Como on pote evalua un lingua aidante?

Esce linguas pote divide a superior e inferior, es sempre un disputa vasta en e estra la campo de lingua. Prima me dona direta mea opina: regardante linguas natural, on no pote nomi cualce lingua superior o inferior. Ma, regardante un lingua construida, spesial un lingua aidante, on pote judi ce lo es superior o inferior.

Cada lingua natural ia crese e deveni cual lo es oji pos esperia ja la pratica durante de umanas en un rejion. E esata car tempo ia prosede lo, cada lingua natural ave “protendes e cavas”, indicante tota nonregularia e profondia. Ma la difere entre tipos de gramatica es inata, donce lo no es coreta ce on judi ce xines no ave bon capasia de espresa con esatia mera car la linguas european es infletal e ave bon esatia de espresa. Simil, algas sempre loda xines sur sua belia, sua artosia, e sua leteraturalia, par bromas de parolas e poesias xines, en ce los ia fali persepi ce ance linguas como engles esele a tal espresas. (Un responde de Zhihu ia pone un esemplo clasica: starry night, cual ia desinia un vista vasta e briliante, e esta pote confirma la belia de engles. Considerante ce alga comentores no valua esta esemplo, me ajunta un plu clasica: The sun for the day, the moon for the night, and you for ever. Me pensa ce espresa tal belia direta en xines ta es difisil.)

Donce, evalua linguas natural par “superior” e “inferior” es un ata e sin comprende profonda e con egosentralisme, esata como la europeanes de la sentenio 19 ci ia persepi un lingua de otra familia simple par la gramatica indoeuropean e declara ce esta lingua es “noncompleta”. An oji multe xineses ta dise asurda “xines no ave gramatica”. (Serta, on debe culpa la educa de Xina par esta.) An en tribus nonsivil, la linguas de “umanas primitiva” stona antropolojistes e linguistes ci fa rexerca en campo — lor lingua no es noncompleta, en tota partes! Estas ave ance capasia eselente de espresa e pote descrive diversa fenomenos e consetas, incluinte la astrata e filosofial, sin debilia a la “linguas sivil” conoseda, como engles o xines.

Linguas natural no pote divide en tal modo, e como de linguas construida? On frecuente ave un opina disente ce ideas sur linguas sempre es diversa, ce algas pote gusta e otras pote odia, e ce cada comenta es personal, donce como tu osa dise ce esta lingua es plu bon ca acel, e como tu pote confirma ce lo es la fato?

Me opina ce on pote comenta sur linguas construida. Un lingua construida, como un spesie de obra en loca de un cosa cual esiste prima en realia, pote a bon grado indica la capasia de la autor. En ajunta, un lingua construida asosia con completia. Lo es posible ce la autor ia fali persepi multe espresas importante, donce cuando los es nesesada, la autor pote simple copia la formas de espresa de sua lingua prima o linguas cual el ia aprende: esta disturba la sistem orijinal desiniada con atende. Esta caso tende apare en problemes sur sintatica, car la ensenia costumal sur gramatica indoeuropean consentra sur infletas morfolojial de parolas, e esta fa ce studiantes fali persepi la importa de sintatica.

Regardante linguas aidante, la divide sur “bon” e “mal” pote es desideda plu fasil, spesial car un lingua aidante ave ojetos e valuas distinguable — neutria, simplia, fasilia per aprende, esatia, flexablia, etc.. Con esta valuas como normas per comenta, la considera de elementos a interna de un lingua va deveni multe plu ojetal. Como un person ci ia oserva ja multe linguas aidante internasional e construi solitar propre scema, me ave un senti profunda sur la relata e compete entre esta ojetos e valuas.

Donce me opina ce la valua la plu importante de un lingua aidante es no fasilia no flexablia no esatia, ma — ateni un ecuilibra o alga prosima. Ecuilibra es perfetia, e esta opina va apare frecuente en mea esajos veninte.

Ta ce me introdui a su simple la sinifia de ojetos e valuas diferente.

Neutria. Esta es un de la razonas la plu importante par cual linguas aidante ia nase, e es sempre suprasentuada en e estra la campo. Per esemplo, Zamenhof ia construi esperanto con la intende de aida comunica amin entre nasiones diferente par un lingua nova e neutra. En fato, cada lingua construida es orijinal un lingua neutra — ante la cuantia de usores sufisi, lo pote es la lingua prima de nun. Poi, la conserna du es a cual lingua esta lingua es plu simil, e a cual persones lo es plu fasil per aprende. Un bon cuantia de criticas sur esperanto (spesial de stranjeres) consentra sur la europa-sentralisme de esperanto. Me ia esplica sur esta en criticas sur esperanto ce considerante la sistem de gramatica de esperanto, linguas european, spesial linguas romanica, es la plu conveninte. Si multe elementos de otra familias (pe. xines, nion) es ajuntada, la resulta ta es, a contra, no simil a cualce e no natural. Si un lingua es desiniada a sufisinte simple e fasil per aprende, esta ta benefica tota persones de mundo. Donce, la solve major es construi un lingua amin a tota mundo; combina con fortia multe elementos diversa sola per plase etnicos diferente, no conveni.

Simplia e fasilia. La du parolas relata prosima con lunlotra, ma alga diferes esiste. Simplia sinifia la simplia sur sistem strutural, e la antonim corespondente es conpllicadia. Ma fasilia, a linguas aidante, pote tri: fasilia per aprende, fasilia per comprende, e fasilia per usa.

Fasilia per aprende es un conseta cual me usa per representa fasilia. Lo sinifia ce aprende custa pico, e de tempo, e de material, e de mente. Per esemplo, un lingua sin infletas nonregular es serta plu fasil per aprende ca otra lingua con los, un lingua sin modeles de frase noncomprendable es serta plu fasil per aprende ca otra lingua con los, e un lingua de cual la parolas pote es memorida fasil es serta plu fasil per aprende ca otra lingua de cual la parolas pote es memorida con fortia. Me opina ce relatas etimolojial prosima entre parolas pote fasili memori los. Per esemplo, si port sinifia porto o porte e in sinifia en, on ta pote comprende bon ce import sinifia emporta, e aprende fasil sua spele. A la otra lado, cambias de spele nonregular mali. Per esemplo, prezidanto, cual me ia nota en criticas sur esperanto, con ce esperanto ave la verbo sidi, ia cambia sua s a z afin on no pote conose la tronco sid-: donce on debe memori separada la du parolas. La mesma caso apare ance con komisii e promesi, do cambias de spele ia destrui parolas de la mesma orijina latin (en ajunta, esperanto no ave un parola funsionante como lor tronco), donce los nesesa memori separada, e esta pote ance aveni eras de spele.

Fasilia per comprende sinifia ce la corpuses creada en usa natural de la lingua (dises conversal, esajos leteral, etc.) pote es comprendeda fasil par aprendores o usores. Esta manca multe en linguas como esperanto — espresas diversa e flexable ia debili la comprendablia de frases. Per esemplo, agrega parolas tro plural a un sola parola, e usa ordina de parolas esitosa, frecuente fa ce on nesesa mastica la frase per comprende lo. Fasilia per usa sinifia ce aprendores o usores con alga vocabulo pote dise direta lo a cual los ia pensa, sin balbuta par causa de considera doletestas como la infleta (pe. usa cual sufisa con cual declina, cual jenero, cual caso, e cual numero) e la ordina de frase. Ma serta, aprende cada lingua nesesa studia e pratica. Lo no es posible ce on pote comprende bon la dises de otras e fa fluente espresas conversal, direta pos aprende un pico de lesones.

Simplia e fasilia es evidente la valua la plu importante de un lingua aidante. En la mundo moderna, la ojetida cual un lingua aidante pote gania con la plu fasilia es studiantes confondeda par engles (multe aprendores de esperanto ia declara ce los dedica se a esperanto direta car los no vole aprende engles). Los asentua simplia e fasilia, en loca de neutria. Donce, ance me pone simplia e fasilia per aprende a la valua la plu importante. Un lingua cual on pote aprende en un mense, an apena con neutria, suprapasa un otra lingua cual on nesesa duianio per aprende, an con plu neutria — desintensi la custa per aprende ave plu importa per aida comunica entre etnicos diferente.

Un valua corespondente a simplia es sistemosia. Sistemosa es un ajetivo, sinifiante ce la sistem interna de un lingua es ordinada. Per esemplo, cambias nonregular no esiste, la ordina de parolas es completa SVO, parolas ave relatas prosima, etc.. Multe de mea criticas sur esperanto es fundida sur la valua de sistemosia. Per esemplo, sua alfabeta no es sistemosa, sua parolas desordinada debe es memorida separada, sua modeles de frase es diversa e difisil per comprende, etc..

An tal, plu valuas conflita contra simplia e fasilia per aprende, a alga grado. Esta es la loca do un lingua aidante nesesa la plu de perfetia.

Naturalia. En la esajo presedente sur la istoria de linguas aidante, nos ia vide ce ido e interlingua ambos segue naturalisme, e per esta los pote abandona alga simplia e fasilia. Tal cambia nondireta indica ce umanas ancora espeta ce la lingua franca internasional ta es un lingua cual es natural, comfortosa, e bela, ma no un lingua como esperanto con tro multe artifisia. Serta, la scemas seguente pote inclui e naturalia e simplia e fasilia per aprende. La valua naturalia es atenida en pratica par pote coresponde prosima a linguas natural, spesial en linguas aidante fundida con linguas romanica. Linguas esperimental como lojban vera adota un etimolojia natural, ma nos cuasi no pote conose cual parolas es de xines e cual es de engles. Si la coresponde es bon atenida, pe., si nos pote pensa a reject de engles direta cuando nos aprende un parola reject (ta ce alga lingua aidante ave tal spele), nos pote sabe ce lo sinifia “rejeta”, e pote memori plu fasil sua spele. Esta es la razona par cual un lingua aidante nesesa un etimolojia e no pote deveni asolota neutra. Naturalia es atenida ance en alga partes cual fa la espresa a plu natural, como cual ido e interlingua ia indica en lor gramatica, ma tal desinia ia ajunta a la custa per aprende.

Esatia. Un lingua no pote es tro nonclar, car esta es mal a comunica. Toci pona es un esemplo evidente: lo ave tro poca troncos de parola, donce multe espresas es nonclar. An con multe simplia, lo no conveni per un lingua franca internasional, ma pote esiste mera como un lingua esperimental. Un estrema oposante es un otra lingua esperimental, lojban, cual declara se como no ave ambiguia e ce an un macina pote comprende la lingua. Lo es un lingua xasante esatia estrema, e multe desinias de gramatica pote mostra esta idea. An tal, ance lojban pote funsiona mera como un lingua esperimental ma nunca como un lingua aidante, e esta fato ia conclui ce la comunica entre umanas no nesesa tro multe esatia. Donce, jeneral, me nomi esta valua “esatia comparada”.

Frugalia e cortia. Linguas natural pare natural, alga car los es frugal, e xasa cortia es un de la mostras la plu evidente. Umanas no gusta complica tro en parla. Si poca dises pote clari tota, perce on debe parleta sin fini? Per clari cosas (“esatia” a supra), un lingua simple pote nesesa ajunta multe per descrive. Comparada con esta, un lingua con infletas pare corta e forte. Si un lingua aidante vole deveni un lingua franca, simil, lo debe no fa cada frase a tro longa. Ma desinias de gramatica per corti pote ance ajunta a la custa per aprende, donce la autor nesesa ecuilibra lo.

Flexablia. Esta es un valua cual un lingua aidante nunca debe xasa, me pensa. Ma esta ia dona a esperantistes multe orgulo. Con la dinstingui de nominativa e acusativa, on pote usa ordina libre. Lo pare flexable, ma tal flexablia destrui la fasilia per comprende, cual me ia nota a supra. Si, la parlor es sasiada; ma esce el considera ja esce la escutor pote comprende el direta pos escuta lo? Comprende a fini es posible, ma esta nesesa ce on ordina denova la frase e poi atenta comprende: la tempo usada per comprende grandi. Un lingua aidante debe aida comunica. Si alga esatia e frugalia es prometeda, model de frase restrinjeda e blanda es multe plu bon ca model de frase flexable ma difisil per comprende, me opina. Si un lingua es tal fluente donce on no sensa la esiste de la lingua mesma ma consentra mera sur la contenida en la dises, me ta pensa ce esta es un lingua sufisinte bon e un espresa sufisinte bon. Diverti de la lingua mesma es la taxe de leteralistes e poesistes.

Naturalia, esatia, frugalia, flexablia — esta cuatro valuas pote conflita alga contra simplia e fasilia. Con eseta de flexablia cual ave poca valua, cualce lingua aidante debe xasa con seria un ecuilibra conveninte entre simplia e naturalia, esatia, e frugalia. Cual pote ave plu importa, e cual pote ave min? Esta nesesa es considerada con seria. Serta, simplia e fasilia es sempre la plu importante, e la scema la plu bon es masimi simplia e fasilia sin nose naturalia, esatia, e frugalia.

Un lingua aidante es un obra de cual ecuilibra ave la plu valua. Multes ci no comprende la idea de lingua aidante no sabe ce ecuilibra es la valua la plu importante cuando los critica alga; los valua tro multe un de la ojetos e valuas, pe. sistemosia e esatia — si tal, los pote turna a lojban. Ma si nos vole fa un comenta plu ojetal sur linguas aidante, nos debe manteni la ojetos e valuas notada a supra e la conseta de ecuilibra, afin nos no va es maraniada en disputas completa sujetal e sin conversa real.

De ce volapük e esperanto ia comensa, multe laborores sur lingua aidante atenta trova un ecuilibra a la lado prosima de perfetia, e progresas grande esiste ja. Me crede ce a alga dia nos va pote asede tal ecuilibra e crea un lingua aidante la plu perfeta.

La esajo seguente va introdui como on pote usa la ojetos e valuas per construi un lingua aidante e como on pote comenta sur la desinias spesifada.

2016/10/19