idea ave merita sola car multe persones crede lo o pratica lo.

La razona de omnisientia

Un varia de la presedente cual dise, esensal, ce “tota persones” acorda:

Garda se contra parolas como “tota”, “cadun”, “cada cosa”, etc.

Apela a autoria

(argumentum ad verecundiam)

Esta es cuando nos introdui persones famosa, grupos autoriosa, siensa, tradision, relijio, universales…

La filosofiste grande Santayana ia dise: “Los ci resta nonsabente de istoria es destinada a repete lo.” Ma Henry Ford ia dise: “Istoria es asurda!” Alora, ci es coreta?

Esta inclui la tecnica famosa de mercatistes nomida apela clasiste:

Apela a tradision

Varias inclui un apela a tradision (argumentum ad antiquitatem): Esta es la falasia de dise ce alga cosa es bon o coreta sola car lo es vea, o car “esta es como sempre”. Ma an si persones ave un tradision, esta dise nunca sur esce lo es vera (o bon). Vide, per esemplo, razonas per astrolojia, sclavia, superstisio, sacrifia de umanas…

Apela a novia

Simil es la apela a novia (argumentum ad novitatem): La falasia de declara ce alga cosa es plu bon o coreta sola car lo es nova, o plu nova ca alga otra cosa.

Apela a ricia

(argumentum ad crumenam)

La falasia de crede ce mone es un criterio de coretia; ce los ci ave plu mone es plu probable coreta; o ce alga cosa cual custa plu es donce plu bon.

Apela a povria

Natural, on ave ance la apela a povria (argumentum ad lazarum): La falasia de suposa ce algun povre es plu virtuosa e fidable ca algun ci es plu rica, o ce alga cosa plu barata o simple es plu bon ca alga cosa plu cara o complicada. Per esemplo:

Apela a natur

Un falasia comun, e multe perilosa, es la apela a natur (o la falasia de lege natural): On razona ce, car umanas es produidas de la mundo natural, nos debe imita la condui videda en la mundo natural, e ce fa diferente es “nonatural”. On pote trova esta spesial frecuente en politica e relijio, e en produidas de autoremedia.

Apela a compatia

(argumentum ad misericordiam)

Esta es un apela a tua emosias amin, tua compatia. Escuta, si tu pote tolera, cualce suplica per donadas par enfantes malada. O escuta anunsias cual atenta vende computadores cara a jenitores.

Apela a nonsabe

(argumentum ad ignorantiam, argumentum de silentio)

Un otra falasia multe comun es la apela a nonsabe: On razona ce alga cosa debe es vera, simple car lo no ia es demostrada como falsa. O on razona ce alga cosa es falsa car lo no ia es demostrada como vera. Per dise: mea ideas es coreta car on ave no atesta contra los. O tua ideas es falsa car on ave no atesta per los.

Vera, on no pote demostra la nonesiste de alga cosa. An si on ia xerca multe bon, me pote dise sempre ce on no ia xerca sufisinte. Atenta: demostra a me ce unicornos no esiste! La carga de demostra es sempre sur el ci razona ce cualce cosa esiste vera!

Esta es comun segueda par un apela a compatia:

Carga de demostra

Un acompaniante comun de la apela a nonsabe es la desloca de la carga de demostra: La carga de demostra es sempre sur la person ci declara alga cosa. Desloca la carga de demostra es la falasia de pone la carga sur la person ci nega o no fida la declara. Tal, cuando un debator no furni la atestas nesesada per sua declaras, el defia sua oposor a demostra ce el ia era.

Apela a teme

(argumentum a baculum)

No debate con me – lo es perilosa!

Razona de la efeto negativa e la inclinada liscosa

Pico plu sutil es la razona de la efeto negativa:

E un varia comun es la inclinada liscosa (la efeto de dominos, la bal de neva): On sujesta ce un cambia de prosede, lege, o otra ata va causa un efeto negativa:

Nota ce un inclinada liscosa no nesesa segue sola car nos cambia cosas! Esta falasia es comun usada par los ci no gusta la suiside aidada o la rejistra de armas.

Argumentum ad nauseam

La falasia la plu usada par anunsiores e politicistes: la argumentum ad nauseam, pd: “repete asta cuando on vomiti”. Esta es la crede noncoreta ce un declara es plu probable vera (e plu probable asetada como vera) si on oia plu frecuente lo, donce on debe repete constante lo. Vide cualce anunsia, o vide la pratica de forsa ce enfantes memori sua lesones o sitas de la Biblia.

La esemplo final: en la eda temprana de televisa, la suportores de programes ia repete sua anunsias a un ves en cada pico de minutos: “bevi Coca Cola… bevi Coca Cola… bevi Coca Cola…”

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).