AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Rubores fura paper de vason en Hongkong

17 febrero 2020

En Hongkong, rubores armada ia fura 600 enrolas de paper de vason, con valua de plu ca mil dolares hongkong. Tal enrolas es aora poca disponable en la rejion, mancante pos multe compras asustada par la coronavirus.

Tre omes con coteles ia ruba un traor estra un supramercato en la distrito Mong Kok. La polisia ia aresta du omes e ia regania alga de la enrolas furada.

La ruba ia aveni en la temprana de oji, en un parte de Hongkong cual ave un istoria de ganges criminal.

Botecas tra la site ia vide un redui grande de sua reservas, e filos longa cuando enrolas nova aveni. An con afirmas par la governa ce la prosede de furni no es afetada par la virus, abitores ia ajunta a sua reservas de paper de vason.

Otra produidas per casa ia es ance coletiva comprada, incluinte ris, pasta, e licuidas de limpi.

Lo es ja cuasi nonposible ce on oteni mascas de fas o ijenintes de mano, car persones atenta proteje se de esta virus cual ia prende ja plu ca 1700 vives.

La autoriosas culpa rumores enlinia falsa per la compras coletiva e dise ce la furni de comedas e benes de casa resta stable.

On ia esperia ance alga compras coletiva de paper de vason, ijeninte de mano e mascas de fas en Singapor, cual ia confirma 75 casos de la coronavirus.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).