AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

La polisia sudafrican xerca la matores de escavores

X febrero 2020

En Sudafrica, la polisia ia inisia un xerca per la matores de nove escavores nonlegal ci ia es bombardada con petras en un distrito ueste de Johannesburg.

On ia trova la corpos de la escavores de Lesotho sur la stradas de Matholeville, e un plu vitim grave ferida ia es rapida moveda a ospital.

Miles de escavores nonlegal, conoseda como zama-zamas (“los ci risca la acaso” en Zulu) labora en la pais, e scaramuxas violente aveni comun entre grupos oposada de laborores.

La ataca a venerdi ia segue a sirca 24 oras pos cuando polisiores ia invade la distrito. La polisia ia aresta 87 persones per interogas, ma on xerca ancora plu informas.

En un declara, Elias Mawela, comisionor provinsal de Gauteng, ia dise: “Nos condena esta ataca barbar e nos va serti ce nos move tera e sielo per fa ce la popla de Matholeville e Roodepoort senti secur. La suspetadas va es arestada pos tan poca tempo como posible, e la polisia no va dormi ante trova los.”

La xef de polisia ia ajunta ce el ia clama ofisiores de otra unias en Johannesburg a partisipa en la xerca.

Sudafrica es un de la paises la plu violente de mundo. Longo datos governal, on ia rejistra plu ca 57 omisides a cada dia en la anio pasada.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).