Senatores jua e dormi en la sesiones acusante Trump

En la SUA, alga senatores ia adormi, fa juas e rompe otra regulas en la sesiones de acusa Presidente Donald Trump. On ia vide senatores con parolas crusada, jiretas de mano e an un avion de paper.

La sesiones ia oia ce la malusas alegada de potia par Trump menasa la democratia de la pais. La senatores servi como la juria per deside esce on debe despone la presidente de sua posto.

La salon alta de la parlamento esuan loda se como un loca de cortesia e bon condui. Ma en esta semana alga de sua membros, egal republicistes e democratas, ia es acusada de condui como enfantes noiada.

La regulas dise ce senatores debe resta sentante en la sesiones, ma a la min nove democratas e 22 republicistes ia vade a via de sua sejas a tempos diversa ier.

Marsha Blackburn, un republiciste de Tennessee, ia defende se pos cuando on ia oserva el lejente un libro en la salon. El ia tuita ce la volum, Como Odiores de Trump Rompe America par Kim Strassel, “furni bon comprendes sur la prosedes de oji”. El ia ajunta: “Mamas ocupada es la plu bon en multitaxia. Proba lo.”

Jim Risch, un republiciste ci preside la Comite de Relatas Esterna de la Senato, ia es nonmovente con oios cluida per un tempo. Sua portavose ia nega ce el ia dormi, esplicante ce el ia escuta mera atendosa “con sua oios cluida o dirijeda a basa”.

On ia nota ce Mark Warner, un democrata de Virginia, ia apoia se sur sua braso destra, con sua mano covrente sua oios, tra dudes minutos.

Ier, Richard Burr, un republiciste de Carolina Norde, ia distribui jiretas de mano – juetas per enfantes – a otra senatores per aida los a pasa la oras en la salon.

Telefonetas e computadores portable e tabletin es acompaniantes comun en escutas normal a la Senato, ma on ia proibi tota eletronicales en esta prosede, lasante multe persones ajitada.

On ia oia un farfulia de “mea valuosa” par Pat Leahy, un democrata de Vermont, cuando el ia reprende sua telefoneta de un comparte estra la salon. Alga senatores ia pare sircoveni la regulas par porta orolojetas astuta.

La conversa es ance proibida, e senatores es dial avertida par la sarjento de armas a resta silente o “risca es prisonida”. Ma a martedi, du republicistes ia comensa xuxa pos oras de pasa notas entre lunlotra.

On ave ance regulas sever contra comedas, ma on ia vide senatores ci mastica goma e xocolada.

Trump es sola la presidente tre ci on ia acusa formal de malcondui en la istoria de la Statos Unida, ma lo es nonprobable ce el va es condenada en un salon controlada par sua corepublicistes.

Ante la comensa de la presentas ier, alga senatores republiciste ia dise ce los ia oia no cosa nova en la razonas de la acusores democrata, e ia deside ja desculpa la presidente. On va nesesa un majoria de du tris per despone la presidente.