Wuhan reabri partal pos sua enclui

La site en Xina do la pandemica de coronavirus ia comensa, Wuhan, ia reabri partal pos plu ca du menses de isoli se.

Imajes ia mostra folas de pasajores ci ariva a la stasion ferovial de Wuhan ier. On permete aora ce persones entra, ma no ce los sorti.

Wuhan es la capital de la provinse Hubei. Lo ia sufri plu ca 50 mil casos de la virus. A la min 3000 persones en Hubei ia mori par causa de la maladia.

Ma la cuantias ia redui aora vasta, longo la statistica de Xina. Ier, la provinse ia reporta 54 casos nova cual ia emerji en la dia presedente, ma tota ia es importada.

Bataliante per controla la casos cual entra de otra paises, Xina ia anunsia un proibi tempora contra tota visitores stranjer, an si los ave visas o lisensas de abita. Lo limita ance airocompanias xines e stranjer a un vola per semana, e la volas debe es plen a no plu ca 75%.

Entretempo, la coronavirus continua sperde rapida en otra paises. On ia confirma plu ca 600 mil infetas tra la mundo, e cuasi 29 mil moris. Cuasi 136 mil pasientes ia recovre.

La cuantia de moris en Espania ia esede 5000, pos un reporta de 832 plu en la 24 oras pasada. Espania es la pais la plu grave afetada de mundo, pos sola Italia.

La SUA ave aora la cuantia la plu alta de infetas confirmada: 104 mil.

Corea Sude dise ce, a la ves prima, lo ave aora plu persones ci ia recovre de la virus ca ci es ancora infetada. Lo ia reporta 146 casos nova ier, levante sua soma asta 9478, de ci 4811 es ja relasada de ospital.

Rusia e Er es entre la paises la plu resente cual introdui restrinjes nova per atenta lenti la sperde de la virus. En Rusia, on ia comanda la clui de sentros comersial, restorantes e caferias. En Er, persones va debe resta a casa, con alga esetas limitada, per la du semanas veninte.

En England, on va comensa fa probas per coronavirus a la empleadas fronte de la Servi Nasional de Sania.