AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Revores en un buncer norsce respira aira venenida

31 agosto 2020

En Noria, plu ca 20 persones ia es ospitalida pos es venenida par monosido de carbono a un rev en un buncer suteran en Oslo, la capital.

La polisia dise ce la selebra ia es descovreda en modo acaso cuando, temprana a soldi, un de sua patrulias ia encontra un grupo de persones joven ci ia condui confusada. Otras ia emerji de un buncer e ia demanda per un ambulansia.

Autoriosas crede ce la veneni ia es causada par jeneradores portable.

On reporta ce du de la 25 vitimes ia es polisiores ci ia aida la selebrores.

La mediciste xef de la Ospital de la Universia de Oslo, Fridtjof Heyerdahl, ia comenta: “Fortunosa, tota de los es recovrente. Nos pote dise ce los es estra peril.”

Sirca 200 persones ia es presente a la rev, longo la polisia, ci ia recomenda ance ce otra partisipores xerca trata medical si los ta comensa sufri de nausea, doles de testa o un senti mareada.

Un person ci ia parti ante la ariva de la polisiores ia dise ce el ia sorti ja per respira aira fresca a multe veses, par causa de la mal cualia de la aira interna.

La polisia de Oslo dise ce lo investiga perce lo no ia segue un avisa anonim sur la esiste de la selebra.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).