Nos va combate sur la plaias (parte final)

Denova, e a esta ves plu jeneral, sur la demanda de invade, me comenta ce on ia ave nunca un periodo en tota esta sentenios longa sur cual nos vanta cuando on ia ta pote dona a nosa popla un garantia asoluta contra invade, e min contra atacas seria. En la dias de Napoleon, sur cual me ia parla ja, la mesma venta cual ia ta porta sua transportas traversante la Manga ia ta pote gida a via la flotila blocinte. On ia ave sempre la posible, e acel posible ia stimula e ia engana la imajinas de multe tiranos continental. Multe es la naras cual on nara. On promete nos ce on va adota metodos nova, e cuando nos vide la orijinalia de malia, la injenia de combatosia, cual nosa enemi esibi, serta nos debe prepara nos per cada spesie de stratejia nova e cada spesie de manobra bruta e tradosa. Me pensa ce no idea es tan estracomun ce on no debe considera lo e regarda lo con un oio investigosa, ma a la mesma tempo, me espera, con un oio calma. Nos debe nunca oblida la sertias solida de potia maral e los cual parteni a potia airal si on pote usa lo local.

Me ave, me mesma, fida completa ce si cadun fa sua debe, si no cosa es descurada, e si la preparas la plu bon es fada, como los es fada aora, nos va demostra nos denova capas de defende nosa casa isolida, de dura la tempesta de gera, e de vive plu longa ca la menasa de tirania, si nesesada per anios, si nesesada solitar. En cualce caso, acel es lo cual nos va atenta fa. Acel es la promete de la Governa de Sua Majestia – cada om de los. Acel es la vole de Parlamento e la nasion. La Impero Brites e la Republica Franses, liada en sua causa e en sua nesesa, va defende asta la mori sua tera nativa, aidante lunlotra como bon cameradas a la masima de sua fortia.

An con ce rejiones grande de Europa e multe statos vea e famosa ia cade o ta pote cade en la teni de la Gestapo e tota la aparatos odiosa de rena nazi, nos no va fali e no va sesa. Nos va continua asta la fini. Nos va combate en Frans, nos va combate sur la mares, nos va combate con fida cresente e fortia cresente en la aira, nos va defende nosa isola, sin depende de la custa. Nos va combate sur la plaias, nos va combate sur la atererias, nos va combate en la campos e sur la stradas, nos va combate sur la colinas; nos va nunca sede. E an si, cual me no crede per un momento, esta isola o un parte grande de lo ta es concistada e faminte, alora nosa Impero ultra la mares, armada e gardada par la Marina Brites, ta continua la luta, asta, en la bon tempo de Dio, la Mundo Nova, con tota sua potia e fortia, avansa per la salva e la libri de la Mundo Vea.