La temperatur la plu alta sur la Tera

Lo cual pare es la temperatur natural la plu alta rejistrada sur la Tera ia es atenida en la Parce Nasional de la Vale de Moria en California. La mesura de 54,4°C es aora esaminada par la Servi Meteorolojial Nasional de la SUA.

Esta aveni a media de un onda de caldia a la costa ueste de la pais, cual ia causa du dias de perde de eletrica en California, pos la malfunsiona de un compleso eletrical a saturdi.

La temperatur recordo ia es rejistrada en la vileta Furnace Creek a soldi.

Ante esta, la temperatur la plu alta de rejistra fidable sur la Tera ia es 54,0°C, ance en la Vale de Moria, en 2013.

On disputa un mesura plu alta, 56,6°C, a un sentenio a ante en la mesma loca. Alga meteorolojistes moderna crede ce acel mesura ia es erante, como alga otra temperatures estrema cual ia es rejistrada en acel estate.

La onda de caldia presente estende de Arizona en la sude-ueste, longo la costa, asta la stato Washington en la norde-ueste.

On predise ce lo va ateni sua culmina oji, ante cuando la temperatur va comensa cade plu tarda en esta semana. An tal, la caldia estrema va continua per des plu dias a la min.

Car tan multe de la eletrica de la rejion depende de enerjia de sol e venta, e car persones usa sua eletrica per frescadores de aira, en tal temperatures la rede eletrical supralabora e risca malfunsiona intera.

Per maneja la esijes de California per eletrica e per preveni un rompe completa de servi, on fa rompes tempora e preanunsiada per controla e conserva enerjia.