Utiles de conta

Utiles de pajeria


aora_oji:xef

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

"SOS" su un camera vijilante salva un tendor mancante

16 otobre 2019

Un fem ci ia pasa tre dias perdeda en la savana australian ia es salvada pos scrive un mesaje SOS cual on ia vide par un camera de securia.

Deborah Pilgrim, ci ave 55 anios, ia perde sua via a soldi pos deveni separada de sua grupo de tendores en Australia Sude. Plu tarda, el ia trova se a un casa vacua, do el ia scrive “SOS” sur la tera en la jardin.

La posesor de la casa, ci abita a distantia de 70 cilometres, ia vide la mesaje par un camera video e ia avisa la polisia. On ia trova Pilgrim en bon sania a la note de ier, prosima a la vila Sedan.

La polisia ia dise ce la posesor ia regarda de tempo a tempo la cameras a sua imobila pos oia ce on xerca la fem perdeda.

“On ia ave la SOS scriveda en la tera, cual no ia es ala a la dia presedente,” la posesor ia dise. “Donce me ia comprende e ia clama la polisia.”

El ia dise ce la cameras vijilante ia es mera resente instalada, pos un serie de entras par forsa a la casa.

Sua clama a la polisia ia inisia un xerca renovida de la rejion. Polisiores dise ce los ia trova Pilgrim pos alga oras a un imobila visina, do el ia trova acua bevable. On ia prende el a ospital per cautia.

La supravidor de polisia ia comenta: “Lo es vera stonante ce la comunia ia pote usa la belias de tecnolojia per aida trova Deborah.”

On ia fa un xerca vasta de aira e sur tera ante trova Pilgrim.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Un profesor de lege deveni la presidente de Tunis

15 otobre 2019

Kais Saied, un profesor jubilada, va deveni la presidente seguente de Tunis pos un vinse inondante en la vota a soldi.

La comision elejal ia anunsia ce la profesor pasada de lege, ci ave 61 anios, ia gania 73% de la votas. Sua oposor ia es Nabil Karoui, un maniate de medias, ci ia campania de prison pos sua aresta su acusas de lava de mone e froda de impostas.

Sondas ia sujesta ce Saied ia benefica de suporta grande entre votores joven. Alga ia es impresada par sua reputa de refusa deveni malida.

Avente la nometa “la robot” per sua manera sever, Saied ia fa un campania astuta, con cuasi no propaganda, presentante a jovenes tunisi un mesaje de solidia e oposa de froda.

Saied ia es un de la comite de espertas ci ia aida la parlamento a prepara la constitui de Tunis pos la Primavera Arabi, adotada en 2014. El ia apare en televisa de ves a ves como un comentor political.

En la semana ante la vota, el ia anunsia ce el no va campania cuando sua oposor es en prison.

El ia promete reformis elejal, incluinte cambias a elejes local per representores rejional. An tal, criticores ia ataca sua opinas sosial tradisional.

En un intervisa con un jornal local, el ia acusa ce otra nasiones promove omosesalia en la pais. El favore restora la puni de mori, cual on ia suspende en Tunis en 1994. El oposa ance la egalia de erita per omes e femes.

On ia avansa la eleje pos la mori en julio de Beji Caid Essebsi, la presidente prima democrata elejeda de Tunis. El ia entra a sua posto en 2014, a tre anios pos un revolta poplal cual ia suverti la renor longa Zine al-Abidine Ben Ali e ia inisia la Primavera Arabi.

An si la Primavera Arabi ia furni democratia a Tunisia, lo no ia furni la beneficas economial esperada.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Xefes catalan es prisonida per tisa rebela

14 otobre 2019

La Corte Suprema de Espania ia condena nove xefes separadiste catalan a entre nove e des-tre anios en prison per tisa rebela, par causa de sua rol en la referendo sur autonomia en 2017.

On ia trova ce tre plu acusadas es culpable de desobedi e on ia multa los, ma los no va spende tempo en prison.

Tota la des-du politicistes e ativistes ia nega la acusas.

Separadistes en Catalunia ia intende un desobedi sivil coletiva ante la anunsia de judi.

La avocatos acusante ia desira asta 25 anios en prison per Oriol Junqueras, la vispresidente pasada de Catalunia e la plu major de la xefes separadiste litigada.

A Junqueras on ia dona la condena la plu longa: 13 anios per tisa rebela e per malusa de finansia publica. La otra condenas envolve periodos variante de nove anios e plu.

La nove xefes ia es desculpada de la acusa plu grave de rebela mesma.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Japan es afetada par un siclon multe forte

13 otobre 2019

Japan ia asinia 27 mil soldatos e laborores salvante pos un de la tempestas la plu forte en multe anios. La siclon ia mata 18 persones, cisa plu.

Siclon Hagibis ia ateni la tera a sude de Tocio a saturdi, movente a norde e causante inondas grave. Des-tre persones manca.

En la prefetia Nagano en la sentro de la pais, acua ia ensirca trenes Shinkansen e elicotores ia prende persones de sua tetos.

“La governa va fa tota cual lo pote,” la ministro xef Shinzō Abe ia dise, prometente envia plu soldatos si los va es nesesada.

Ja a soldi, la tempesta ia debili e ia move a via de la tera.

En la site Kawagoe, a norde de Tocio, ecipos de salva ia usa barcos per aida abitores trapida en un cureria de persones vea.

Cuasi 150 mil casas en la rejion Tocio Grande es sin eletrica, e la dispone de acua fluente es ance afetada. Trenes e aviones canselada su menasa de la tempesta comensa aora funsiona denova.

Multe de la moris ia aveni cuando persones ia es caturada en liscas de tera o puxada a via par la acua inondante. Un fem en sua desenio oto ia mori cuando un elicotor salvante ia cade el sin intende.

Alga partes de Japan ia esperia asta 40% de sua pluve promedia anial en mera un pico de dias.

En la vila Hakone, prosima a Monte Fuji, plu ca un metre de pluve ia cade a venerdi e saturdi, plu ca cualce cuantia rejistrada en un periodo de 48 oras en Japan a ante.

La pluve ia afeta ance cultivores, inondante campos e retenerias.

La tempesta ia obliga la cansela de alga maxes de la Copa Mundal de Rugbi, ma un max major entre Japan e Scotland va aveni oji. La corsa cualinte per la Premio Grande de Formula 1 ia es ance disturbada, ma lo ia aveni e ia es ganiada par Valtteri Bottas.

Cuando la tempesta ia prosimi, on ia recomenda ce plu ca sete milion persones parti de sua casas. An tal, on crede ce sola 50 mil ia vade a la refujerias.

Sola en la mense pasada, Siclon Faxai ia ataca partes de Japan, danante 30 mil casas, de cual on ancora no ia repara la plu.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Abiy Ahmed gania la Premio Nobel de Pas

12 otobre 2019

La Premio Nobel de Pas per 2019, e la numero sento de istoria, ia es asiniada a Abiy Ahmed, ministro xef de Itiopia, ci ia reali pas con Ertra en la anio pasada. La premio ia es donada en reconose de sua labora per “ateni pas e coopera internasional”.

La acorda con Ertra ia fini un nonprogresa militar de 20 anios pos la gera de frontera entre 1998 e 2000.

On ia nomi Abiy como la ganior en Oslo, do el va reseta la premio en desembre. Lo ave la valua de nove milion coronas svensce (sirca 900 mil dolares esuan).

Pos la anunsia, Abiy ia descrive se como “umilida e stimulada”. En un telefoni con la secretor de la Comite Nobel Norsce, el ia dise: “Multe grasias. Lo es un premio donada a Africa, donada a Itiopia, e me pote imajina como la otra xefes de Africa va reata positiva a lo per labora sur la prosede de construi pas sur nosa continente.”

En soma, 301 persones ia es nominada per la premio prestijiosa, incluinte 223 individuas e 78 organizas.

On ia divina multe sur ci va gania, e Greta Thunberg, ativiste sur la clima, ia es vasta prediseda como la person la plu probable. Longo la regulas de la Funda Nobel, on no pote publici la listas de nominadas asta pos la pasa de 50 anios, e la organiza dise ce tota predises ante la anunsia es mera divinas.

Pos deveni ministro xef en april 2018, Abiy ia introdui reformis libraliste grande a Itiopia, renovinte lo cual ia es un nasion sever controlada a ante.

El ia libri miles de ativistes oposante de prison e ia permete la reveni a la pais de desacordores espulsada. E en sua governa, alga femes ia es moveda a postos major. La plu importante, el ia suscrive la acorda de pas con Ertra.

Ma sua reformis ia esposa ance la tensa interetnical en Itiopia, e la violentia resultante ia forsa sirca 2,5 milion persones de sua casas.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Locales coler tira un maior mexican pos un veculo

11 otobre 2019

Des-un persones ia es arestada en Mexico sude pos lia la maior de sua vileta a un camioneta e tira el longo la stradas.

Polisiores ia interveni per libri Jorge Luis Escandón Hernández, ci ia sufri no feris major.

Esta ia es la ataca du par cultivores ci esije ce la maior reali sua promete campaniante per repara un strada local. Plu polisiores ia es aora enviada a la vileta Santa Rita en la stato Chiapas.

Maiores e politicistes local en Mexico es frecuente atacada par ganges drogal cuando los refusa coopera con scemas criminal, ma lo es min comun ce on ataca fisical los par causa de sua prometes de campania.

Escandón ia dise ce el va presenta acusas de saisi e omiside atentada.

Video filmada par oservores estra la ofisia de la major mostra un grupo de omes ci tira el de la construida e forsa el sur la retro de la veculo.

Imajes plu tarda, par un camera vijilante, mostra ce el ia es liada a la retro de la camioneta par un corda sirca sua manos e tirada longo la stradas de la vileta, cual es un parte de la site Las Margaritas.

Deses de polisiores munisipal ia colabora per para la veculo e salva la maior. Alga persones ia es ferida en scaramuxas entre la polisiores e la omes ci ia saisi la maior.

En un aveni plu temprana, a cuatro menses ante aora, un grupo de omes ia destrui la ofisia de la maior cuando los no ia trova el ala.

En la tempo ante la eleje maioral en Las Margaritas, on ia aresta Escandón mesma, suspetante ce el ia partisipa en un combate contra suportores de un aspiror oposante. El ia es librida par causa de un manca de atesta.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Rompes de eletrica en California per preveni focones

10 otobre 2019

En California norde, un compania de eletrica rompe sua servi a sirca 800 mil casas e otra construidas per atenta preveni focones savaje.

Partes grande de la rejion de la Baia San Francisco, ma no la site mesma, ia perde sua eletrica, e alga abitores es coler.

La compania Gas e Eletrica Pasifica ia averti ce la rompe pote dura tra alga dias. En la anio pasada, sua linias de transmete ia inisia la focon savaje la plu matante en la istoria de California.

Con ce meteorolojistes predise ventas alta, on intende ce la rompe va elimina la risca ce linias eletrical cadeda va ensende plu focones.

La servi nasional de clima ia publici un avisa de bandera roja per la Montes Santa Cruz e la rejiones Baia Norde e Baia Este, avertinte ce la situa ta pote causa “la aveni de venta maral la plu forte en la rejion pos la focones de Baia Norde en otobre 2017”.

De la matina de martedi, la compania ia dise ce sirca 500 mil clientes es sin eletrica. Lo ia intende ce 200 mil plu va perde sua eletrica ante mediadia de ora local, ma la compania ia pospone plu descomutas asta plu tarda en la posmedia, par causa de cambias en la state meteorolojial.

La “Focon de Campa” jigante en la vila Paradise en 2018 ia arde 60 mil ectares e ia lasa 86 persones mor. Un investiga ia culpa aparatos mal mantenida de Gas e Eletrica Pasifia per ensende la focon.

La compania ia es ance culpada per focones matante en 2017. Pos litigas seguente, la compania publica comersiada ia declara sua bancarotia en esta anio, en un prosede cual continua ancora.

Lo es la sola furnor de gas e eletrica per multe de California norde, e donce la majoria vasta de consumores en la rejion ave no otra fonte de potia. On previde ce la rompes va afeta plu ca un dui de la contias en la stato.

La avertis covre ance la areas a norde de la Baia San Francisco, incluinte rejiones como Napa e Sonoma, famosa per produi vino. Plu sude, multe sites conteninte companias major de infotecnolojia va es cisa afetada, como Cupertino, la loca de la xeferia de Apple.

Botecas local ia reporta un enflue de clientes ci compra furnis per aida se tra la rompe.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Un fabriceria nova de telefonetas en Ruanda

9 otobre 2019

En Kigali, la capital de Ruanda, on ia abri la compleso prima en Africa cual fabrica telefonetas de ap.

Fabricada par la compania tecnolojial Mara Group, la telefones Mara X e Mara Z va usa Android, la sistem de opera de Google, e va custa 175 750 frances ruanda (190 dolares esuan) e 120 250 frances ($130).

La compania dirije se a clientes ci desira paia plu per cualia alta.

La plu de telefonetas vendeda en Africa es de companias xines. Los suporta du cartas SIM a la mesma tempo e es plu barata ca la custa projetada par Mara.

Companias asembla telefonetas en Misre, Itiopia, Jazair e Sudafrica, ma los emporta la composantes.

Ashish Thakkar, dirijor xef de Mara Group ia comenta: “Nos es vera la primas ci fa la fabrica. Nos crea la cartas madral, nos crea la sucartas tra la prosede intera. On ave plu ca mil pesos per telefon.”

El ia dise ance ce la compleso ia custa 24 milion dolares esuan e es capas de fabrica 1200 telefonetas per dia.

Presidente Paul Kagame ia es presente a la abri de la fabriceria, e ia espresa sua espera ce lo va aumenta la usa de telefonetas en Ruanda.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Desacorda en Zeland Nova sur sua aniversario european

8 otobre 2019

Un marineta ia ariva en Zeland Nova per onora la aniversario 250 de la europeanes prima ci ia atera ala. Capitan James Cook, esploror brites, ia atera con sua ecipo a 8 otobre 1769, inisiante un rena colonial.

On fa alga dias de avenis per onora la data. Ma Zeland Nova ia es ja poplada par la maoris tra sento de anios, e multe dise ce on debe no onora la aniversario.

En la semana pasada, la Comisionor Alta brites ia ofre un declara de regrete a tribus local sur la mori de nove persones nativa en la encontra prima entre Cook e la maoris. Ma el no ia demanda per pardona.

On crede ce persones maori de isolas polinesian ia ariva en Zeland Nova (de cual la nom maori es Aotearoa) a alga sentenios ante la europeanes prima.

Cook ia es enviada en mision de Britan per trova e mapa lo cual persones de sua tempo ia imajina como un continente grande en la Mar Pasifica, a sude de Australia. El no ia trova acel continente mital, ma a 6 otobre sua xico aidante ia persepi Zeland Nova.

La ecipores, ci ia inclui un xef tahiti e un navigor ci ia aida Cook a comunica con la maoris, ia atera a Tuuranga-nui, aora nomida Gisborne, a la costa este de Isola Norde pos du plu dias.

Cook ia esplora e mapa multe de la costa de Zeland Nova, pausante a alga locas e inisiante relatas con abitores maori. El ia reclama ance la posese de du rejiones per la nom de la corona brites, tal comensante la prosede de coloni.

An si la esplora de Zeland par Cook domina la libros de istoria, un navigor nederlandes nomida Abel Tasman ia es la european prima ci ia vide lo, en 1642, ma el no ia veni a tera.

A saturdi, Jacinda Ardern, ministro xef zelandes, ia comensa la avenis recordante. El ia recomenda ce on parla plu libre sur la istoria de la pais, corajinte persones a “imajina como on ta senti en oia la raconta de un nara, sabente ce en fato on ia perde un asendente par causa direta de acel encontras”.

El ia ajunta ce en la pasada, Zeland Nova “ia presenta vera sola 50% de la istoria, e no ia presenta sempre bon lo”.

A esta matina, un marineta de barcones ia ateni Gisborne, incluinte un copia de lo de Cook, sur cual du parlamentores ia vade per saluta la ecipo. Protestores ia es ance presente en la vila.

En la encontra prima entre la ecipo de Cook e la abitores maori de Tuuranga-nui, persones ia mori. Un xef de la grupo Ngati Oneone ia es fusilida e matada sin pausa pos un malcomprende sur un defia ritual. A la min oto otra persones maori ia es matada.

An pos la declara de regrete par Britan, multe avocatos per diretos maori dise ce on no ia ata sufisinte per reconose lo cual ia aveni en la dias prima pos la ariva de Cook.

Protestores dise ance ce sua asendentes maori ia es nonjusta tratada en la eda colonial, con la resulta ce comunias maori esperia oji un nivel nonproportial de povria, crimin e discrimina.

En Gisborne, un sculta de Cook ia es manxada con pinta roja a multe veses e va es moveda a un museo.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Macron previde un deside sur Brexit en esta semana

7 otobre 2019

Emmanuel Macron, presidente de Frans, ia informa Boris Johnson, ministro xef de la Rena Unida (RU), ce la Uni European (UE) va deside a la fini de esta semana esce un acorda de Brexit es posible.

Johnson ia averti la UE de deveni tentada par opina ce la retira de Britan pote es posponeda asta pos 31 otobre. An tal, un lege nova obliga el a solisita un pospone si on no ia trova un acorda a 19 otobre.

Como un parte de un fini de semana plen de telefonis a xefes de la UE, Johnson ia informa Macron ce el crede ce un acorda pote es realida, ma ce la UE nesesa egali alga comprometes fada par la RU.

Macron ia dise ce en la dias veninte on debe continua rapida la negosias con la ecipo de Michel Barnier, la negosior xef per la UE sur Brexit, per evalua a la fini de la semana esce on pote ave un acorda cual respeta la prinsipes de la UE.

La comentas ia es fada ante alga dias major de negosias, en cual ambos lados va atenta trova un acorda nova a tempo per un confere de xefes european a 17 e 18 otobre.

La metodo de preveni un frontera dur sur la isola Er es ancora un punto problemosa, car la UE desira cambias fundal a la proposas la plu resente de la RU.

Longo la Lege Benn, asetada en la mense pasada, si a 19 otobre la parlamentores brites no ia aseta un acorda con la UE, e si los no ia deside per un Brexit sin tal acorda, la ministro xef debe scrive a la UE per solisita un pospone de la data de retira.

Paperes governal cual ia es presentada a un corte scotes ia dise ce Johnson va obedi la lege, an si el ia declara ja ce on va fa “no plu esitas o retardas”.

aora_oji/xef.txt · Editada: 2019/10/16 07:18 par Simon