La omisidor a un mascita zelandes es forte condenada

A la om ci ia mata 51 persones a du mascitas en Zeland Nova, un corte ia dona un condena de vive en prison sin posible de libria. La om es la person prima en la istoria de la pais ci reseta esta puni.

Brenton Tarrant, un australian de 29 anios, ia confesa la omiside de 51 persones, la omiside atentada de 40 plu persones, e un acusa de terorisme. La ataca en marto pasada, cual ia es direta difusada en la rede, ia xoca la mundo.

La judor ia descrive sua atas como “nonumana”, ajuntante ce el ia “mostra no pardona”. “Tua crimines es tan malvolente ce an si tu es detenida asta tua mori, lo no va sasia la esijes de puni,” judor Cameron Mander ia dise oji en un corte en la site Christchurch.

En relata a la condena donada, Mander ia dise ce tal punis es reservada per “la omisides la plu mal”, e ia nota: “Si no asi, alora cuando?”

A la dia final de un escuta de cuatro dias, Mander ia pasa cuasi un ora en remente Tarrant a cada person ci el ia mata o feri. El ia ajunta ce, an pos la declara de culpablia par Tarrant, la fusilor ia pare “nonrepentinte e nonvergoniante”. Tra la tre dias pasada, el ia pare sin emosia en cuando 90 vitimes, lamentante o defiante, ia fronti el.

La condena sinifia ce Tarrant no va ave la posible de sorti de prison pos fa sola un parte de sua periodo intera de puni. Sua condena es ance la prima per terorisme en la istoria de Zeland Nova. La puni de mori no parteni a la sistem de justia en la pais.

Jacinda Ardern, ministro xef, oiante sur la condena, ia dise ce lo sinifia ce Tarrant va ave “no mal fama, no plataforma” e ce “nos va ave no causa per pensa a el, per vide el o per oia de el denova”.

Pos la matas, Zeland Nova ia introdui leges plu sever sur fusiles.