Testo publicida en 16 junio 2020 par Chabi
En la mundo de linguas construida, plu spesifada en la linguas aidante internasional, on trova sempre esperanto como la lingua prima, e pico a pos, interlingua. La lingua du ave la vantaje ce lo usa parolas internasional fundida sur la lingua latina, cual es la lingua usada per siensa asta la sentenio 18. Ance, la vocabulos siensal de linguas moderna es xef fundida sur latina e elinica e, par esta, interlingua ia es promoveda par sua suportores como un lingua de siensa, car sua parolas es sola un colie de los cual esiste ja en la plu de la linguas moderna (a la min, en la linguas ueste). Plu, interlingua ia es usada par siensistes en la revista Scientia international, publicida par la organiza Science News. Esta revista ia deveni parte de la revista engles.
Esperanto, de cual la idea xef es la uni de umanas su un lingua neutral e fasil aprendeda, ia developa sua terminolojia, e on vide como, su la idea de uni umanas, esperanto ia es promoveda per es usada en siensa par esperantistes. Esemplos de esta es la Konferenco pri Aplikoj de Esperanto en Scienco kaj Tekniko e la Scienca kaj Teknika Esperanto-Biblioteko.
En la caso de la lingua aidante internasional tre la plu importante, ido, de sua comensa lo ia es relatada a siensa, car el ia es un siensiste, Louis Couturat, ci ia aida en sua developa. La lingua ia es elejeda par la Délégation pour l’Adoption d’une Langue Auxiliaire Internationale, fundida par la matematiciste Léopold Leau. Ance, esta lingua ia es promoveda par siensistes variosa como Friedrich Wilhelm Ostwald, ganior de la Premio Nobel de Cimica en 1909.
Lingua franca nova ia es creada como un lingua aidante internasional. An tal, lo no ia es fundida sur la mesma idea como interlingua (cual vole es un util neutra entre la linguas romanica) car la idea sur cual elefen resta es lo de creoles pd, un lingua fasil cual pote es usada per comunica. An si lo es fundida sur linguas romanica, lo no vole es “mera un plu lingua aidante romanica”[¹]. Car lo ia es fundida su la idea de “creolia”, on ave a veses multe parolas en otra linguas cual deveni un sola parola en elefen. Esta es bon per aprende la lingua, car la vocabulo no es multe grande ma, an tal, a la otra lado, lo no aida cuando on vole parla sur siensa, car la linguaje siensal nesesa es spesifante.
Con la idea de boni la vocabulo de la lingua, la Asosia per Lingua Franca Nova ia developa un Departe de terminolojia afin sua membros pote debate sur la crea de parolas cual la lingua nesesa per espresa pensas siensal. Esta, aidada par la labora en la Vicipedia, aida en la developa de la terminolojia siensal en la lingua, afin tota sabes pote es espresada en lingua franca nova. An tal, an si la lingua ia es creada con la ojeto de deveni un lingua aidante internasional, la comunia cual usa lo es peti, e lo pote es definida como un comunia cual gusta fa sua propre cosa.[²]. Ance on pote pensa ce acel idea de “lingua aidante internasional” ia resta oblidada e cambiada par lo de “un lingua creada, fasil per aprende cual ia deveni la amato de alga parlores” e un lingua cual ave la posiblia de es developada per espresa tota ideas de sabe umana. Ma esta depende de sua parlores.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 4 april 2024 (17:36 UTC).