Posible ≠ posiblia

Posiblia es la cualia de un cosa posible, o la mesura de como posible alga cosa es:

• Acel resulta ave cuasi no posiblia. Lo es cuasi nonposible​.
• On ave poca posiblia ce acel resulta va aveni.

En alga linguas on usa un parola simil a posiblia per dise ance “un cosa cual es posible”. Ma en elefen esta es un posible​:

• Me pote pensa a tre posibles (tre modos posible de progresa).
• Los ia rejeta la sola posible de solve la problem (la sola modo posible de solve lo).
• El ia oblida considera la posible ce la interede va es tro lenta per sua presenta (la fato ce cisa lo va es tro lenta).

En la frase tre, on ta pote dise ance:

• El ia oblida considera la posiblia ce la interede va es tro lenta per sua presenta.

Ma esta ta es un corti de “el ia oblida considera la posiblia de la idea ce …”, pd. esce acel problem es posible, o a cual grado lo es posible. La problem mesma es la posible, e lo ave un posiblia.

Otra duples segue la mesma model, incluinte difisil e difisilia:

• Me ia encontra un difisil grande (un problem major) en mea labora oji.
• Fortunosa, pos pensa, me ia vide ce la difisilia de la problem es vera un ilude.