Un siclon major en la Golfo Bengala

Barat ia comensa evacua miliones de persones longo sua costa este ante un siclon en la Golfo Bengala. On previde ce la tempesta va ateni la tera doman e va afeta la statos Bengala Ueste e Odisha.

Plu ca dudes ecipos salvante es ja posada e otras es preparada.

Siclon Amphan aveni a un tempo de multe migra de sites barati a viletas. Deses de miles de laborores migrante fuji de la sites pos un enclui nasional per restrinje la sperde de coronavirus.

Bengala Ueste e Odisha es entre la statos a cual un cuantia grande reveni. Odisha ia cansela trenes cual ia es intendeda per ariva ier, oji e doman, portante miles de migrores.

Alga ofisiores de distrito ia proibi entra a sua rejiones e ia demanda ce la governa de stato casi la migrores asta pos la tempesta. Multe de la persones vade a sua casas par pede. On previde ce la evacua va continua asta la matina de doman.

Ofisiores esperia ance difisiles en trova refujerias per la evacuadas. En Odisha, per esemplo, 250 de la plu ca 800 refujerias esistente es aora usada como sentros de isoli.

Donce ambos statos ia demanda ce on usa como refujerias tempora la scolas e otra construidas en la rejion cual va es probable afetada par la siclon. On nesesa plu tal locas ca usual per conteni persones su la regulas de distanti sosial.

Esta tempesta va es la siclon prima en la Golfo Bengala, con venta plu forte ca 240 cilometres per ora, pos lo cual ia mata plu ca 9000 persones a la costa de Odisha en 1999.

La departe meteorolojial de Barat ia publici un avisa jala per la rejion, conselante ce pexores evita la sude de la golfo en la 24 oras veninte e la norde per tre dias. Probable la tempesta va traversa la norde-ueste de la golfo per pasa tra la costas de Bengala Ueste e Bangladex, de mediadia local doman.

On ia averti ance sur un mar turbosa, con ondones capas de inonda rejiones costal.