AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Australia oposa mercatos moiada de animales vivente

25 april 2020

La governa australian urje ce la paises G20 reata en relata con mercatos moiada de viventes, descrivente los como “un risca per biosecuria e sania umana”. Lo ancora no recomenda un proibi, ma dise ce sua conselores crede ce on nesesa cisa “retira gradal” los.

“Mercatos moiada” vende comedas fresca como carne e pex. Ma un cuantia peti de los vende ance bestias vivente, e on crede ce la coronavirus ia emerji de un tal mercato en Wuhan cual ia vende animales “esotica”, incluinte volpes, lupos joven, sivetas, tortugas e serpentes.

Australia ia recomenda un investiga de mercatos moiada de viventes pos un consenta de ministros G20 de cultiva.

On no sabe la orijina esata de la coronavirus presente, ma indicas sujesta ce lo ia veni de un animal. Longo la Organiza Mundal per Sania Animal, COVID-19 es prosima relatada a otra viruses trovada en ciroteros de tipo “fero de cavalo”.

La virus ia pasa o direta de cirotera a umana, o tra un ospitor media, cisa un pangolin. On crede ce la coronavirus SARS ia emerji en ciroteros ante pasa a sivetas e de los a umanas. Simil, la coronavirus MERS ia pasa de cameles a umanas, pos emerji probable en ciroteros.

En janero, Xina ia proibi tempora la comersia de animales savaje, como lo ia fa en la tempo de SARS. En la mense seguente, la governa ia “proibi completa la comersia nonlegal de viventes savaje” e ia “elimina la consuma de animales savaje per securi la vives e sania de la popla”. Ma on reporta ce on vende ancora tal cosas en mercatos en Xina e otra locas.

Plu resente, la dirijor jeneral de la Organiza Mundal de Sania ia dise ce tota governas debe “enforsa rigorosa la proibis contra la vende e comersia de viventes savaje per come”. Tedros Adhanom Ghebreyesus ia comenta plu: “Cuando on permete ce esta mercatos reabri, lo debe es sola con esije ce los conforma a normas sever de securia e ijenia per comables.”

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).